ವಾಷಿಂಗ್ಟನ್: ಅಮೆರಿಕದಿಂದ ಆಮದಾಗುತ್ತಿದ್ದ ಸೇಬು ಸೇರಿದಂತೆ ಹಲವು ಸರಕುಗಳ ಮೇಲೆ 2019ರಲ್ಲಿ ವಿಧಿಸಿದ್ದ ಶೇ 20ರಷ್ಟು ಹೆಚ್ಚುವರಿ ಕಸ್ಟಮ್ಸ್ ಸುಂಕವನ್ನು ಭಾರತ ಹಿಂಪಡೆದಿದೆ.
ಕೇಂದ್ರ ಸರ್ಕಾರದ ಈ ನಿರ್ಧಾರದಿಂದ ಸಂತಸಗೊಂಡ ಅಮೆರಿಕದ ಸಂಸದರು ಹಾಗೂ ಸೇಬು ಬೆಳೆಗಾರರು ಸಿಯಾಟಲ್ ಬಂದರಿನಲ್ಲಿ ಮಂಗಳವಾರ ಸಂಭ್ರಮಾಚರಣೆ ನಡೆಸಿದ್ದಾರೆ.
ಭಾರತವು ಆಮದು ಸುಂಕವನ್ನು ಹಿಂಪಡೆದಿದೆ. ಹಾಗಾಗಿ, ವಾಷಿಂಗ್ಟನ್ ರಾಜ್ಯದಿಂದ ಈ ಋತುವಿನಲ್ಲಿ ಕಳೆದ ವರ್ಷಕ್ಕಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಭಾರತಕ್ಕೆ ಸೇಬು ರವಾನೆಯಾಗುವ ಸಾಧ್ಯತೆಯಿದೆ ಎಂದು ಹೇಳಲಾಗಿದೆ.
ಸುಂಕ ಹೆಚ್ಚಳವು ವಾಷಿಂಗ್ಟನ್ ಸೇಬು ಮಾರುಕಟ್ಟೆಗೆ ದೊಡ್ಡ ಪೆಟ್ಟು ನೀಡಿತ್ತು. ಸುಂಕ ಜಾರಿಗೂ ಮೊದಲು ಇಲ್ಲಿನ ಮಾರುಕಟ್ಟೆಯಿಂದ ವಾರ್ಷಿಕ ₹995 ಕೋಟಿ ಮೌಲ್ಯದ ಸೇಬುಗಳನ್ನು ರಫ್ತು ಮಾಡಲಾಗುತ್ತಿತ್ತು. ಆದೇಶ ಜಾರಿಯಾದ ಬಳಿಕ ರಫ್ತು ವಹಿವಾಟು ₹8 ಕೋಟಿಗೆ ಇಳಿಕೆಯಾಗಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.