ಗುರುವಾರ , ಜೂನ್ 24, 2021
27 °C

ವಿ.ಕೆ.ಸಿಂಗ್‌, ರಾಖಿ ಸಾವಂತ್‌ ಬಿಜೆಪಿಗೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದೆಹಲಿ (ಪಿಟಿಐ):  ಭೂಸೇನೆಯ ನಿವೃತ್ತ ಮುಖ್ಯಸ್ಥ ಜನರಲ್‌ ವಿ.ಕೆ.­ಸಿಂಗ್‌ ಶನಿವಾರ ಇತರ ನಿವೃತ್ತ ಸೈನಿಕ­ರೊಂದಿಗೆ ಭಾರತೀಯ ಜನತಾ ಪಕ್ಷ (ಬಿಜೆಪಿ)ಕ್ಕೆ ಸೇರ್ಪಡೆ­ಯಾದರು. ಅಲ್ಲದೇ ಬಾಲಿವುಡ್‌ ನಟಿ ರಾಖಿ ಸಾವಂತ್‌ ಸಹ ಬಿಜೆಪಿ ಸೇರಿದರು.



ಪಕ್ಷದ ಅಧ್ಯಕ್ಷ ರಾಜನಾಥ ಸಿಂಗ್‌ ಅವರ ಸಮ್ಮುಖದಲ್ಲಿ ಬಿಜೆಪಿ ಸೇರಿದ ವಿ.ಕೆ. ಸಿಂಗ್‌ ಬಿಜೆಪಿಯೊಂದೇ ‘ರಾಷ್ಟ್ರ­ವಾದಿ’ ಪಕ್ಷ ಎಂದರು. ‘ರಾಷ್ಟ್ರವಾದಿ, ಸ್ಥಿರ ಮತ್ತು ಸದೃಢ ಸರ್ಕಾರ ರಚಿಸಲು ಬಿಜೆಪಿಗೆ ಸೇರಿದ್ದೇವೆ’ ಎಂದರು.

‘ಬಿಜೆಪಿ ಅಧಿಕಾರಕ್ಕೆ ಬಂದರೆ  ಭದ್ರತಾ ಪಡೆಗಳ ಬಗ್ಗೆ ಹೆಚ್ಚಿನ ಮುತುವರ್ಜಿ ವಹಿಸಲಿದೆ’  ಎಂದು ರಾಜನಾಥ್‌ ಸಿಂಗ್‌ ತಿಳಿಸಿದರು.



ಇತ್ತೀಚೆಗೆ ಮುಂಬೈ ಕರಾವಳಿಯಲ್ಲಿ ನಡೆದ ಜಲಾಂತರ್ಗಾಮಿ ದುರಂತ ಉಲ್ಲೇ­ಖಿಸಿದ ಸಿಂಗ್‌, ಕೇಂದ್ರದ ಯುಪಿಎ ಸರ್ಕಾರ ಭದ್ರತಾ ಪಡೆಗಳ ವಿಷಯದಲ್ಲಿ ಹೆಚ್ಚಿನ ಮುತುವರ್ಜಿ ವಹಿಸಿಲ್ಲ ಎನ್ನುವುದಕ್ಕೆ ಈ ಘಟನೆಯ ಸಾಕ್ಷಿ ಎಂದರು. ‘ರಕ್ಷಣಾ ಪಡೆಗೆ ಹೊಸ ಸ್ಪರ್ಶ ನೀಡ­ಬೇಕಾದ ಅಗತ್ಯ ಇದೆ. ಆದರೆ ಅದು ಇನ್ನೂ ನೆರೆವೇರಿಲ್ಲ’ ಎಂದು ಸಿಂಗ್‌ ಹೇಳಿದರು.



ಶಿಂಧೆಗೆ ನೋಟಿಸ್‌

ಕೆಲ ವ್ಯಕ್ತಿಗಳ ವಿರುದ್ಧ ಮಾಡಿರುವ ‘ವಿಶ್ವಾಸಘಾತ’ ಮತ್ತು ‘ದೇಶ­ದ್ರೋಹ’ ಆರೋಪಗಳಿಗೆ ಸಂಬಂಧಿಸಿ ಕೇಂದ್ರ ಗೃಹ ಸಚಿವ ಸುಶೀಲ್‌ ಕುಮಾರ ಶಿಂಧೆ ಅವರಿಗೆ ವಿ.ಕೆ.ಸಿಂಗ್‌ ತಮ್ಮ ವಕೀಲರ ಮೂಲಕ ನೋಟಿಸ್‌ ನೀಡಿದ್ದಾರೆ. ನೋಟಿಸ್‌ಗೆ ಉತ್ತರ ನೀಡದೇ ಇದ್ದಲ್ಲಿ ಕಾನೂನು ಕ್ರಮಕ್ಕೆ ಮುಂದಾ­ಗು­ವುದಾಗಿ  ಸಿಂಗ್‌ ಹೇಳಿದ್ದಾರೆ.



ಅಧಿಕಾರಿಗಳು ರಾಜಕೀಯ ಸೇರದಂತೆ ಕಾನೂನು ರಚಿಸಿ

ನಿವೃತ್ತಿಯ ನಂತರ ಅಧಿಕಾರಿಗಳು ಒಂದು ನಿರ್ದಿಷ್ಟ ಅವಧಿಯ ವರೆಗೆ ಯಾವುದೇ ರಾಜ­ಕೀಯ ಪಕ್ಷಗಳಿಗೆ ಸೇರದಂತೆ ಕಾನೂನು ರಚಿಸಬೇಕು ಎಂದು ರಾಜಕೀಯ ಪಕ್ಷ­ಗಳು ಶನಿವಾರ ಆಗ್ರಹಿಸಿವೆ.

‘ನಿವೃತ್ತಿಯ ನಂತರ ಅಧಿಕಾರಿಗಳು ಹತ್ತು ವರ್ಷಗಳ ವರೆಗೆ ಯಾವುದೇ ರಾಜಕೀಯ ಪಕ್ಷ ಸೇರುವನ್ನು ನಿಷೇಧಿ­ಸಬೇಕು’ ಎಂದು ಸಮಾಜವಾದಿ ಪಕ್ಷ ಹೇಳಿದೆ.  ಆದರೆ ಭೂಸೇನೆ ನಿವೃತ್ತ ಮುಖ್ಯಸ್ಥ ವಿ.ಕೆ.­ಸಿಂಗ್‌ ಬಿಜೆಪಿ ಸೇರ್ಪ­ಡೆ­­ಯಾಗಿ­ರುವುದರಲ್ಲಿ ಏನೂ ವಿಶೇಷ ಇಲ್ಲ ಎಂದು ಕಾಂಗ್ರೆಸ್‌ ಹೇಳಿದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.