ನವದೆಹಲಿ: ತಯಾರಿಕಾ ವಲಯದ ಉದ್ದಿಮೆಗಳು ಕೆಲಸ ಮಾಡಲು ಬಯಸುವ ರಾಷ್ಟ್ರಗಳ ಸಾಲಿನಲ್ಲಿ ಭಾರತವು ವಿಶ್ವಮಟ್ಟದಲ್ಲಿ ಎರಡನೆಯ ಸ್ಥಾನ ಪಡೆದುಕೊಂಡಿದೆ. ಇದುವರೆಗೆ ಅಮೆರಿಕವು ಈ ಸ್ಥಾನದಲ್ಲಿ ಇತ್ತು. ಚೀನಾ ದೇಶವು ಮೊದಲ ಸ್ಥಾನವನ್ನು ಉಳಿಸಿಕೊಂಡಿದೆ.
ರಿಯಲ್ ಎಸ್ಟೇಟ್‌ ಕನ್ಸಲ್ಟೆಂಟ್ ಸಂಸ್ಥೆ ‘ಕುಶ್‌ಮನ್‌ ಆ್ಯಂಡ್‌ ವೇಕ್‌ಫೀಲ್ಡ್‌’ ಈ ಪಟ್ಟಿಯನ್ನು ಸಿದ್ಧಪಡಿಸಿದೆ. ಯುರೋಪ್‌, ಉತ್ತರ ಮತ್ತು ದಕ್ಷಿಣ ಅಮೆರಿಕ, ಏಷ್ಯಾ–ಪೆಸಿಫಿಕ್ ಪ್ರದೇಶದ 47 ದೇಶಗಳನ್ನು ಸಂಸ್ಥೆಯು ಪರಿಗಣಿಸಿದೆ.
ಅಮೆರಿಕವು ಈಗ ಮೂರನೆಯ ಸ್ಥಾನಕ್ಕೆ ಇಳಿಕೆ ಕಂಡಿದೆ. ಕೆನಡಾ, ಜೆಕ್ ಗಣರಾಜ್ಯ, ಇಂಡೊನೇಷ್ಯಾ, ಲಿಥುವೇನಿಯಾ, ಥೈಲ್ಯಾಂಡ್, ಮಲೇಷ್ಯಾ ಮತ್ತು ಪೋಲೆಂಡ್ ದೇಶಗಳು ಅಮೆರಿಕದ ನಂತರದ ಸ್ಥಾನಗಳಲ್ಲಿ ಇವೆ.
ತಯಾರಿಕಾ ವಲಯದ ಉದ್ದಿಮೆಗಳು ಭಾರತದ ಬಗ್ಗೆ ಹೆಚ್ಚೆಚ್ಚು ಆಸಕ್ತಿ ತೋರಿಸುತ್ತಿರುವುದನ್ನು ಇದು ಸೂಚಿಸುತ್ತದೆ ಎಂದು ಸಂಸ್ಥೆಯು ಹೇಳಿದೆ.
