ಗುರುವಾರ , ಫೆಬ್ರವರಿ 25, 2021
29 °C
ಮತದಾರರ ಚೀಟಿ, ಡಿಎಲ್‌, ಪ್ಯಾನ್‌ ಕಾರ್ಡ್ ನಕಲಿ ಶಂಕೆ

‘ನಂ 174/ಎ ಕಮಲಾನಗರ’ ವಿಳಾಸದ ಮಹಿಮೆ!

ಪ್ರಜಾವಾಣಿ ವಾರ್ತೆ/ ರವೀಂದ್ರ ಭಟ್ಟ Updated:

ಅಕ್ಷರ ಗಾತ್ರ : | |

‘ನಂ 174/ಎ ಕಮಲಾನಗರ’ ವಿಳಾಸದ ಮಹಿಮೆ!

ಬೆಂಗಳೂರು: ಕರ್ನಾಟಕ ಗೃಹ ಮಂಡಳಿಗೆ ‘ನಂ.174/ಎ, 1ನೇ ಮುಖ್ಯ ರಸ್ತೆ, ಕಮಲಾನಗರ ಬೆಂಗಳೂರು–79’ ಎಂಬ ವಿಳಾಸದ ಬಗ್ಗೆ ಅಪಾರ ಪ್ರೀತಿ. ಯಾಕೆಂದರೆ ಈ ವಿಳಾಸದ ಹಲವಾರು ಮಂದಿಗೆ ವಿವೇಚನಾ ಕೋಟಾದಲ್ಲಿ  ಅದು ನಿವೇಶನಗಳನ್ನು  ಮಂಜೂರು ಮಾಡಿದೆ.



ಈ ನಿವೇಶನಗಳನ್ನು ನೋಂದಣಿ ಮಾಡಿ­ಸುವಾಗ ವಿಳಾಸದ ದೃಢೀಕರ­ಣಕ್ಕೆ ಮತದಾರರ ಗುರುತಿನ ಚೀಟಿ, ಡಿಎಲ್‌, ಪ್ಯಾನ್‌ಕಾರ್ಡ್ ಹಾಜರು­ಪಡಿಸ­ಲಾಗಿದೆ. ಬೇರೆ ಬೇರೆ ಹೆಸರಿದ್ದರೂ ವಿಳಾಸ ಮಾತ್ರ ಒಂದೆ! ಅಂದರೆ ವಿಳಾಸದ ದಾಖಲೆಗಳೂ ನಕಲಿಯಾ­ಗಿರುವ ಶಂಕೆಯಿದೆ.



ವಿಳಾಸ ಒಂದೆ: ಈ ವಿಳಾಸದಲ್ಲಿರುವ ಎಚ್‌.ಆರ್‌.ದೇಸಾಯಿ ಅವರಿಗೆ ಕೆಂಗೇರಿ ಬಂಡೆಮಠ ಬಡಾವಣೆಯಲ್ಲಿ ಎಲ್‌ಐಜಿ ನಿವೇಶನ ಸಂಖ್ಯೆ 177ನ್ನು ಮಂಜೂರು ಮಾಡ­ಲಾಗಿದೆ. ಇದೇ ವಿಳಾಸದ­ಲ್ಲಿ­ರುವ ಕೆಂಪಶೆಟ್ಟಿ ಎನ್ನುವವರಿಗೆ ಸೂರ್ಯ­ನಗರದಲ್ಲಿ ನಿವೇಶನ ಸಂಖ್ಯೆ 193­ರನ್ನು ಮಂಜೂರು ಮಾಡಲಾಗಿದೆ.



ರಾಜಣ್ಣ ಅವರಿಗೆ ಸೂರ್ಯ­ನಗರ­ದಲ್ಲಿ­ರುವ ಎಂಐಜಿ ಮನೆ ನಂ. 291ನ್ನು ನೀಡಲಾಗಿದೆ. ಮೋಹನ್‌ ಎನ್ನುವವರಿಗೆ ಕೆಂಗೇರಿ ಬಂಡೇಮಠದ ಎಲ್‌ಐಜಿ ಮನೆ ನಂ 201ನ್ನು ಮಂಜೂರು ಮಾಡಲಾಗಿದೆ.



ಇದೇ ವಿಳಾಸವನ್ನು ಬಳಸಿಕೊಂಡು ಸೋಮಣ್ಣ ಎಂಬುವವರಿಗೆ ಸೂರ್ಯ­ನಗರದಲ್ಲಿ ಎಚ್‌ಐಜಿ ಮನೆ ನಂ 970ನ್ನು ಮಂಜೂರು ಮಾಡಲಾಗಿದೆ. ಈ ಮನೆಯನ್ನು ಬಸವನಗುಡಿ ಉಪ ನೋಂದಣಾಧಿಕಾರಿ ಕಚೇರಿಯಲ್ಲಿ ಗೃಹ ಮಂಡಳಿ ಎಇಇ ಅವರು 11–11–2013ರಂದು ನೋಂದಣಿಯನ್ನೂ ಮಾಡಿಕೊಟ್ಟಿದ್ದಾರೆ.



ಮನೆಯನ್ನು ಪಡೆಯಲು ಸೋಮಣ್ಣ ಅವರು ಕಾರ್ಪೋರೇಷನ್‌ ಬ್ಯಾಂಕ್‌­ನಿಂದ ಸಾಲವನ್ನೂ ಪಡೆದುಕೊಂಡಿ­ದ್ದಾರೆ. ಸೋಮಣ್ಣ ಅವರಿಗೆ ಇದೇ ವಿಳಾ­ಸದ ಮತದಾರರ ಗುರುತಿನ ಚೀಟಿಯೂ ಇದೆ. ಪ್ಯಾನ್‌ ಕಾರ್ಡ್ ಕೂಡ ಇದೆ.



ಈ ವಿಳಾಸದಲ್ಲಿಯೇ ಇದ್ದಾರೆ ಎನ್ನಲಾದ ರವಿ. ಎಚ್‌. ಅವರಿಗೆ ಸೂರ್ಯ­­ನಗರದ ನಿವೇಶನ ಸಂಖ್ಯೆ 1566 ಎಂಐಜಿ–2 ಮಂಜೂರಾಗಿದೆ. ಇದು 30–9–2013ರಂದು ಆನೆಕಲ್‌ ತಾಲ್ಲೂಕು ಅತ್ತಿಬೆಲೆ ಉಪ ನೋಂದ­ಣಾ­­ಧಿಕಾರಿ ಕಚೇರಿಯಲ್ಲಿ ನೋಂದಣಿ­ಯಾಗಿದೆ. ಇಲ್ಲಿಯೂ ವಿಳಾಸ ದೃಢೀಕ­ರಣವನ್ನು ಬಳಸಲಾಗಿದೆ.



ಬದಲಾದ ವಿಳಾಸ: ಗೃಹ ಮಂಡಳಿಯ ಆಯು­ಕ್ತರ ಪರವಾಗಿ ಮಂಡಳಿ ಅಧಿ­ಕಾರಿಗಳು  16–4–2013ರಂದು ಶಾಂತಿ, ವೈಫ್‌ ಆಫ್‌ ಸ್ವಾಮಿಗೌಡ, 66, ಮೊದಲ ಮಹಡಿ, ಮುಝಲ್‌ ಮಂಜಿಲ್‌, ಕರೆಕಲ್ಲು, ಬೆಂಗಳೂರು–79 ಅವರಿಗೆ ಪತ್ರ ಬರೆದು ವಸತಿ ಇಲಾಖೆ ಕಾರ್ಯದರ್ಶಿ ಆದೇಶದ ಮೇರೆಗೆ ಗೃಹ ಮಂಡಳಿಯ ವಿವೇಚನಾ ಕೋಟಾ­ದಲ್ಲಿ ತಮಗೆ ಸೂರ್ಯನಗರ ಒಂದನೇ ಹಂತದಲ್ಲಿ ಎಂಐಜಿ–2 ಸ್ವತ್ತಿನ ಸಂಖ್ಯೆ 925ನ್ನು ಮಂಜೂರು ಮಾಡಲಾಗಿದೆ ಎಂದು ತಿಳಿಸುತ್ತಾರೆ. ಇದರ ಬೆಲೆ ₨ 17,26,330. ಆರಂಭಿಕ ಠೇವಣಿ 71 ಸಾವಿರ ರೂಪಾಯಿ­ಯನ್ನು ಪಾವತಿ ಮಾಡು­ವಂತೆ ಸೂಚಿಸುತ್ತಾರೆ.



ಇದಾಗಿ ಕೆಲವೇ ದಿನಗಳಲ್ಲಿ ಅಂದರೆ 20–5–2013ರಂದು ಆಯುಕ್ತರ ಪರವಾಗಿ ಅಧಿಕಾರಿಗಳು ಶಾಂತಿ ಅವ­ರಿಗೆ ಮತ್ತೊಂದು ಪತ್ರ ಬರೆಯು­ತ್ತಾರೆ. ಈ ಪತ್ರ ಬರೆಯುವ ವೇಳೆಗೆ ಶಾಂತಿ ಅವರ ವಿಳಾಸ ಬದಲಾಗಿರುತ್ತದೆ.



ಈ ಪತ್ರದಲ್ಲಿ ಶಾಂತಿ ಅವರ ವಿಳಾಸ ನಂ 174/ಎ, ಮೊದಲ ಮುಖ್ಯ ರಸ್ತೆ, ಕಮಲಾನಗರ, ಬೆಂಗಳೂರು  ಎಂದು ಇದೆ. ಈ ಪತ್ರದಲ್ಲಿ ನಿವೇಶನದ ಸಂಖ್ಯೆ, ಜಾಗ ಎಲ್ಲವೂ ಮೊದಲ ಪತ್ರದಂತೆಯೇ ಇದೆ. ಆದರೆ ‘ಪೂರ್ಣ ಬೆಲೆ’ ಆಧಾರದ ಮೇಲೆ ನಿವೇಶನವನ್ನು ಮಂಜೂರು ಮಾಡಲಾಗಿದೆ ಎಂದು ಹೇಳಿ ₨ 4,14,083 ರಂತೆ ನಾಲ್ಕು ಕಂತಿನಲ್ಲಿ ಹಣ ನೀಡುವಂತೆ ಸೂಚಿಸಲಾಗಿದೆ.



ಇದಲ್ಲದೆ ಶಾಂತಿ ಅವರಿಗೆ ಬ್ಯಾಂಕ್‌­ನಿಂದ ಸಾಲ ಪಡೆಯಲು ಅನು­ಕೂಲ­­ವಾಗು­ವಂತೆ ಗೃಹ ಮಂಡಳಿ ಆಯು­ಕ್ತರು ನಿರಾಕ್ಷೇಪಣಾ ಪತ್ರ­ವೊಂ­ದನ್ನೂ ನೀಡಿ­ದ್ದಾರೆ. ಅದರಲ್ಲಿಯೂ 174/ಎ ಕಮಲಾ­ನಗರದ ವಿಳಾಸವೇ ಇದೆ. ಶಾಂತಿ ಅವರು ನೋಟರಿ ಅವರ ಮುಂದೆ ಪ್ರಮಾಣ ಮಾಡಿ ತಾವು ಇದೇ ವಿಳಾಸದಲ್ಲಿ ಇರುವುದಾಗಿ ಹೇಳಿದ್ದಾರೆ. ಈ ಪ್ರಮಾಣ ಪತ್ರವನ್ನೂ ಗೃಹ ಮಂಡಳಿಗೆ ಸಲ್ಲಿಸಲಾಗಿದೆ.



ಇನ್ನೊಂದು ವಿಳಾಸ:  ಒಂದೇ ವಿಳಾಸದ ವ್ಯಕ್ತಿ­ಗ­ಳಿಗೆ ಮನೆ ಅಥವಾ ನಿವೇಶನವನ್ನು ಹಂಚಿದ್ದು ಇದೊಂದು ನಿದರ್ಶನ ಅಲ್ಲ. ‘ನಂ.233, ಮೊದಲನೇ ಜಿ ಅಡ್ಡ ರಸ್ತೆ, 3ನೇ ಹಂತ, 4ನೇ ಬ್ಲಾಕ್‌, ಬಸವೇಶ್ವ­ರ­ನಗರ’ ಈ ವಿಳಾಸದ ಹಲವರಿಗೆ ನಿವೇಶ­ನವನ್ನು ಮಂಜೂರು ಮಾಡಲಾಗಿದೆ.



ಈ ವಿಳಾಸದಲ್ಲಿರುವ ಸಿದ್ದೇಗೌಡ ಎನ್ನುವವರಿಗೆ ಸೂರ್ಯನಗರದ ಎಚ್‌ಐಜಿ ನಿವೇಶನ ಸಂಖ್ಯೆ 360ನ್ನು ಮಂಜೂರು ಮಾಡಲಾಗಿದೆ. ಗೃಹ ಮಂಡಳಿ ಆಯುಕ್ತರ ಪರವಾಗಿ ಅಧಿ­ಕಾರಿ­ಗಳು 27–6–2012ರಂದು ಸಿದ್ದೇ­ಗೌಡ ಅವರಿಗೆ ಪತ್ರ ಬರೆದು ಮಂಜೂ­ರಾತಿಯ ವಿಷಯ ತಿಳಿಸಿದ್ದಾರೆ.



ಈ ನಿವೇಶನದ ಬೆಲೆ ₨ 27, 12, 528. ಈ ಹಣವನ್ನು ₨6,65,644ರಂತೆ ನಾಲ್ಕು ಕಂತಿನಲ್ಲಿ ನೀಡಲು ತಿಳಿಸಲಾಗಿದೆ. ಇವರಿಗೂ ಕೂಡ ಬ್ಯಾಂಕ್‌ಗಳಿಂದ ಸಾಲ ಪಡೆಯಲು ಆಯುಕ್ತರು ನಿರಾ­ಕ್ಷೇ­ಪಣಾ ಪತ್ರ ನೀಡಿದ್ದಾರೆ. ಸಿದ್ದೇಗೌಡ ಈ ವಿಳಾಸ­ದಲ್ಲಿಯೇ ಇದ್ದಾರೆ ಎನ್ನುವು­ದಕ್ಕೆ ಮತ­ದಾರರ ಗುರುತಿನ ಚೀಟಿಯೂ ಇದೆ.



ಇದೇ ವಿಳಾಸದಲ್ಲಿರುವ ಮಹದೇವ ಎನ್ನುವ­ವರಿಗೂ ಸೂರ್ಯನಗರದ ಎಚ್‌ಐಜಿ ನಿವೇಶನ ಸಂಖ್ಯೆ 969ನ್ನು ಮಂಜೂರು ಮಾಡಲಾಗಿದೆ. ಈ ನಿವೇಶನ ಬಸವನಗುಡಿ ಉಪ ನೋಂದ­ಣಾ­ಧಿಕಾರಿಗಳ ಕಚೇರಿಯಲ್ಲಿ 11–11–2013ರಂದು ನೋಂದಣಿಯೂ ಆಗಿದೆ. ಮಹದೇವ ಈ ವಿಳಾಸ­ದಲ್ಲಿಯೇ ಇದ್ದಾರೆ ಎನ್ನುವುದಕ್ಕೆ ಮತ­ದಾರರ ಗುರುತಿನ ಚೀಟಿಯನ್ನೂ ನೀಡಲಾಗಿದೆ.



ಹೀಗೆ ಒಂದೇ ವಿಳಾಸದ ಮತದಾರರ ಚೀಟಿ, ಡಿಎಲ್‌, ಪ್ಯಾನ್‌ ಕಾರ್ಡ್ ಗಳನ್ನು ನೀಡಿ ನಿವೇಶನಗಳನ್ನು ನೋಂದಣಿ ಮಾಡಿ­ಸಲಾಗಿದೆ. ಗೃಹ ಮಂಡಳಿ ಒಂದೇ ವಿಳಾಸದಲ್ಲಿರುವ ಹಲವರಿಗೆ ಮಂಜೂರು ಮಾಡಿದೆ. ಇಂತಹ ಚಮ­ತ್ಕಾರ ನಡೆದಿದ್ದು ಹೇಗೆ?

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.