ಎಲ್‌ಪಿಜಿ ದರ ಮುಂದಿನ ತಿಂಗಳು ಇಳಿಕೆಯಾಗಬಹುದು: ಧರ್ಮೇಂದ್ರ ಪ್ರಧಾನ್‌ 

ಛತ್ತೀಚ್‌ಗಢದಲ್ಲಿ ಎರಡು ದಿನಗಳ ಭೇಟಿಯಲ್ಲಿರುವ ಪೆಟ್ರೋಲ್‌, ನೈಸರ್ಗಿಕ ಅನಿಲ ಮತ್ತು ಸ್ಟೀಲ್‌ ಖಾತೆಗಳ ಕೇಂದ್ರ ಸಚಿವ ಧರ್ಮೇಂದ್ರ ಪ್ರಧಾನ್‌ ಸ್ವಾಮಿ ವಿವೇಕಾನಂದ ವಿಮಾನ ನಿಲ್ದಾಣದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದರು.

ಎಲ್‌ಪಿಜಿ ಬೆಲೆ ಏರಿಕೆ ಕುರಿತು ಪ್ರತಿಕ್ರಿಯಿಸಿದ ಅವರು, 'ಎಲ್‌ಪಿಜಿ ಬೆಲೆ ನಿರಂತರವಾಗಿ ಏರುತ್ತಿದೆ ಎಂಬುದು ಸತ್ಯವಲ್ಲ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿಬೆಲೆ ಏರಿಕೆಯಾದ ಕಾರಣ ಈ ತಿಂಗಳು ದರದಲ್ಲಿ ಹೆಚ್ಚಳಮಾಡಲಾಗಿದೆ. ಆದರೂ ಮುಂದಿನ ತಿಂಗಳು ಬೆಲೆ ಕಡಿಮೆಯಾಗುವ ಸೂಚನೆಗಳು ಕಂಡು ಬಂದಿವೆ' ಎಂದರು.

ಚಳಿಗಾಲದಲ್ಲಿ ಎಲ್‌ಪಿಜಿ ಬಳಕೆ ಹೆಚ್ಚುತ್ತದೆ. ಇದರಿಂದಾಗಿ ಇಂಧನ ವಲಯದಲ್ಲಿ ಬೇಡಿಕೆ ಒತ್ತಡ ಸೃಷ್ಟಿಯಾಗುತ್ತದೆ. ಈ ತಿಂಗಳು ಬೆಲೆ ಏರಿಕೆಯಾಗಿದೆ, ಮುಂದಿನ ತಿಂಗಳು ಬೆಲೆ ಕಡಿಮೆಯಾಗುತ್ತದೆ ಎಂದು ಹೇಳಿದರು.

ಅಡುಗೆ ಅನಿಲ ಎಲ್‌ಪಿಜಿಪ್ರತಿ ಸಿಲಿಂಡರ್‌ ಬೆಲೆ ಕಳೆದ ವಾರ ₹144.5ರಷ್ಟು ಹೆಚ್ಚಿಸಲಾಯಿತು. ಆದರೆ, ಗೃಹ ಬಳಕೆದಾರರಿಗೆ ಹೊರೆಯಾಗದಿರಲು ಸರ್ಕಾರ ಸಬ್ಸಿಡಿ ದುಪ್ಪಟ್ಟುಗೊಳಿಸಿತು. ಹಾಗಾಗಿ, ಸಬ್ಸಿಡಿ ಪಡೆಯುವವರಿಗೆ ಪ್ರತಿ ಸಿಲಿಂಡರ್‌ ಎಲ್‌ಪಿಜಿ ದರದಲ್ಲಿ ಯಾವುದೇ ಬದಲಾವಣೆಯಾಗಲಿಲ್ಲ.

ಭಿಲಾಯಿ ಸ್ಟೀಲ್‌ ಪ್ಲಾಂಟ್‌ (ಬಿಎಸ್‌ಪಿ) ಹಾಗೂ ಅದಿರು ಗಣಿಗಾರಿಕೆ ನಡೆಯುತ್ತಿರುವ ಸ್ಥಳಗಳಿಗೆ ಧರ್ಮೇಂದ್ರ ಪ್ರಧಾನ್‌ ಭೇಟಿ ನೀಡಲಿದ್ದಾರೆ.

₹291.48 ಸಬ್ಸಿಡಿ

ದರ ಹೆಚ್ಚಳದ ಬಳಿಕ ಪ್ರತಿ 14.2 ಕೆಜಿ ಎಲ್‌ಪಿಜಿ ಸಿಲಿಂಡರ್‌ ಬೆಲೆ ₹714ರಿಂದ ₹858.50 ಆಗಿದೆ. ಪ್ರತಿ ಸಿಲಿಂಡರ್‌ಗೆ ಸರ್ಕಾರ ನೀಡುತ್ತಿದ್ದ ₹153.86 ಸಬ್ಸಿಡಿಯನ್ನು ₹291.48ಕ್ಕೆ ಏರಿಕೆ ಮಾಡಲಾಗಿದೆ. ಪ್ರಧಾನ ಮಂತ್ರಿ ಉಜ್ವಲ ಯೋಜನೆ ಫಲಾನುಭವಿಗಳಿಗೆ ಸಬ್ಸಿಡಿ ₹174.86 ರಿಂದ ₹312.48ಕ್ಕೆ ಹೆಚ್ಚಳ ಮಾಡಲಾಗಿದೆ.

ಎಂದಿನಂತೆ 14.2 ಕೆಜಿ ಎಲ್‌ಪಿಜಿ ಸಿಲಿಂಡರ್‌ ಪಡೆಯುವ ಗ್ರಾಹಕರ ಬ್ಯಾಂಕ್‌ ಖಾತೆಗೆ ಸಬ್ಸಿಡಿ ಜಮೆಯಾಗಲಿದೆ. ಸಬ್ಸಿಡಿ ಅನ್ವಯವಾದ ನಂತರ ಸಾಮಾನ್ಯ ಬಳಕೆದಾರರಿಗೆ ಪ್ರತಿ ಸಿಲಿಂಡರ್‌ಗೆ ₹567.02 ಹಾಗೂ ಪ್ರಧಾನ ಮಂತ್ರಿ ಉಜ್ವಲ ಯೋಜನೆ ಫಲಾನುಭವಿಗಳಿಗೆ ₹546.02 ಆಗಿದೆ.