ಹೆಣ್ಣು ಮತ್ತು ಬಳೆ

 ಬಳೆ ಎಂದರೆ ವೃತ್ತ ಗೋಳ

ಬದುಕಿನ ವರ್ತುಲದ ಹಾಗೆ

ಸ್ಥಿರ ಆಕಾರ - ಗುಂಡಗೆ

ಹೇಗೆ ಸುತ್ತಿದರೂ ಮುಖಾಮುಖಿ

ಚಿತ್ತಾರದ ಗಾಜಿನ ಬಳೆ ಸೂಕ್ಷ್ಮ

ಒಡೆದರೆ ಚೂರು ಚೂರು

ಸಂಬಂಧಗಳ ಹಾಗೆ

ಬಳೆ ಹೆಣ್ಣಿನ ಕೈಗಳಿಗೆ ಶೃಂಗಾರ

ಶೋಭಿಸುವ ಆಭರಣ

ಮುತ್ತೈದೆಯ ಸಂಕೇತ

ಗಂಡಿನ ಸಾಂಗತ್ಯದ ಮಹತ್ವಕೆ ರಸಿಕತೆಗೆ

ಅಂಕಿತವಾದರೆ ಹೆಣ್ಣಿಗೆ ಅಂಕೆ

ಬಳೆಗಳ ಗಲಗಲ ಶಬ್ದ ಅವಳ ಅಸ್ತಿತ್ವ

ಅವಳ ಚಲನೆ - ಇರುವಿಕೆಯ ಸಾಕ್ಷಿ

ಯಾಗಿತ್ತು ಅಂದು -

ಆದರೆ ಇಂದು -

ಬಳೆಯ ಆಕಾರ ಬದಲಾಗಿದೆ

ಚಚ್ಚೌಕ, ವಂಕಿ ಅಂಕುಡೊಂಕು

ಬರೀ ಗಾಜಿನ ಬಳೆಯಾಗಿ ಉಳಿದಿಲ್ಲ

ಲೋಹ, ಪ್ಲಾಸ್ಟಿಕ್ ರಬ್ಬರು ಬಳೆಗಳು

ಹಾಗೆಯೇ ಹೆಣ್ಣಿನ ಬದುಕೂ ಹಾಗೆ

ಬಿಚ್ಚಿಕೊಳ್ಳುತ್ತಿದೆ ವಿವಿಧ ಆಕಾರಗಳಲಿ

ವಿವಿಧ ವರ್ಣಗಳಲ್ಲಿ ವಿನ್ಯಾಸಗಳಲಿ

ಸ್ತರಗಳಲ್ಲಿ ಹೇಗೆಂದರೆ ಹಾಗೆ

- ಸೆಡ್ಡು ಹೊಡೆದಂತೆ

ಬಳೆ ತೊಡುವ ಕೈಗಳು ಅನ್ನುವ

ಹಗುರ ಮಾತಿಗೆ ಬೇಡಿಹಾಕಿದ್ದಾಳೆ

ಅದಕ್ಕೆ ಈಗ ಗಂಡಿನ ಕೈಗಳಲ್ಲೂ ಬಳೆ

ಸಮಾನತೆ ಅಂದರೆ ತಪ್ಪಾದೀತು

ಅವಳು ಎರಡೇ ಕೈಗಳಿಂದ

ಎಲ್ಲವನ್ನೂ ಗಳಿಸಿಕೊಂಡಿದ್ದಾಳೆ

ಬಳೆಗಳ ಶಬ್ದ ನಿಶ್ಶಬ್ದಗಳಲ್ಲಿ