ನವದೆಹಲಿ: ಪೆಟ್ರೋಲ್ ದರ ಭಾನುವಾರ ಪ್ರತಿ ಲೀಟರ್‌ಗೆ 8 ಪೈಸೆ ಮತ್ತು ಡೀಸೆಲ್ ದರ ಪ್ರತಿ ಲೀಟರ್‌ಗೆ 19 ಪೈಸೆಯಷ್ಟು ಏರಿಕೆಯಾಗಿದೆ. ಇದರೊಂದಿಗೆ, ಉಭಯ ಇಂಧನ ದರ ಸತತ ಮೂರನೇ ದಿನ ಏರಿಕೆಯಾದಂತಾಗಿದೆ.
ಅಂತರರಾಷ್ಟ್ರೀಯ ತೈಲ ಮಾರುಕಟ್ಟೆಯಲ್ಲಿ ಸುಮಾರು ಎರಡು ತಿಂಗಳ ಬಳಿಕ ದರ ಪರಿಷ್ಕರಣೆಯಾಗಿದೆ. ಪರಿಣಾಮವಾಗಿ ದೇಶದಲ್ಲಿಯೂ ದರ ಪರಿಷ್ಕರಿಸಲಾಗಿದೆ.
ದೆಹಲಿಯಲ್ಲಿ ಪ್ರತಿ ಲೀಟರ್ ಪೆಟ್ರೋಲ್ ದರ ಈಗ ₹81.46 ಆಗಿದೆ. ಪ್ರತಿ ಲೀಟರ್ ಡೀಸೆಲ್ ದರ 81.38 ಆಗಿದೆ ಎಂದು ತೈಲ ಮಾರುಕಟ್ಟೆ ಕಂಪನಿಗಳ ಪ್ರಕಟಣೆ ತಿಳಿಸಿದೆ.
ಪೆಟ್ರೋಲ್ ದರವು ಸೆಪ್ಟೆಂಬರ್‌ 22ರಿಂದ ಮತ್ತು ಡೀಸೆಲ್ ದರವು ಅಕ್ಟೋಬರ್ 2ರಿಂದ ಸ್ಥಿರವಾಗಿತ್ತು. ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ಶುಕ್ರವಾರದಿಂದ ದರ ಹೆಚ್ಚಳ ಮಾಡುತ್ತಿವೆ. ಮೂರು ದಿನಗಳಲ್ಲಿ ಪ್ರತಿ ಲೀಟರ್ ಪೆಟ್ರೋಲ್ ದರ 40 ಪೈಸೆ ಹಾಗೂ ಡೀಸೆಲ್ ದರ 61 ಪೈಸೆ ಏರಿಕೆಯಾಗಿದೆ.
