ಮಹಿಳೆ ವಿರುದ್ಧ ಸಾಮಾಜಿಕ ಪಿಡುಗು: ರಾಷ್ಟ್ರಪತಿ ವಿಷಾದ

ನವದೆಹಲಿ (ಪಿಟಿಐ): ದೇಶದಲ್ಲಿ ಸಾಕಷ್ಟು ಕಾನೂನು ಕಟ್ಟಳೆಗಳಿದ್ದರೂ, ಮಹಿಳೆಯರ ವಿರುದ್ಧ ಸಾಮಾಜಿಕ ಪಿಡುಗು ಮುಂದುವರಿದಿರುವ ಬಗ್ಗೆ ವಿಷಾದ ವ್ಯಕ್ತಪಡಿಸಿರುವ ರಾಷ್ಟ್ರಪತಿ ಪ್ರತಿಭಾ ಪಾಟೀಲ್, ವಿದ್ಯಾರ್ಥಿನಿಯರು ಆತ್ಮರಕ್ಷಣೆಗಾಗಿ ಜೂಡೊ- ಕರಾಟೆಯಂತಹ ಕಲೆಗಳನ್ನು ಕಲಿತುಕೊಳ್ಳಬೇಕೆಂದು ಸೂಚಿಸಿದ್ದಾರೆ.



ಅವರು ಅಂತರರಾಷ್ಟ್ರೀಯ ಮಹಿಳಾ ದಿನವಾದ ಮಂಗಳವಾರ ಇಲ್ಲಿ ಸಿಆರ್‌ಪಿಎಫ್ ಪ್ರಥಮ ಮಹಿಳಾ ಪಡೆಯ ರಜತ ಮಹೋತ್ಸವದ ಅಂಗವಾಗಿ ಮಹಿಳಾ ಯೋಧರಿಂದ ಪಥಸಂಚಲನ ಗೌರವ ಸ್ವೀಕರಿಸಿ ಮಾತನಾಡಿದರು.



‘ಸಮಾಜದಲ್ಲಿರುವ ವಿವಿಧ ಪಿಡುಗು ಮತ್ತು ಭೇದ-ಭಾವಗಳಿಂದ ಮಹಿಳೆಯರು ಅನೇಕ ಸವಾಲು ಮತ್ತು ತಾರತಮ್ಯಗಳನ್ನು ಎದುರಿಸಬೇಕಾಗಿದೆ. ನಮ್ಮಲ್ಲಿರುವ ಸಾಮಾಜಿಕ ಅನಿಷ್ಟಗಳಿಂದಾಗಿ ದೇಶ ಪ್ರಗತಿ ಹೊಂದುವಲ್ಲಿ ತೊಡಕಾಗಿದೆ. ಅನೇಕ ಕಾನೂನುಗಳಿದ್ದರೂ, ಈ ಸಮಸ್ಯೆಗಳು ಆಚರಣೆಯಲ್ಲಿವೆ’ಎಂದು ಆತಂಕ ಸೂಚಿಸಿದರು.