ನವದೆಹಲಿ: ‘ಬ್ರಿಟಿಷರೇ ಭಾರತ ಬಿಟ್ಟು ತೊಲಗಿ’ ಚಳವಳಿಗೆ 78 ವರ್ಷಗಳು ಆಗಿರುವ ಸಂದರ್ಭದಲ್ಲಿ, ಚೀನಾದ ಉತ್ಪನ್ನಗಳನ್ನು ಬಹಿಷ್ಕರಿಸುವ ಉದ್ದೇಶದಿಂದ ಅಖಿಲ ಭಾರತ ವರ್ತಕರ ಒಕ್ಕೂಟವು (ಸಿಎಐಟಿ) ಭಾನುವಾರ ‘ಚೀನಾ, ಭಾರತದಿಂದ ತೊಲಗಲಿ’ ಎನ್ನುವ ಚಳವಳಿಗೆ ಚಾಲನೆ ನೀಡಿದೆ.
ಒಕ್ಕೂಟದ ಸದಸ್ಯರು ದೇಶದ 600 ಕಡೆಗಳಲ್ಲಿ ಭಾನುವಾರ ಪ್ರತಿಭಟನೆ ನಡೆಸಿದರು. ಚೀನಾದಿಂದ ಆಮದಾಗುವ ವಸ್ತುಗಳ ಪ್ರಮಾಣ ಕಡಿಮೆ ಮಾಡುವ ಹಾಗೂ ಭಾರತದಲ್ಲಿ ಚೀನಾದ ಪ್ರಭಾವವನ್ನು ತಗ್ಗಿಸುವ ತುರ್ತು ಅಗತ್ಯ ಎದುರಾಗಿದೆ ಎಂದು ಒಕ್ಕೂಟ ಹೇಳಿದೆ.
‘ಚೀನಾದ ಹಲವು ಕಂಪನಿಗಳು ಭಾರತದ ನವೋದ್ಯಮಗಳಲ್ಲಿ ಗಣನೀಯ ಹೂಡಿಕೆ ಮಾಡಿವೆ. ಚೀನಾದ ಹೂಡಿಕೆದಾರರನ್ನು ಹೊರಗೆ ಇರಿಸುವಂತೆ ಈ ನವೋದ್ಯಮಗಳಿಗೆ ಸೂಚಿಸಬೇಕು. ಇವುಗಳಲ್ಲಿ ಭಾರತೀಯರೇ ಹೂಡಿಕೆ ಮಾಡುವಂತೆ ಆಗಲು ಆಕರ್ಷಕ ನೀತಿಯನ್ನು ಸರ್ಕಾರ ಘೋಷಿಸಬೇಕು’ ಎಂದು ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಪ್ರವೀಣ್ ಖಂಡೇಲ್ವಾಲ್ ಒತ್ತಾಯಿಸಿದ್ದಾರೆ.
