ಜೂನ್‌ ತಿಂಗಳಲ್ಲಿ ಜಿಗಿದ ವಾಹನ ಮಾರಾಟ

ಒಟ್ಟಾರೆ ಮಾರಾಟವು ಮೇ ತಿಂಗಳಿಗೆ ಹೋಲಿಸಿದರೆ ಜೂನ್‌ನಲ್ಲಿ ಮೂರು ಪಟ್ಟು ಹೆಚ್ಚಾಗಿದೆ ಎಂದು ಮಾರುತಿ ಸುಜುಕಿ ಇಂಡಿಯಾ ಕಂಪನಿ ತಿಳಿಸಿದೆ. ಮೇನಲ್ಲಿ 46,555 ವಾಹನಗಳು ಮಾರಾಟ ಆಗಿದ್ದವು. ಜೂನ್‌ನಲ್ಲಿ ಇದು 1.47 ಲಕ್ಷಕ್ಕೆ ಏರಿಕೆ ಆಗಿದೆ.

ಟಾಟಾ ಮೋಟರ್ಸ್‌ ಕಂಪನಿಯ ದೇಶಿ ಮಾರಾಟವು ಶೇ 78ರಷ್ಟು ಹೆಚ್ಚಾಗಿದ್ದು, 43,704ಕ್ಕೆ ವಾಹನಗಳನ್ನು ಕಂಪನಿ ಮಾರಾಟ ಮಾಡಿದೆ. ಹುಂಡೈ ಮೋಟರ್‌ ಇಂಡಿಯಾದ ವಾಹನಗಳ ಮಾರಾಟವು ಮೇ ತಿಂಗಳಿಗೆ ಹೋಲಿಸಿದರೆ ಜೂನ್‌ನಲ್ಲಿ ಶೇ 77ರಷ್ಟು ಹೆಚ್ಚಾಗಿದ್ದು, 54,474ಕ್ಕೆ ತಲುಪಿದೆ.

ಹೋಂಡಾ ಕಾರ್ಸ್‌ನ ದೇಶಿ ಸಗಟು ಮಾರಾಟವು 2,032ರಿಂದ 4,767ಕ್ಕೆ ಏರಿಕೆ ಕಂಡಿದೆ. ಟೊಯೊಟಾ ಕಂಪನಿಯು 8,801 ವಾಹನಗಳನ್ನು ಮಾರಾಟ ಮಾಡಿದ್ದು, ಮೇನಲ್ಲಿ ಆಗಿದ್ದ ಮಾರಾಟಕ್ಕೆ ಹೋಲಿಸಿದರೆ 13 ಪಟ್ಟು ಹೆಚ್ಚಾಗಿದೆ ಎಂದು ಹೇಳಿದೆ.

ಮಹೀಂದ್ರ ಆ್ಯಂಡ್‌ ಮಹೀಂದ್ರ ಕಂಪನಿಯ ಒಟ್ಟಾರೆ ವಾಹನ ಮಾರಾಟವು 17,447ರಿಂದ 32,964ಕ್ಕೆ ಏರಿಕೆ ಆಗಿದೆ. ಕಿಯಾ ಮೋಟರ್ಸ್ ಕಂಪನಿಯ ವಾಹನ ಮಾರಾಟ ಶೇ 36ರಷ್ಟು ಹೆಚ್ಚಾಗಿದ್ದು 15,015ಕ್ಕೆ ತಲುಪಿದೆ.

ದ್ವಿಚಕ್ರ ವಾಹನ ವಿಭಾಗದಲ್ಲಿ ಟಿವಿಎಸ್‌ ಮೋಟರ್‌ ಕಂಪನಿಯು 2.51 ಲಕ್ಷ ವಾಹನಗಳನ್ನು ಮಾರಾಟ ಮಾಡಿದ್ದು, ಮೇ ತಿಂಗಳಿಗೆ ಹೋಲಿಸಿದರೆ ಶೇ 51ರಷ್ಟು ಏರಿಕೆ ಕಂಡಿದೆ ಎಂದು ತಿಳಿಸಿದೆ.

ರಾಯಲ್‌ ಎನ್‌ಫೀಲ್ಡ್‌ ಕಂಪನಿಯ ಮಾರಾಟವು 27,294ರಿಂದ 43,048ಕ್ಕೆ ಏರಿಕೆ ಆಗಿದೆ. ಬಜಾಜ್‌ ಆಟೊ ಕಂಪನಿಯ ಒಟ್ಟಾರೆ ಮಾರಾಟ ಶೇ 24ರಷ್ಟು ಹೆಚ್ಚಾಗಿದೆ.