ನವದೆಹಲಿ: ಭಾರತೀಯ ಜೀವ ವಿಮಾ ನಿಗಮವು (ಎಲ್ಐಸಿ) ಅದಾನಿ ಸಮೂಹದ ಏಳು ಕಂಪನಿಗಳಲ್ಲಿ ಮಾಡಿರುವ ಹೂಡಿಕೆಯ ಮೌಲ್ಯವು ಈಗ ₹ 44 ಸಾವಿರ ಕೋಟಿಗಿಂತ ಹೆಚ್ಚಾಗಿದೆ.
ಹಿಂಡನ್ಬರ್ಗ್ ರಿಸರ್ಚ್ ಸಂಸ್ಥೆಯು ಅದಾನಿ ಸಮೂಹದ ವಿರುದ್ಧ ಕೆಲವು ಆರೋಪಗಳನ್ನು ಹೊರಿಸಿದ ನಂತರದಲ್ಲಿ, ಎಲ್ಐಸಿಯು ಸಮೂಹದ ಕಂಪನಿಗಳಲ್ಲಿ ಮಾಡಿದ್ದ ಹೂಡಿಕೆಯ ಮೌಲ್ಯವು ಕುಸಿದಿತ್ತು. ಈಗ ಅದಾನಿ ಸಮೂಹದ ಷೇರುಗಳ ಮೌಲ್ಯವು ಏರುಗತಿಯಲ್ಲಿ ಇರುವ ಕಾರಣ, ಎಲ್ಐಸಿಯ ಹೂಡಿಕೆಯ ಮೌಲ್ಯವೂ ಹೆಚ್ಚಾಗಿದೆ.
ಉದ್ಯಮಿ ಗೌತಮ್ ಅದಾನಿ ನೇತೃತ್ವದ ಅದಾನಿ ಸಮೂಹವು ತನ್ನ ಸಾಲವನ್ನು ಮರುಪಾವತಿ ಮಾಡುತ್ತಿದೆ, ಒಂದಿಷ್ಟು ಬಾಂಡ್ಗಳನ್ನು ಮರಳಿ ಖರೀದಿಸುತ್ತಿದೆ, ಸಮೂಹದ ಎರಡು ಪ್ರಮುಖ ಕಂಪನಿಗಳು ₹ 21 ಸಾವಿರ ಕೋಟಿ ಬಂಡವಾಳ ಸಂಗ್ರಹಿಸುವ ಆಲೋಚನೆ ಹೊಂದಿವೆ.
ಅದಾನಿ ಸಮೂಹದ ಕಂಪನಿಗಳ ಷೇರುಮೌಲ್ಯವು ಕೃತಕವಾಗಿ ಏರಿಳಿಯುವಂತೆ ಮಾಡಲಾಗಿದೆ ಎಂಬ ಆರೋಪಕ್ಕೆ ಸಾಕ್ಷ್ಯ ಲಭಿಸಿಲ್ಲ ಎಂದು ಸುಪ್ರೀಂ ಕೋರ್ಟ್ ನೇಮಕ ಮಾಡಿದ್ದ ತಜ್ಞರ ಸಮಿತಿಯು ಹೇಳಿದ ನಂತರದಲ್ಲಿ ಅದಾನಿ ಸಮೂಹದ ಷೇರುಗಳ ಮೌಲ್ಯ ಹೆಚ್ಚುತ್ತ ಸಾಗಿದೆ.
ಅದಾನಿ ಸಮೂಹದ ಕಂಪನಿಗಳಲ್ಲಿ ಎಲ್ಐಸಿ ಮಾಡಿರುವ ಹೂಡಿಕೆಯು ₹ 30,127 ಕೋಟಿ. ಇದು ಜನವರಿ 27ರ ಹೊತ್ತಿಗೆ ₹ 56,142 ಕೋಟಿಗೆ ತಲುಪಿತ್ತು. ಆದರೆ, ಹಿಂಡನ್ಬರ್ಗ್ ವರದಿಯ ನಂತರದಲ್ಲಿ ಸಮೂಹದ ಕಂಪನಿಗಳ ಷೇರುಮೌಲ್ಯ ಕುಸಿದ ಪರಿಣಾಮವಾಗಿ, ಎಲ್ಐಸಿ ಹೂಡಿಕೆಯ ಮೌಲ್ಯವು ಫೆಬ್ರುವರಿ 23ರ ಹೊತ್ತಿಗೆ ₹ 27 ಸಾವಿರ ಕೋಟಿಗೆ ತಲುಪಿತ್ತು.