ಬುಧವಾರ, ಏಪ್ರಿಲ್ 1, 2020
19 °C

ಮುಂಬೈ ಷೇರು ಸೂಚ್ಯಂಕ 1941 ಅಂಶಗಳ ಪತನ: ವಿದೇಶಿ ಹೂಡಿಕೆದಾರರ ನಿರ್ಗಮನ

ಪ್ರಜಾವಾಣಿ ವೆಬ್ ಡೆಸ್ಕ್ Updated:

ಅಕ್ಷರ ಗಾತ್ರ : | |

ಮುಂಬೈ: ಕಚ್ಚಾ ತೈಲದ ದರ ಸಮರ ಮತ್ತು ಯೆಸ್ ಬ್ಯಾಂಕ್‌ ಪತನದಿಂದ ಆತಂಕಗೊಂಡ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಷೇರು ಮಾರಾಟಕ್ಕೆ ಮುಗಿಬಿದ್ದ ಕಾರಣ ಸೋಮವಾರ ಮುಂಬೈ ಮತ್ತು ರಾಷ್ಟ್ರೀಯ  ಷೇರುಪೇಟೆ ಸಂವೇದಿ ಸೂಚ್ಯಂಕಗಳು ವ್ಯಾಪಕ ಇಳಿಕೆ ದಾಖಲಿಸಿದವು. ಕಳೆದ ಎರಡೂವರೆ ವರ್ಷಗಳ ಅವಧಿಯಲ್ಲಿ ಬಂದಿದ್ದ ಗಳಿಕೆ ಒಮ್ಮೆಲೆ ಕರಗಿತು.

ಅತಿದೊಡ್ಡ 30 ಕಂಪನಿಗಳ ಸಂವೇದಿ ಸೂಚ್ಯಂಕವು (ಸೆನ್ಸೆಕ್ಸ್) 1,941.67 (ಶೇ 5.17) ಅಂಶಗಳಷ್ಟು ಪತನ ಕಂಡು 35,634.95ಕ್ಕೆ ಕುಸಿಯಿತು. 538 ಅಂಶಗಳ (ಶೇ4.90) ಪತನಕಂಡ ನಿಫ್ಟಿ50 ಸಂವೇದಿ ಸೂಚ್ಯಂಕ 10,451.45ಕ್ಕೆ ಕುಸಿಯಿತು.

ಷೇರುಪೇಟೆಯಲ್ಲಿ ಇತರ ವಿದ್ಯಮಾನಗಳಿಗೆ ಹೊರತಾದಂತೆ ವರ್ತಿಸುವ ಈ ಬೆಂಚ್‌ಮಾರ್ಕ್ ಸೂಚ್ಯಂಕಗಳೇ ಶೇ 5ರಷ್ಟು ಕುಸಿದಿದ್ದು ಇದೇ ಮೊದಲು. ಸಾಮಾನ್ಯವಾಗಿ ವಿದೇಶಿ ಹೂಡಿಕೆದಾರರು ಹೆಚ್ಚಿನ ಮೊತ್ತವನ್ನು ದೈತ್ಯ ಕಂಪನಿಗಳಲ್ಲಿ (ಬ್ಲೂಚಿಪ್) ಹೂಡಿಕೆ ಮಾಡುವುದು ವಾಡಿಕೆ. ಇಂದು ಷೇರುಪೇಟೆಯಲ್ಲಿ ಕಂಡು ಬಂದ ಈ ಕುಸಿತವು, ವಿದೇಶಿ ಹೂಡಿಕೆದಾರರು ತಮ್ಮ ನಿಧಿಗಳನ್ನು ಹಿಂತೆಗೆಯುತ್ತಿರುವುದರ ದ್ಯೋತಕ.

ವಹಿವಾಟು ನಡೆಯುವ ಸಂದರ್ಭ ಒಂದು ಹಂತದಲ್ಲಿ 30 ಷೇರುಗಳ ಬಿಎಸ್‌ಇ ಸಂವೇದಿ ಸೂಚ್ಯಂಕವು 2,400 ಅಂಶಗಳ ಕುಸಿತ ದಾಖಲಿಸಿತ್ತು. 

ತೈಲ ಕಂಪನಿಗಳು ಮತ್ತು ಬ್ಯಾಂಕ್‌ಗಳ ಷೇರು ಮೌಲ್ಯ ಅತಿಹೆಚ್ಚಿನ ಕುಸಿತ ದಾಖಲಿಸಿತು. ಮುಂಬೈ ಸಂವೇದಿ ಸೂಚ್ಯಂಕದಲ್ಲಿ ಒಎನ್‌ಜಿಸಿ ಶೇ 17ರಷ್ಟು ಕುಸಿದರೆ, ರಿಲಯನ್ಸ್‌ ಶೇ 12.52ರಷ್ಟು ಕುಸಿತ ದಾಖಲಿಸಿತು. ಇಂಡಸ್ ಇಂಡ್ ಬ್ಯಾಂಕ್‌ನ ಷೇರುಗಳು ಶೇ 12.06ರಷ್ಟು ಕುಸಿದವು. ಒಟ್ಟಾರೆಯಾಗಿ ಒಂದೇ ದಿನ ಹೂಡಿಕೆದಾರರ ₹6.2 ಲಕ್ಷ ಕೋಟಿಯಷ್ಟು ಹಣ ಕರಗಿದೆ.

50 ಷೇರುಗಳ ಎನ್‌ಎಸ್‌ಇ ನಿಫ್ಟಿ ಸಂವೇದಿ ಸೂಚ್ಯಂಕವು 538 ಅಂಶಗಳ (ಶೇ 4.9) ಕುಸಿತ ದಾಖಲಿಸಿ, 10,451.45 ಅಂಶಗಳೊಂದಿಗೆ ದಿನದ ವಹಿವಾಟು ಮುಗಿಸಿತು. ಮಾಧ್ಯಮ, ಲೋಹ ಮತ್ತು ಬ್ಯಾಂಕ್‌ ಉದ್ಯಮಗಳಿಗೆ ಸಂಬಂಧಿಸಿದ ಕಂಪನಿಗಳ ಷೇರುಗಳು ಅತ್ಯಂತ ವೇಗವಾಗಿ ಕುಸಿದವು. ಬಹುತೇಕ ಕಂಪನಿಗಳ ಷೇರುಮೌಲ್ಯ ಒಂದೇ ದಿನ ಶೇ 6.5ರಿಂದ ಶೇ 8ರಷ್ಟು ಕುಸಿದಿದೆ.

ವಿದೇಶಿ ಹೂಡಿಕೆದಾರರು ಭಾರತೀಯ ಮಾರುಕಟ್ಟೆಯಿಂದ ಹೊರನಡೆಯುತ್ತಿರುವುದು ರೂಪಾಯಿ ಮೌಲ್ಯದ ಮೇಲೆಯೂ ಪರಿಣಾಮ ಬೀರಿದೆ. ಕಳೆದ 16 ತಿಂಗಳ ಅವಧಿಯಲ್ಲಿ ಇದೇ ಮೊದಲ ಬಾರಿಗೆ ರೂಪಾಯಿ ಮೌಲ್ಯವು ಡಾಲರ್‌ ಎದುರು 74ರ ಗಡಿಯಿಂದ ಕೆಳಗಿಳಿದಿತ್ತು. ಸಂಜೆ 5ರ ಹೊತ್ತಿಗೆ ಡಾಲರ್ ಮೌಲ್ಯವು ₹74.0600 ಇತ್ತು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು