ಬಜೆಟ್‌ 2026: ಗಮನಿಸಬಹುದಾದ ಪ್ರಮುಖ 10 ಅಂಶಗಳಿವು

ನವದೆಹಲಿ: ಕೇಂದ್ರಬಜೆಟ್ 2026–27 ಮಂಡಿಸಲು ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ರಾಷ್ಟ್ರಪತಿ ಅವರ ಅನುಮತಿ ಕೋರಿ ಸಂಸತ್ ಭವನದತ್ತ ಹೊರಟಿದ್ದಾರೆ.

. ಈ ವರ್ಷದ ಬಜೆಟ್ನಲ್ಲಿ ಒಟ್ಟು ಸರ್ಕಾರಿ ಸಾಲವನ್ನು ದೇಶೀಯ ಉತ್ಪನ್ನದ ಶೇ 49ರಿಂದ ಶೇ 51ರ ವ್ಯಾಪ್ತಿಗೆ ಇಳಿಸುವತ್ತ ಗಮನ ಹರಿಸುವ ನಿರೀಕ್ಷೆ ಇದೆ ಎಂದೆನ್ನುತ್ತಾರೆ ತಜ್ಞರು. 2026–27ರಲ್ಲಿ ಸರ್ಕಾರವು ಜಿಡಿಪಿಯ ವಿತ್ತೀಯ ಕೊರತೆಯನ್ನು ಶೇ 4.2ರಷ್ಟು ಏರುವ ನಿರೀಕ್ಷೆ ಇದೆ. ಸಾಲವು ₹16 ಟ್ರಿಲಿಯನ್ನಿಂದ ₹16.8 ಟ್ರಿಲಿಯನ್ಗೆ ಹೆಚ್ಚಳವಾಗುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ.

. ದೀರ್ಘಾವದಿ ಬಂಡವಾಳ ಲಾಭಗಳ ಮೇಲೆ ವಿಧಿಸಲಾಗುವ ತೆರಿಗೆಯ ಮಿತಿಯಲ್ಲಿ ಹೆಚ್ಚಳ ಮತ್ತು ಆದಾಯ ತೆರಿಗೆ ರಿಯಾಯಿತಿ ನಿರ್ವಹಿಸುವ ಸೆಕ್ಷನ್ 87ಎ ಅಡಿಯಲ್ಲಿ ರಿಯಾಯಿತಿ ವಿಸ್ತರಣೆಯ ನಿರೀಕ್ಷೆ ಇದೆ.

₹12ಲಕ್ಷವರೆಗೂ ಒಟ್ಟು ತೆರಿಗೆ ವಿಧಿಸಬಹುದಾದ ಆದಾಯ ಹೊಂದಿರುವ ವ್ಯಕ್ತಿಗಳು ₹60ಸಾವಿರವರೆಗೂ ತೆರಿಗೆ ರಿಯಾಯಿತಿ ಪಡೆಯಬಹುದು. ಆದರೆ ಮ್ಯೂಚುವಲ್ ಫಂಡ್ನಲ್ಲಿ ಹೂಡಿಕೆ ಮಾಡಿದರೆ ಬಂಡವಾಳ ಲಾಭ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ. ಈ ನಿಟ್ಟಿನಲ್ಲಿ ಏನೆಲ್ಲಾ ಘೋಷಣೆಯಾಗಲಿದೆ ಎಂಬುದನ್ನು ನಿರೀಕ್ಷಿಸಬಹುದು

. ಬಜೆಟ್ನ ಒಟ್ಟು ವೆಚ್ಚದ ಶೇ 20ರಷ್ಟು ರಕ್ಷಣಾ ಇಲಾಖೆಗೆ ಸೇರುತ್ತದೆ. ಇದರಲ್ಲಿ ದೇಶೀಯ ಹೂಡಿಕೆಗೆ ಇರುವ ಷರತ್ತುಗಳನ್ನು ಬಜೆಟ್ ಇನ್ನಷ್ಟು ಸಡಿಲಗೊಳಿಸುವುದೇ ಎಂಬ ನಿರೀಕ್ಷೆ ಇದೆ.

. ಹೊಸ ತೆರಿಗೆ ಪದ್ಧತಿಯಲ್ಲಿ ಹಾಲಿ ಇರುವ ₹75 ಸಾವಿರ ಸ್ಟ್ಯಾಂಡರ್ಡ್ ಡಿಡಕ್ಷನ್ ₹1ಲಕ್ಷಕ್ಕೆ ಏರಿಕೆಯಾಗಲಿದೆ ಎಂಬ ನಿರೀಕ್ಷೆಗಳಿವೆ.

. ದೇಶೀಯ ಉತ್ಪಾದನೆಯನ್ನು ಹೆಚ್ಚಿಸಲು ಎಲೆಕ್ಟ್ರಾನಿಕ್ ಬಿಡಿಭಾಗಗಳು ಮತ್ತು ಜವಳಿ ಸೇರಿದಂತೆ ಹಲವಾರು ರಫ್ತು-ಆಧಾರಿತ ಕೈಗಾರಿಕೆಗಳಿಗೆ ಸಂಬಂಧಿತ ಒಳಹರಿವಿನ ಮೇಲಿನ ಆಮದು ಸುಂಕಗಳನ್ನು ಕಡಿಮೆ ಮಾಡಬೇಕೆಂದು ಭಾರತೀಯ ರಫ್ತು ಸಂಸ್ಥೆಗಳ ಒಕ್ಕೂಟವು ಬೇಡಿಕೆ ಇಟ್ಟಿದೆ.

ಅಮೆರಿಕ ಪ್ರವೇಶಿಸುವ ಭಾರತೀಯ ಸರಕುಗಳ ಮೇಲೆ ಈಗಾಗಲೇ ಶೇ 50ರಷ್ಟು ಸುಂಕವನ್ನು ಡೊನಾಲ್ಡ್ ಟ್ರಂಪ್ ಹೇರಿದ್ದಾರೆ. ಈ ಒತ್ತಡವನ್ನು ಎದುರಿಸಲು ದೇಶೀಯ ರಫ್ತುದಾರರು ಬಜೆಟ್ ಮೇಲೆ ನಿರೀಕ್ಷೆ ಇಟ್ಟಿದ್ದಾರೆ.

. ಬಂಡವಾಳ ಹೂಡುವ ಖಾಸಗಿಯವರಿಗೆ ತೆರಿಗೆ ವಿನಾಯಿತಿ ಮತ್ತು ಉದ್ಯಮ ಆರಂಭಿಸಲು ಇನ್ನಷ್ಟು ಸರಳ ಮಾರ್ಗಗಳ ಘೋಷಣೆ ಆಗುವುದೇ ಎಂಬ ಕುತೂಹಲವಿದೆ. ಖಾಸಗಿ ವಲಯದ ಹೂಡಿಕೆಯ ಹೆಚ್ಚಳದ ಮೂಲಕ ಭಾರತೀಯ ಆರ್ಥಿಕತೆಯ ಬೆಳವಣಿಗೆಗೆ ಅನುಕೂಲಕರ ವಾತಾವರಣವನ್ನು ರೂಪಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

. ತೆರಿಗೆ ಕಡಿತದ ಮೂಲಕ ಸರ್ಕಾರವು ಆರ್ಥಿಕತೆಯನ್ನು ಹೆಚ್ಚಿಸಲು ಯತ್ನಿಸಬಹುದು ಮತ್ತು ವ್ಯವಹಾರ ಕೈಗೊಳ್ಳಲು ಸರಳ ಮಾರ್ಗಗಳನ್ನು ನೀಡುವುದೇ ಎಂದು ಎದುರು ನೋಡಲಾಗುತ್ತಿದೆ.

. 2026-27ರ ಬಂಡವಾಳ ವೆಚ್ಚದಲ್ಲೂ ಹೆಚ್ಚಳ ಸಾಧ್ಯತೆ ಇದೆ. 2021ರಿಂದ 2026ರವರೆಗಿನ ದತ್ತಾಂಶವನ್ನು ಗಮನಿಸಿದರೆ ಮೂಲಸೌಕರ್ಯಕ್ಕಾಗಿ ಮಾಡಿದ ಖರ್ಚು ಹಾಗೂ ಪ್ರಯತ್ನಗಳ ಫಲವಾಗಿ ಜಿಡಿಪಿಯಲ್ಲಿ ಬಂಡವಾಳ ವೆಚ್ಚದ ಪಾಲು ಶೇ 2.5ರಿಂದ ಶೇ 3.1ಕ್ಕೆ ಏರಿತು. ಈ ಬಾರಿಯೂ ಇದರ ನಿರೀಕ್ಷೆ ಇದೆ.

. ಷೇರು ವಹಿವಾಟಿನಲ್ಲಿ ನಷ್ಟ ಉಂಟಾದರೂ ಅದು ತೆರಿಗೆ ವ್ಯಾಪ್ತಿಗೆ ಒಳಪಡುತ್ತಿತ್ತು. ಅದನ್ನು ರದ್ದುಪಡಿಸುವಂತೆ ತೆರಿಗೆ ತಜ್ಞರು ಆಗ್ರಹಿಸಿದ್ದಾರೆ. ಇದನ್ನು ಹೂಡಿಕೆದಾರರ ಸ್ನೇಹಿಯಾಗಿಸುತ್ತಾರೆಯೇ ವಿತ್ತ ಸಚಿವೆ ಎಂದು ಕಾದುನೋಡುತ್ತಿದ್ದಾರೆ ಜನ.