ಮುಂಬೈ: ಕೋವಿಡ್‌–19 ಸಾಂಕ್ರಾಮಿಕದ ಬಿಕ್ಕಟ್ಟಿನ ನಡುವೆಯೂ ಕಂಪನಿಗಳು 2020ರಲ್ಲಿ ಷೇರುಮಾರುಕಟ್ಟೆಯಿಂದ ದಾಖಲೆ ಪ್ರಮಾಣದಲ್ಲಿ ಬಂಡವಾಳ ಸಂಗ್ರಹಿಸಿವೆ.
‘ಐಪಿಒ, ಒಎಸ್‌ಎಸ್‌ ಮತ್ತು ಇತರೆ ಮಾರ್ಗಗಳ ಮೂಲಕ ಷೇರುಗಳನ್ನು ಮಾರಾಟ ಮಾಡಿ ₹1.78 ಲಕ್ಷ ಕೋಟಿ ಬಂಡವಾಳ ಸಂಗ್ರಹ ಮಾಡಿವೆ. 2019ರಲ್ಲಿ ₹ 82,241 ಕೋಟಿ ಸಂಗ್ರಹ ಆಗಿತ್ತು. ಇದಕ್ಕೆ ಹೋಲಿಸಿದರೆ 2020ರಲ್ಲಿ ಆಗಿರುವ ಬಂಡವಾಳ ಸಂಗ್ರಹದ ಪ್ರಮಾಣ ಶೇ 116ರಷ್ಟಾಗಿದೆ’ ಎಂದು ಪ್ರೈಮ್‌ ಡೇಟಾಬೇಸ್‌ನ ವ್ಯವಸ್ಥಾಪಕ ನಿರ್ದೇಶಕ ಪ್ರಣವ್‌ ಹಲ್ದಿಯಾ ಮಾಹಿತಿ ನೀಡಿದ್ದಾರೆ.
ಬಾಂಡ್‌ ನೀಡಿಕೆ ಮೂಲಕ ಸಂಗ್ರಹಿಸಿರುವ ₹ 7,485 ಕೋಟಿಯನ್ನೂ ಸೇರಿಸಿದರೆ ಒಟ್ಟಾರೆ ಬಂಡವಾಳ ಸಂಗ್ರಹ ₹ 1.84 ಲಕ್ಷ ಕೋಟಿಗಳಿಗೆ ತಲುಪಲಿದೆ. ಈ ಹಿಂದೆ 2017ರಲ್ಲಿ ಕಂಪನಿಗಳು ಷೇರುಗಳನ್ನು ಮಾರಾಟ ಮಾಡುವ ಮೂಲಕ ₹ 1.60 ಲಕ್ಷ ಕೋಟಿಗಳಷ್ಟು ಮೊತ್ತ ಸಂಗ್ರಹಿಸಿದ್ದವು.
‘ಐಪಿಒದಲ್ಲಿ ರಿಟೇಲ್‌ ಹೂಡಿಕೆದಾರರ ಭಾಗವಹಿಸುವಿಕೆ ಹೆಚ್ಚಾಗಿದೆ. ಕ್ಯುಐಪಿ ಮತ್ತು ರಿಯಲ್‌ ಎಸ್ಟೇಟ್‌ ಇನ್‌ವೆಸ್ಟ್‌ಮೆಂಟ್‌ ಟ್ರಸ್ಟ್‌ಗಳ ಮೂಲಕ ಅಧಿಕ ಮೊತ್ತ ಸಂಗ್ರಹವಾಗಿದೆ. ಈ ಕಾರಣಗಳಿಂದಾಗಿಯೇ ಒಟ್ಟಾರೆಯಾಗಿ ಬಂಡವಾಳ ಸಂಗ್ರಹ ಗರಿಷ್ಠ ಮಟ್ಟಕ್ಕೆ ತಲುಪಿದೆ’ ಎಂದು ಅವರು ತಿಳಿಸಿದ್ದಾರೆ.
2020ರಲ್ಲಿ ಪ್ರಮುಖ 15 ಐಪಿಒಗಳ ₹ 26,611 ಕೋಟಿ ಸಂಗ್ರಹಿಸಿವೆ. 2019ರಲ್ಲಿ 16 ಐಪಿಒಗಳು ₹ 12,362 ಕೋಟಿ ಸಂಗ್ರಹಿಸಿದ್ದವು ಇದಕ್ಕೆ ಹೋಲಿಸಿದರೆ ಶೇ 115ರಷ್ಟು ಏರಿಕೆ ಕಂಡಿದೆ.2020ರಲ್ಲಿ ಎಸ್‌ಬಿಐ ಕಾರ್ಡ್‌ ಅತಿದೊಡ್ಡ ಐಪಿಒ ಆಗಿದ್ದು, ₹ 10,341 ಕೋಟಿ ಸಂಗ್ರಹವಾಗಿದೆ.
2017ರಲ್ಲಿ 24 ಐಪಿಒಗಳ ಮೂಲಕ ₹ 30,959 ಕೋಟಿ ಹಾಗೂ 2016ರಲ್ಲಿ 36 ಐಪಿಒಗಳ ಮೂಲಕ ₹ 67,147 ಕೋಟಿ ಸಂಗ್ರಹ ಆಗಿತ್ತು.
