ನವದೆಹಲಿ: ಹೂಡಿಕೆದಾರರಿಂದ ₹ 110 ಕೋಟಿ ಬಂಡವಾಳ ಸಂಗ್ರಹಿಸಿರುವುದಾಗಿ ವಿಡಿಯೊ ಎಡಿಟಿಂಗ್ (ಸಂಪಾದನೆ) ವೇದಿಕೆಯಾಗಿರುವ ಇನ್ವಿಡಿಯೊ (InVideo) ಕಂಪನಿ ಮಂಗಳವಾರ ಹೇಳಿಕೊಂಡಿದೆ.
ಸೀಕ್ವಿಯಾ ಕ್ಯಾಪಿಟಲ್ ಇಂಡಿಯಾ, ಟೈಗರ್ ಗ್ಲೋಬಲ್, ಹಮ್ಮಿಂಗ್ಬರ್ಡ್, ಆರ್ಟಿಪಿ ಗ್ಲೋಬಲ್ ಮತ್ತು ಬೇಸ್ ಕಂಪನಿಗಳು ಮೊದಲ ಹಂತದಲ್ಲಿ ಹೂಡಿಕೆ ಮಾಡಿವೆ ಎಂದು ಇನ್ವಿಡಿಯೊ ತಿಳಿಸಿದೆ.
ವಿಶ್ವದರ್ಜೆಯ ತಾಂತ್ರಿಕ ಪರಿಹಾರಗಳನ್ನು ಒದಗಿಸಲು, ವ್ಯಕ್ತಿಗಳಿಗೆ ಹಾಗೂ ಉದ್ದಿಮೆಗಳಿಗೆ ಅಗತ್ಯಕ್ಕೆ ತಕ್ಕಂತೆ ವಿಡಿಯೊ ಸೃಷ್ಟಿಗೆ ನೆರವಾಗಲು ಈ ಬಂಡವಾಳ ಬಳಸಿಕೊಳ್ಳಲಾಗುವುದು ಎಂದು ಇನ್ವಿಡಿಯೊ ಸಹ ಸ್ಥಾಪಕ ಸಂಕೇತ್ ಶಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
2019ರ ಏಪ್ರಿಲ್ನಲ್ಲಿ ಬಿಡುಗಡೆ ಆಗಿದ್ದು, ಇಲ್ಲಿಯವರೆಗೆ 150 ದೇಶಗಳಲ್ಲಿ 8 ಲಕ್ಷಕ್ಕೂ ಅಧಿಕ ಬಳಕೆದಾರರನ್ನು ಹೊಂದಿರುವುದಾಗಿ ಅದು ಹೇಳಿಕೊಂಡಿದೆ. 75ಕ್ಕೂ ಹೆಚ್ಚಿನ ಭಾಷೆಗಳಲ್ಲಿ ವಿಡಿಯೊ ಸೃಷ್ಟಿಯಾಗಿದೆ ಎಂದೂ ಕಂಪನಿ ತಿಳಿಸಿದೆ.