ಹೊಸ ಬ್ರೆಜಾ ಬಿಡುಗಡೆ ಮಾಡಿದ ಮಾರುತಿ ಸುಜುಕಿ

‘ಬ್ರೆಜಾ’ ಮೂಲಕ ಎಸ್‌ಯುವಿ ಮಾರುಕಟ್ಟೆಯಲ್ಲಿ ತನ್ನ ಪಾಲನ್ನು ಹೆಚ್ಚಿಸಿಕೊಳ್ಳುವ ಉದ್ದೇಶವನ್ನು ಮಾರುತಿ ಸುಜುಕಿ ಹೊಂದಿದೆ.

ಎರಡನೆಯ ತಲೆಮಾರಿನ ಬ್ರೆಜಾ ವಾಹನವು ಮ್ಯಾನುವಲ್‌ ಹಾಗೂ ಆಟೊಮ್ಯಾಟಿಕ್ ಟ್ರಾನ್ಸ್‌ಮಿಷನ್ ಆಯ್ಕೆಗಳಲ್ಲಿ ಲಭ್ಯವಿರಲಿದೆ. ‘ಹೊಸ ಬ್ರೆಜಾ ಸೇರಿದಂತೆ ಕಳೆದ ಎಂಟು ತಿಂಗಳಲ್ಲಿ ಆರು ಮಾದರಿಗಳನ್ನು ಕಂಪನಿ ಬಿಡುಗಡೆ ಮಾಡಿದೆ. ಇದು ಭಾರತದ ಮಾರುಕಟ್ಟೆಯ ವಿಚಾರವಾಗಿ ಕಂಪನಿ ಹೊಂದಿರುವ ವಿಶ್ವಾಸವನ್ನು ತೋರಿಸುತ್ತಿದೆ’ ಎಂದು ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಸಿಇಒ ಹಿಸಾಶಿ ಟೇಕುಚಿ ಹೇಳಿದ್ದಾರೆ.

ಬ್ರೆಜಾ ಎಸ್‌ಯುವಿಯನ್ನು 2016ರಲ್ಲಿ ಬಿಡುಗಡೆ ಮಾಡಲಾಯಿತು. ಕಂಪನಿಯು ಇದುವರೆಗೆ 7.5 ಲಕ್ಷಕ್ಕಿಂತ ಹೆಚ್ಚು ಬ್ರೆಜಾ ವಾಹನಗಳನ್ನು ಮಾರಾಟ ಮಾಡಿದೆ.

1.5 ಲೀಟರ್ ಸಾಮರ್ಥ್ಯದ ಕೆ–ಸರಣಿಯ ಪೆಟ್ರೋಲ್ ಎಂಜಿನ್ ಹೊಸ ಬ್ರೆಜಾದಲ್ಲಿ ಇದೆ. ಸ್ಮಾರ್ಟ್‌ ಹೈಬ್ರಿಡ್ ತಂತ್ರಜ್ಞಾನ ಇದರಲ್ಲಿದ್ದು, ಇಂಧನ ದಕ್ಷತೆಯು ಪ್ರತಿ ಲೀಟರ್‌‌ಗೆ 20.15 ಕಿ.ಮೀ. ಇದೆ ಎಂದು ಕಂಪನಿ ಹೇಳಿದೆ. ಆರು ಏರ್‌ಬ್ಯಾಗ್‌ಗಳು ಸೇರಿ ಸುರಕ್ಷತೆಗೆ ಸಂಬಂಧಿಸಿದಂತೆ ಒಟ್ಟು 20 ಸೌಲಭ್ಯಗಳನ್ನು ಇದು ಹೊಂದಿದೆ.

2021–22ನೆಯ ಆರ್ಥಿಕ ವರ್ಷದಲ್ಲಿ ಮಾರುತಿ ಸುಜುಕಿ ದೇಶದ ಪ್ರಯಾಣಿಕ ವಾಹನ ಮಾರುಕಟ್ಟೆಯಲ್ಲಿ ಶೇಕಡ 43.4ರಷ್ಟು ಪಾಲು ಹೊಂದಿತ್ತು.