ಮಂಗಳೂರು: ಮಂಗಳೂರು ರಿಫೈನರಿ ಮತ್ತು ಪೆಟ್ರೊಕೆಮಿಕಲ್ಸ್ ಲಿಮಿಟೆಡ್ (ಎಂಆರ್ಪಿಎಲ್), 2023–24ರ ಮೊದಲ ತ್ರೈಮಾಸಿಕದಲ್ಲಿ ತೆರಿಗೆ ಕಳೆದು ₹ 1,013 ಕೋಟಿ ಲಾಭ ಗಳಿಸಿದೆ. 2022–23ನೇ ಸಾಲಿನ ಮೊದಲ ಮೂರು ತಿಂಗಳಿನಲ್ಲಿ ಕಂಪನಿಯು ₹ 2,707 ಕೋಟಿ ಲಾಭ ಗಳಿಸಿತ್ತು.
2023–24ರ ಮೊದಲ ತ್ರೈಮಾಸಿಕದಲ್ಲಿ 43.6 ಲಕ್ಷ ಟನ್ ನಿರ್ವಹಣೆ ಮಾಡುವ ಮೂಲಕ ಸಂಸ್ಕರಣಾ ಘಟಕವು ಇದುವರೆಗಿನ ಗರಿಷ್ಠ ಸಾಧನೆ ಮಾಡಿದೆ. ಈ ಸಂಸ್ಕರಣಾ ಘಟಕವನ್ನು ಅದರ ಸಾಮರ್ಥ್ಯದ ಶೇ 116.26ರಷ್ಟನ್ನು ಈ ಅವಧಿಯಲ್ಲಿ ಬಳಕೆ ಮಾಡಿಕೊಂಡಿದೆ. ಈ ಘಟಕದ ವಾರ್ಷಿಕ ನಿರ್ವಹಣಾ ಸಾಮರ್ಥ್ಯ 150 ಲಕ್ಷ ಟನ್.
ಕಾರ್ಯಾಚರಣಾ ವರಮಾನ 2023–24ರ ಮೊದಲ ತ್ರೈಮಾಸಿಕದಲ್ಲಿ ₹ 24,832 ಕೋಟಿಗೆ ಇಳಿಕೆಯಾಗಿದೆ. 2022–23ನೇ ಸಾಲಿನ ಮೊದಲ ತ್ರೈಮಾಸಿಕದಲ್ಲಿ ಕಂಪನಿ ಕಾರ್ಯಚರಣಾ ವರಮಾನ ₹ 35,915 ಕೋಟಿ ಆಗಿತ್ತು. ಕಂಪನಿಯು ರಫ್ತಿನ ಮೂಲಕ ₹ 6,907 ಕೋಟಿ ವರಮಾನ ಗಳಿಸಿದೆ. ಕಳೆದ ಸಾಲಿನಲ್ಲಿ ಈ ಅವಧಿಯಲ್ಲಿ ₹ 14,765 ಕೋಟಿ ವರಮಾನ ಗಳಿಸಿತ್ತು ಎಂದು ಕಂಪನಿಯ ಪ್ರಕಟಣೆ ತಿಳಿಸಿದೆ.