ಸಿಮೆಂಟ್ ಕಂಪೆನಿಗಳ ಮೇಲೆ ಸಿಸಿಐ ಗದಾಪ್ರಹಾರ

ನವದೆಹಲಿ (ಪಿಟಿಐ): ಎಸಿಸಿ,  ಅಂಬುಜಾ ಸಿಮೆಂಟ್ಸ್, ಜೈಪ್ರಕಾಶ್ ಅಸೋಸಿಯೇಟ್ಸ್ ಮತ್ತು ಆದಿತ್ಯ ಬಿರ್ಲಾ ಸಮೂಹದ ಅಲ್ಟ್ರಾಟೆಕ್ ಸೇರಿದಂತೆ ದೇಶದ 11 ಪ್ರಮುಖ ಸಿಮೆಂಟ್ ಕಂಪೆನಿಗಳ ವಿರುದ್ಧ ಮಾರುಕಟ್ಟೆ ಸ್ಪರ್ಧಾತ್ಮಕತೆ, ದರ ನಿಗದಿಯತ್ತ ನಿಗಾ ಇಡುವ  `ಕಾಂಪಿಟಿಷನ್ ಕಮಿಷನ್ ಅಫ್ ಇಂಡಿಯ~(ಸಿಸಿಐ), ಗುರುವಾರ ಭಾರಿ ಗದಾಪ್ರಹಾರ ಮಾಡಿದೆ.



ಭಾರಿ ಲಾಭ ತರುವ ಪ್ರಮಾಣದಲ್ಲಿ ದರ ನಿಗದಿಪಡಿಸಿಕೊಳ್ಳಲು ಕೂಟ ರಚಿಸಿಕೊಂಡು ನಿಯಮಗಳನ್ನು ಉಲ್ಲಂಘಿಸಿದ ಪ್ರಮುಖ ಬ್ರಾಂಡೆಡ್ ಸಿಮೆಂಟ್ ಕಂಪೆನಿಗಳಿಗೆ ರೂ 6307 ಕೋಟಿಯಷ್ಟು ಭಾರಿ ಮೊತ್ತದ ದಂಡ ವಿಧಿಸಿದೆ.



`ಕಾಂಪಿಟಿಷನ್ ಆ್ಯಕ್ಟ್-2002ರ~ ಅನ್ವಯ ಸ್ಪರ್ಧಾತ್ಮಕ ದರ ನಿಗದಿಪಡಿಸಬೇಕಿದ್ದ ಈ ಕಂಪೆನಿಗಳು ಎಲ್ಲ ನಿಯಮಗಳನ್ನೂ ಉಲ್ಲಂಘಿಸಿವೆ. 90 ದಿನದಲ್ಲಿ ದಂಡ ಪಾವತಿಸಬೇಕು ಎಂದು `ಸಿಸಿಐ~ ಆದೇಶದಲ್ಲಿ ಹೇಳಿದೆ.

ಗ್ರಾಹಕರಿಗೆ ಸ್ಪರ್ಧಾತ್ಮಕ ಬೆಲೆಯಲ್ಲಿ ಗುಣಮಟ್ಟದ ಉತ್ಪನ್ನ ದೊರಕುವಂತೆ ಮಾಡಲು ಹಾಗೂ ಉತ್ಪಾದನೆ, ಬೆಲೆ ನಿಗದಿ, ಮಾರಾಟ ಮತ್ತಿತರ ಅಂಶಗಳ ಮೇಲೆ ಹತೋಟಿ ಇಡಲು ಉತ್ಪಾದಕರು ಕೂಟ ರಚಿಸಿಕೊಳ್ಳುವುದನ್ನು ತಡೆಯಲೆಂದೇ `ಕಾಂಪಿಟಿಷನ್ ಆ್ಯಕ್ಟ್-2002~ ರಚಿಸಲಾಗಿದೆ.



`ಈ ಕಂಪೆನಿಗಳು ಕೂಟ ರಚಿಸಿಕೊಂಡು ಸಿಮೆಂಟ್ ತಯಾರಿಕೆಯನ್ನೇ ಕಡಿಮೆ ಮಾಡಿವೆ. ಆ ಮೂಲಕ ಮಾರುಕಟ್ಟೆಗೆ ಸಿಮೆಂಟ್ ಕಡಿಮೆ ಪೂರೈಕೆಯಾಗುವಂತೆ ಮಾಡಿ ದರ ಹೆಚ್ಚಳವಾಗುವಂತೆ ನೋಡಿಕೊಂಡಿವೆ~ ಎಂದು `ಸಿಸಿಐ~ ತನ್ನ 258 ಪುಟಗಳ ಆದೇಶದಲ್ಲಿ ನೇರವಾಗಿಯೇ ದೋಷಾರೋಪ ಮಾಡಿದೆ.



ಅಚ್ಚರಿ ಎಂದರೆ ಸಿಮೆಂಟ್ ಉದ್ಯಮದ ಪ್ರಾತಿನಿಧಿಕ ಸಂಸ್ಥೆಯಾದ `ಸಿಮೆಂಟ್ ಉತ್ಪಾದಕರ ಸಂಘ~ಕ್ಕೂ (ಸಿಎಂಎ) ದಂಡ ವಿಧಿಸಲಾಗಿದೆ. ಗ್ರಾಸಿಂ ಸಿಮೆಂಟ್ಸ್ (ಈಗ ಅಲ್ಟ್ರಾಟೆಕ್‌ನಲ್ಲಿ ವಿಲೀನವಾಗಿದೆ), ಲಾಫರ್ಜ್ ಇಂಡಿಯ, ಜೆಕೆ ಸಿಮೆಂಟ್, ಇಂಡಿಯ ಸಿಮೆಂಟ್ಸ್, ಮದ್ರಾಸ್ ಸಿಮೆಂಟ್ಸ್, ಸೆಂಚುರಿ ಸಿಮೆಂಟ್ಸ್, ಬಿನಾನಿ ಸಿಮೆಂಟ್ಸ್ `ಸಿಸಿಐ~ನಿಂದ ದಂಡನೆಗೆ ಒಳಗಾಗಿರುವ ಇತರೆ ಕಂಪೆನಿಗಳು.



ಈಗ ವಿಧಿಸಲಾಗಿರುವ ದಂಡವು ಈ ಸಿಮೆಂಟ್ ಕಂಪೆನಿಗಳು 2009-10 ಮತ್ತು 2010-11ನೇ ಹಣಕಾಸು ವರ್ಷದಲ್ಲಿ ಗಳಿಸಿದ ನಿವ್ವಳ ಲಾಭದ ಶೇ 50ರಷ್ಟು ಪ್ರಮಾಣದ ಮೊತ್ತವಾಗಿದೆ.



`ದಂಡದ ಮೊತ್ತವನ್ನು ಶೇ 300ರವರೆಗೂ ಹೆಚ್ಚಿಸಲು ಅವಕಾಶವಿದೆ~ ಎಂದು ಪ್ರಕರಣದ ತನಿಖಾ ಸಂಸ್ಥೆ ಹೇಳಿದೆ.



`ಬಿಲ್ಡರ್ಸ್ ಅಸೋಸಿಯೇಷನ್ ಅಫ್ ಇಂಡಿಯಾ~(ಬಿಎಐ) ಸಲ್ಲಿಸಿದ್ದ ದೂರಿನ ಮೇರೆಗೆ `ಸಿಸಿಐ~ ವಿಚಾರಣೆ ನಡೆಸಿ ದಂಡದ ಆದೇಶ ಹೊರಡಿಸಿದೆ. ಇದಕ್ಕೂ ಮುನ್ನ ತನಿಖಾ ಮಹಾ ನಿರ್ದೇಶನಾಲಯದ ಮೂಲಕ ತನಿಖೆಯನ್ನೂ ನಡೆಸಲಾಗಿತ್ತು. ತನಿಖೆ ವೇಳೆ ಈ 11 ಕಂಪೆನಿಗಳು ಯಾವ ಯಾವ ಅವಧಿಯಲ್ಲಿ ಎಷ್ಟೆಷ್ಟು ಸಿಮೆಂಟ್ ತಯಾರಿಸುತ್ತಿದ್ದವು, ಮಾರುಕಟ್ಟೆ ಬೇಡಿಕೆಯನ್ನು ಅನುಸರಿಸಿ ಹೇಗೆ ಪೂರೈಕೆ ಮಾಡುತ್ತಿದ್ದವು, ದರವನ್ನೂ ಹೇಗೆ ನಿಗದಿ ಮಾಡುತ್ತಿದ್ದವು ಎಂಬ ಅಂಶಗಳನ್ನೆಲ್ಲ ಪರಿಶೀಲಿಸಲಾಗಿದೆ.