ಲೋಕಪಾಲ- ಮಾತಿಗೆ ತಪ್ಪಿದ ಪ್ರಧಾನಿ: ಮತ್ತೆ ಉಪವಾಸ ಸತ್ಯಾಗ್ರಹ: ಹಜಾರೆ ಎಚ್ಚರಿಕೆ

ನವದೆಹಲಿ (ಪಿಟಿಐ): ಮುಂಬರುವ ಸಾರ್ವತ್ರಿಕ ಚುನಾವಣೆಗೂ ಮುನ್ನ ಕೇಂದ್ರ ಸರ್ಕಾರ ಬಲಿಷ್ಠ ಲೋಕಪಾಲ ಮಸೂದೆ ಜಾರಿಗೆ ತರದಿದ್ದಲ್ಲಿ ಉಪವಾಸ ಸತ್ಯಾಗ್ರಹ ನಡೆಸುವುದಾಗಿ ಸಾಮಾಜಿಕ ಕಾರ್ಯಕರ್ತ ಅಣ್ಣಾ ಹಜಾರೆ ಎಚ್ಚರಿಕೆ ನಿಡಿದರು. ಈ ವಿಷಯದಲ್ಲಿ ಪ್ರಧಾನಿ ಮನಮೋಹನ್ ಸಿಂಗ್ ಮೋಸ ಮಾಡಿದ್ದಾರೆ ಎಂದು ಆರೋಪಿಸಿದರು.



ದಕ್ಷಿಣ ದೆಹಲಿಯ ಸರ್ವೋದಯ ಎನ್‌ಕ್ಲೆವ್‌ನಲ್ಲಿ ರಾಜಕೀಯೇತರ ಚಳವಳಿಗಾಗಿ ಸ್ಥಾಪಿಸಿರುವ ನೂತನ ಕಚೇರಿಯನ್ನು ಭಾನುವಾರ ಉದ್ಘಾಟಿಸಿ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಅವರು, ದೇಶದಲ್ಲಿ ನಾಯಕರಿಗೇನೂ ಕೊರತೆಯಿಲ್ಲ. ಆದರೆ ಈ ಎಲ್ಲ ಮುಖಂಡರು 2ಜಿ ತರಂಗಾಂತರ ಮತ್ತು ಕಲ್ಲಿದ್ದ ಗಣಿ ಹಂಚಿಕೆ ಹಗರಣದಲ್ಲಿ ಶಾಮೀಲಾಗಿರುವುದು ಸಮಸ್ಯೆ ಎಂದರು. 



ದೇಶದಲ್ಲಿ ಬದಲಾವಣೆ ಉಂಟು ಮಾಡಬೇಕು ಎಂದು ಯಾರಾದರು ಬಯಸಿದ್ದರೆ ಮೊದಲು ಅವರು ಗ್ರಾಮದಲ್ಲಿ ಬದಲಾವಣೆ ತರಬೇಕು. ಕೇವಲ ಸರ್ಕಾರ ನೀಡುವ ಅನುದಾನದಿಂದ ಮಾತ್ರ ಬದಲಾವಣೆ ತರಲು ಸಾಧ್ಯವಿಲ್ಲ ಎಂದು ಹೇಳಿದರು. `ದೀರ್ಘ ಸಮಯದ ಹಿಂದೆಯೇ ಟಾಟಾ ಮತ್ತು ಬಿರ್ಲಾ ದೇಶದಲ್ಲಿ ಬದಲಾವಣೆ ತಂದಿದ್ದಾರೆ. ನಮಗೆ ನಾಯಕರ ಕೊರತೆ ಇಲ್ಲ. ಆದರೆ, ಈಗಿನ ನಾಯಕರು ಕಲ್ಲಿದ್ದಲು ಗಣಿ ಹಂಚಿಕೆ, 2ಜಿ ಹಗರಣದಲ್ಲಿ ಶಾಮಿಲಾಗಿದ್ದಾರೆ. ಮಾತಿಗೆ ತಕ್ಕಂತೆ ನಡೆದುಕೊಳ್ಳುವ ನಾಯಕರ ಅಗತ್ಯ ದೇಶಕ್ಕಿದೆ~ ಎಂದು ಹೇಳಿದರು.



`ಲೋಕಪಾಲ ಮಸೂದೆಗೆ ಹೊರತುಪಡಿಸಿ ಬೇರಾವುದೇ ಬೇಡಿಕೆಗೆ ಒತ್ತಾಯಿಸಿ ಮತ್ತೆ ಉಪವಾಸ ನಡೆಸುವುದಿಲ್ಲ. ಆದರೆ, ಸರ್ಕಾರ 2014ರಲ್ಲಿ ನಡೆಯಲಿರುವ ಸಾರ್ವತ್ರಿಕ ಚುನಾವಣೆಗೂ ಪೂರ್ವದಲ್ಲಿ ಮಸೂದೆ ಜಾರಿಗೊಳಿಸದಿದ್ದಲ್ಲಿ ನನ್ನ ಮಾತಿನಿಂದ ಹಿಂದೆ ಸರಿಯುತ್ತೇನೆ. ಈ ಬಾರಿ ನಾನು ರಾಮಲೀಲಾ ಮೈದಾನದಲ್ಲಿ ಉಪವಾಸ ನಡೆಸುತ್ತೇನೆ~ ಎಂದರು. ಜನಲೋಕಪಾಲ ಮಸೂದೆಯಲ್ಲಿ ತಮ್ಮ ಬೇಡಿಕೆಗಳನ್ನು ಸೇರಿಸಲು ನಿರ್ಣಯ ಅಂಗೀಕರಿಸುವುದಾಗಿ ಪ್ರಧಾನಿ ಭರವಸೆ ನೀಡಿದ್ದರು. ಆದರೆ, ಅದನ್ನು ಈಡೇರಿಸದೇ ಮೋಸ ಮಾಡಿದ್ದಾರೆ ಎಂದು ಕಳೆದ ಆಗಸ್ಟ್‌ನಲ್ಲಿ ನಡೆಸಿದ್ದ 13 ದಿನಗಳ ಉಪವಾಸ ಸತ್ಯಾಗ್ರಹವನ್ನು ಉಲ್ಲೇಖಿಸಿ ಹೇಳಿದರು. `ಆ ಸಂದರ್ಭದಲ್ಲಿ ಪ್ರಧಾನಿ ಭರವಸೆ ನೀಡದಿದ್ದಲ್ಲಿ ಉಪವಾಸ ಕೈಬಿಡುತ್ತಿರಲಿಲ್ಲ. ಯಾವುದೇ ಕಾರಣಕ್ಕೂ ನಾವು ಲೋಕಪಾಲಕ್ಕೆ ಸಂಬಂಧಿಸಿದಂತೆ ಸರ್ಕಾರದ ನಿಲುವನ್ನು ನಾವೆಂದೂ ಬೆಂಬಲಿಸುವುದಿಲ್ಲ~ ಎಂದು ತಿಳಿಸಿದರು.



ಎದುರಾಳಿಗಳ ಜತೆ ಜಗಳಕ್ಕೆ ಇಳಿಯದಂತೆ ಅರವಿಂದ್ ಕೇಜ್ರಿವಾಲ್ ಅವರ ಹೆಸರು ಉಲ್ಲೇಖಿಸದೇ ಕಾರ್ಯಕರ್ತರಿಗೆ ಕರೆ ನೀಡಿದರು.



`ಹೌದು, ನಮ್ಮ ತಂಡ ಇಬ್ಭಾಗವಾಗಿದೆ. ಎರಡೂ ಮಾರ್ಗಗಳು ಅಗತ್ಯ. ಆದರೆ, ರಾಜಕೀಯ ನಮ್ಮ ಮಾರ್ಗವಲ್ಲ. ಪ್ರತಿಯೊಬ್ಬ ಕಾರ್ಯಕರ್ತರು ತಮ್ಮದೇ ಆದ ಮಾರ್ಗ ಕಂಡುಕೊಳ್ಳಬಹುದು. ಈ ವಿಚಾರದಲ್ಲಿ ಅವರು ಸಂಪೂರ್ಣ ಸ್ವತಂತ್ರರು. ಆದರೆ, ಪದೇ ಪದೇ ಮನಸ್ಸು ಬದಲಾಯಿಸಬಾರದು~ ಎಂದು ಹೇಳಿದರು.



`ಇಲ್ಲಿಯವರೆಗೆ ನಾವು ಕೇವಲ ಭ್ರಷ್ಟಾಚಾರದ ವಿರುದ್ಧ ಹೋರಾಟ ನಡೆಸುತ್ತ ಬಂದಿದ್ದೇವೆ. ಆದರೆ, ಸಂಪೂರ್ಣ ವ್ಯವಸ್ಥೆಯ ಬದಲಾವಣೆ ವಿರುದ್ಧ ಹೋರಾಟ ನಡೆಸುವ ಸಮಯ ಬಂದಿದೆ~ ಎಂದರು.