ಮಕ್ಕಳ ಶಿಕ್ಷಣ ವೆಚ್ಚಕ್ಕೆ ಷೇರು ಮೀಸಲಿಟ್ಟ ಜೊಮ್ಯಾಟೊ ಸಂಸ್ಥಾಪಕ

ಜೊಮ್ಯಾಟೊ ಕಂಪನಿಯು ಷೇರುಪೇಟೆಯಲ್ಲಿ ನೋಂದಾಯಿತ ಆಗುವ ಮೊದಲು ಗೋಯಲ್ ಅವರಿಗೆ ಹೂಡಿಕೆದಾರರು ಮತ್ತು ಆಡಳಿತ ಮಂಡಳಿಯ ಕಡೆಯಿಂದ ಷೇರುಗಳು ‘ನೌಕರರ ಷೇರು ಮಾಲೀಕತ್ವ ಯೋಜನೆ’ಯ (ಇಎಸ್‌ಒಪಿ) ಅಡಿಯಲ್ಲಿ ದೊರೆತಿತ್ತು.

ಈ ಷೇರುಗಳನ್ನು ಜೊಮ್ಯಾಟೊ ಫ್ಯೂಚರ್ ಪ್ರತಿಷ್ಠಾನಕ್ಕೆ ನೀಡಲಾಗುತ್ತದೆ. ಪ್ರತಿಷ್ಠಾನವು ಈ ಹಣವನ್ನು ವಿತರಕರ ಇಬ್ಬರು ಮಕ್ಕಳ ವಾರ್ಷಿಕ ಗರಿಷ್ಠ ₹ 50 ಸಾವಿರದವರೆಗಿನ ಶಿಕ್ಷಣ ವೆಚ್ಚಕ್ಕೆ ನೆರವಾಗಲು ಬಳಸಲಾಗುತ್ತದೆ. ಕಂಪನಿಯ ಜೊತೆ ಐದು ವರ್ಷಗಳಿಗಿಂತ ಹೆಚ್ಚಿನ ಅವಧಿಯಿಂದ ಕೆಲಸ ಮಾಡುತ್ತಿರುವ ವಿತರಕರ ಮಕ್ಕಳಿಗೆ ಈ ಪ್ರಯೋಜನ ಸಿಗಲಿದೆ.

10 ವರ್ಷ ಜೊಮ್ಯಾಟೊ ಕಂಪನಿಯಲ್ಲಿ ಕೆಲಸ ಮಾಡಿದರೆ ಅವರ ಮಕ್ಕಳ ವಾರ್ಷಿಕ ₹ 1 ಲಕ್ಷದವರೆಗಿನ ಶಿಕ್ಷಣದ ವೆಚ್ಚಕ್ಕೆ ನೆರವು ನೀಡಲಾಗುತ್ತದೆ ಎಂದು ಗೋಯಲ್ ಹೇಳಿದ್ದಾರೆ. ಮಹಿಳಾ ವಿತರಕರಿಗೆ 5–10 ವರ್ಷಗಳ ಮಾನದಂಡ ಇರುವುದಿಲ್ಲ, ಅವರು ಕಡಿಮೆ ಅವಧಿಯಿಂದ ಕರ್ತವ್ಯದಲ್ಲಿದ್ದರೂ ಪ್ರಯೋಜನ ಸಿಗಲಿದೆ. ಈ ವಿಚಾರವಾಗಿ ಪ್ರತಿಕ್ರಿಯೆ ನೀಡಲು ಜೊಮ್ಯಾಟೊ ವಕ್ತಾರರು ನಿರಾಕರಿಸಿದ್ದಾರೆ.