ಜಾಗತಿಕ ಉದ್ಯಮ ಲೋಕದಲ್ಲಿ ಇಂಗ್ಲಿಷ್‌ ಪ್ರಭಾವ

ಪುಸ್ತಕಗಳ ಓದು ವ್ಯಕ್ತಿಯನ್ನು ಪೂರ್ಣಗೊಳಿಸಿದರೆ, ಬರವಣಿಗೆಯು ಪರಿಪೂರ್ಣಗೊಳಿಸುತ್ತದೆ ಮತ್ತು ಸಮ್ಮೇಳನಗಳು ವ್ಯಕ್ತಿತ್ವವನ್ನು ರೂಪುಗೊಳಿಸುತ್ತವೆ ಎನ್ನುವ ಮಾತಿದೆ. ಜಾಗತೀಕರಣದ ಫಲವಾಗಿ ಗಡಿಯಾಚೆಗಿನ ಉದ್ದಿಮೆ ವಹಿವಾಟು ಈಗ ಬಹು ರಾಷ್ಟ್ರೀಯ ಸ್ವರೂಪ ಪಡೆದುಕೊಂಡಿದೆ.

ಉದ್ಯಮಿಗಳೂ ಹಲವಾರು ದೇಶಗಳಿಗೆ ಸುಲಭವಾಗಿ ಪ್ರಯಾಣಿಸುವಂತಾಗಿದೆ. ‘ಪ್ರವಾಸವು ವ್ಯಕ್ತಿಯನ್ನು ಪರಿಪೂರ್ಣಗೊಳಿಸುತ್ತದೆ’ ಎನ್ನುವ ನಾಣ್ಣುಡಿ ತುಂಬ ಹಳೆಯದಾದರೂ, ಈ ಲೋಕೋಕ್ತಿಯು ಇಂದಿನ ಉದ್ಯೋಗ ಮಾರುಕಟ್ಟೆಯಲ್ಲಿ ಹೆಚ್ಚು ಪ್ರಸ್ತುತವಾಗಿದೆ.

. ದೇಶದಾದ್ಯಂತ ವಿವಿಧ ಶೈಕ್ಷಣಿಕ ಸಂಸ್ಥೆಗಳಿಂದ ಪ್ರತಿ ವರ್ಷ ಹೊರ ಬರುವ ಪದವೀಧರರ ಕೌಶಲ ಮತ್ತು ಉದ್ಯೋಗಶೀಲತೆ ಮಧ್ಯೆ ಇರುವ ಅಂತರದ ಬಗ್ಗೆ ನಾನು ಈ ಹಿಂದಿನ ಅಂಕಣದಲ್ಲಿ ಅನೇಕ ವಿವರಗಳನ್ನು ಓದುಗರೊಂದಿಗೆ ಹಂಚಿಕೊಂಡಿದ್ದೆ. ಉದ್ಯೋಗಶೀಲತೆ ಮೇಲೆ ಪ್ರಭಾವ ಬೀರುವ ಮೂರು ಪ್ರಮುಖ ಸಂಗತಿಗಳಲ್ಲಿ ‘ಸಂವಹನ ಕಲೆ’ಯೂ ಒಂದಾಗಿದೆ. ಇನ್ನುಳಿದ ಎರಡು ಸಂಗತಿಗಳಲ್ಲಿ ಕಾರ್ಯಕ್ಷೇತ್ರದ ತಿಳಿವಳಿಕೆ ಮತ್ತು ಕಂಪ್ಯೂಟರ್ ಜ್ಞಾನ ಮಹತ್ವದ್ದಾಗಿವೆ.

ಅಧ್ಯಯನ ವರದಿಯಲ್ಲಿ ‘ಸಂವಹನ ಕೌಶಲ’ವು ಸಾಮಾನ್ಯ ಗುಣಲಕ್ಷಣ ಎಂದು ಪ್ರಸ್ತಾಪಿಸಿದ್ದರೂ, ಬಹುತೇಕ ಉದ್ಯೋಗದಾತರು, ಉದ್ಯೋಗ ನೀಡುವಾಗ ವ್ಯಕ್ತಿಯ ಇಂಗ್ಲಿಷ್ ಭಾಷಾ ಪರಿಣತಿಯನ್ನೇ ಪ್ರಮುಖವಾಗಿ ಪರಿಗಣಿಸುತ್ತಾರೆ ಎನ್ನುವುದು ಈಗ ಗುಟ್ಟಾಗಿ ಉಳಿದಿಲ್ಲ.

ಸದ್ಯದ ಉದ್ದಿಮೆ ವಹಿವಾಟು ವಿಶ್ವದಾದ್ಯಂತ ಡಿಜಿಟಲ್ ವ್ಯವಸ್ಥೆ ಮತ್ತು ಪರಸ್ಪರ ಸಂಪರ್ಕ ಹೊಂದಿರುವ ಅಂತರ್ಜಾಲ ವ್ಯವಸ್ಥೆಯನ್ನೇ ಸಂಪೂರ್ಣವಾಗಿ ಆಧರಿಸಿದೆ. ಈ ವ್ಯವಸ್ಥೆ ಅದೆಷ್ಟರ ಮಟ್ಟಿಗೆ ಪ್ರಭಾವಶಾಲಿಯಾಗಿ ಬೆಳೆದಿದೆ ಎಂದರೆ ದೂರ ಮತ್ತು ಸ್ಥಳಗಳು ತಮ್ಮ ಪ್ರಸ್ತುತತೆಯನ್ನೇ ಕಳೆದುಕೊಂಡಿವೆ.

ಭಾರತದಲ್ಲಿ ಯಾವುದೇ ವಹಿವಾಟು ನಡೆಸದ ಬಹುರಾಷ್ಟ್ರೀಯ ಸಂಸ್ಥೆಯೊಂದು, ತನ್ನ ಜಾಗತಿಕ ವಹಿವಾಟಿಗೆ ಅಗತ್ಯವಾದ ಪೂರಕ ಕೆಲಸ ಕಾರ್ಯಗಳನ್ನು ನಿರ್ವಹಿಸುವ ಕಚೇರಿಗಳನ್ನು (ಬ್ಯಾಕ್ ಆಫೀಸ್) ಇಲ್ಲಿಯೇ ಸ್ಥಾಪಿಸಿವೆ. ಯೂರೋಪ್ನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಅನೇಕ ಹಣಕಾಸು ಮತ್ತು ಬ್ಯಾಂಕಿಂಗ್ ವಹಿವಾಟಿನ ಬಹುರಾಷ್ಟ್ರೀಯ ಸಂಸ್ಥೆಗಳು ತಮ್ಮೆಲ್ಲ ಕಚೇರಿ ಕೆಲಸಗಳನ್ನು ಭಾರತದಿಂದಲೇ ನಿರ್ವಹಿಸುತ್ತವೆ.

ಸರಕುಗಳನ್ನು ತಯಾರಿಸುವ ದೈತ್ಯ ಸಂಸ್ಥೆಗಳೂ ತಮ್ಮ ಸಂಶೋಧನೆ ಮತ್ತು ಅಭಿವೃದ್ಧಿ ಕೇಂದ್ರಗಳನ್ನೂ ಭಾರತ ಮತ್ತು ಕಡಿಮೆ ವೆಚ್ಚ ಮಾಡಬಹುದಾದ ಇತರ ದೇಶಗಳಲ್ಲಿಯೇ ಸ್ಥಾಪಿಸಿವೆ. ಕಚೇರಿ, ಸಿಬ್ಬಂದಿ ಮತ್ತಿತರ ನಿರ್ವಹಣಾ ವೆಚ್ಚಗಳು ಅಗ್ಗವಾಗಿರುವುದರ ಜತೆಗೆ, ಇಲ್ಲಿ ಲಭ್ಯ ಇರುವ ಪರಿಣತ ಮಾನವ ಸಂಪನ್ಮೂಲವೂ ಮುಖ್ಯ ಕಾರಣಗಳಲ್ಲಿ ಒಂದಾಗಿದೆ.

ಇಂಗ್ಲಿಷ್ ಭಾಷೆಯನ್ನು ಸಂಪರ್ಕ ಭಾಷೆಯಾಗಿ ವ್ಯಾಪಕವಾಗಿ ಬಳಕೆಗೆ ತಂದಿರುವುದರಿಂದಲೇ ಇದೆಲ್ಲ ಸಾಧ್ಯವಾಗಿದೆ. ಅಂತರರಾಷ್ಟ್ರೀಯ ಉದ್ದಿಮೆ ವಹಿವಾಟು ಅದೆಷ್ಟರ ಮಟ್ಟಿಗೆ ತ್ವರಿತವಾಗಿ ಏಕೀಕೃತಗೊಂಡಿದೆ ಎಂದರೆ, ‘ಜಾಗತಿಕ ಗ್ರಾಮ’ ಎನ್ನುವ ಪರಿಕಲ್ಪನೆಯೂ ಈಗ ನಿಜವಾಗಿ ಬಿಟ್ಟಿದೆ. ಅಭಿವೃದ್ಧಿ ಹೊಂದಿದ ಸಿರಿವಂತ ದೇಶಗಳು ಸೇವಾ ಕ್ಷೇತ್ರಕ್ಕೆ ಅದೆಷ್ಟರ ಮಟ್ಟಿಗೆ ಆದ್ಯತೆ ನೀಡಿವೆ ಎಂದರೆ, ದಿನ ಪತ್ರಿಕೆಗಳಲ್ಲಿ ಗಮನ ಸೆಳೆಯುವ ಸುದ್ದಿಗಳೆಲ್ಲ ಇದೇ ವಲಯದಿಂದಲೇ ಬರುತ್ತಿವೆ.

ಇತ್ತೀಚಿನ ಬಿಸಿ ಬಿಸಿ ಸುದ್ದಿಯಾಗಿರುವ ವಾಟ್ಸ್ಆ್ಯಪ್ ಅನ್ನು ಫೇಸ್ಬುಕ್ ಖರೀದಿಸಿರುವುದು, ಭವಿಷ್ಯದ ಜಾಗತಿಕ ಉದ್ಯಮವು ಯಾವ ದಿಕ್ಕಿನಲ್ಲಿ ಸಾಗಲಿದೆ ಎನ್ನುವುದರ ದಿಕ್ಸೂಚಿಯಾಗಿದೆ. ಸೇವಾ ವಲಯದ ಮಹತ್ವ ಹೆಚ್ಚುತ್ತಿರುವುದೂ ಇದರಿಂದ ವೇದ್ಯವಾಗುತ್ತದೆ.

ಈ ಹಿಂದೆ ಜಾಗತಿಕ ಅರ್ಥ ವ್ಯವಸ್ಥೆಯಲ್ಲಿ ಸರಕುಗಳ ತಯಾರಿಕಾ ರಂಗದ ಪ್ರಾಬಲ್ಯ ಇದ್ದಾಗ ಇಂಗ್ಲಿಷ್್ ಭಾಷೆಗೆ ಅಷ್ಟು ಮಹತ್ವ ಇದ್ದಿರಲಿಲ್ಲ. ವಿವಿಧ ದೇಶಗಳು ಮತ್ತು ಅವುಗಳ ಅರ್ಥ ವ್ಯವಸ್ಥೆಗಳು ಇಂಟರ್ನೆಟ್ ಮತ್ತು ಡಿಜಿಟಲ್ ಸಂಪರ್ಕ ಕ್ರಾಂತಿಯ ಪ್ರಭಾವದಿಂದ ಹೊರಗೆ ಉಳಿದು ತಮ್ಮತನ ಉಳಿಸಿಕೊಂಡಿದ್ದವು. ಆದರೆ, ಜಾಗತಿಕ ಅರ್ಥ ವ್ಯವಸ್ಥೆಯಲ್ಲಿ ಸೇವಾ ವಲಯವು ಪ್ರವರ್ಧಮಾನಕ್ಕೆ ಬರುತ್ತಿದ್ದಂತೆ ಇಂಗ್ಲಿಷ್ಗೆ ಇನ್ನಿಲ್ಲದ ಮಹತ್ವ ಪ್ರಾಪ್ತವಾಗತೊಡಗಿತು. ಇಂಗ್ಲಿಷ್ ಪರಿಣತಿಯ ಯುವ ಮಾನವ ಸಂಪನ್ಮೂಲ ವಿಪುಲವಾಗಿರುವ ಭಾರತದಂತಹ ಇತರ ದೇಶಗಳೂ ಈ ಬೆಳವಣಿಗೆಯ ಪ್ರಯೋಜನ ಪಡೆಯಲು ಮುಂದಾದವು.

ಬ್ರಿಟಿಷ್ ವಸಾಹತುಶಾಹಿಗಳಾಗಿದ್ದ ಸಣ್ಣ ಪುಟ್ಟ ದೇಶಗಳಲ್ಲಿ ಬ್ರಿಟಿಷರು ಬಳುವಳಿಯಾಗಿ ಬಿಟ್ಟು ಹೋಗಿದ್ದ ಇಂಗ್ಲಿಷ್ ಭಾಷೆ ಕ್ರಮೇಣ ತನ್ನ ಮಹತ್ವ ಸಾಬೀತುಪಡಿಸತೊಡಗಿತು. ಇದು ಅತ್ಯಲ್ಪ ಅವಧಿಯಲ್ಲಿ ವಿಶ್ವದಾದ್ಯಂತ ಅತ್ಯಂತ ತ್ವರಿತವಾಗಿ ಪಸರಿಸಿತು.

ಇತ್ತೀಚಿನ ಅಧ್ಯಯನ ವರದಿ ಅನ್ವಯ, ಇಂಗ್ಲಿಷ್ ಭಾಷೆಯ ಮೇಲೆ ಉತ್ತಮ ಹಿಡಿತ ಹೊಂದಿರುವವರು, ಆರಂಭದಲ್ಲಿಯೇ ಶೇ 35ರಷ್ಟು ಹೆಚ್ಚುವರಿ ಸಂಬಳ ಪಡೆಯಲು ಅರ್ಹತೆ ಪಡೆಯುತ್ತಾರೆ. ವಿಶ್ವದಾದ್ಯಂತ ಉದ್ದಿಮೆ ವಹಿವಾಟಿನ ಅಧಿಕೃತ ಭಾಷೆಯಾಗಿ ಇಂಗ್ಲಿಷ್ ಬಳಕೆಗೆ ಬರುತ್ತಿರುವುದೇ ಇದಕ್ಕೆ ಮುಖ್ಯ ಕಾರಣ. ಸಂವಹನ ಭಾಷೆಯಾಗಿ ಇಂಗ್ಲಿಷ್ ಬಳಸುತ್ತಿರುವುದರಿಂದಲೇ ಬಹುರಾಷ್ಟ್ರೀಯ ಸಂಸ್ಥೆಗಳು ವಿಶ್ವದಾದ್ಯಂತ ಸುಲಭವಾಗಿ ತಮ್ಮ ವಹಿವಾಟು ವಿಸ್ತರಿಸಲು ಸಾಧ್ಯವಾಗುತ್ತಿದೆ.

ಚೀನಾದ ನಿದರ್ಶನವೂ ಇಲ್ಲಿ ಉಲ್ಲೇಖನೀಯ. ಇಂಗ್ಲಿಷ್ಗೆ ಪ್ರತಿಸ್ಪರ್ಧಿಯಾಗಿ ಮಂಡಾರಿನ್ ಭಾಷೆಯನ್ನು ಕಂಪ್ಯೂಟರ್ ಭಾಷೆಯಾಗಿ ಬಳಕೆಗೆ ತರಲು ಚೀನಾ ಸರ್ಕಾರ ಮುಂದಾಗಿತ್ತು. ಆದರೆ, ಇದು ಇಂಗ್ಲಿಷ್ ಭಾಷೆಯ ಮುನ್ನಡೆಗೆ ಯಾವುದೇ ಅಡಚಣೆ ಉಂಟು ಮಾಡಲಿಲ್ಲ. ಮಂಡಾರಿನ್ಗೆ ಹೋಲಿಸಿದರೆ ಇಂಗ್ಲಿಷ್ ಭಾಷೆ ಹೆಚ್ಚು ಸಮರ್ಥವಾಗಿರುವುದು ಕೊನೆಗೂ ಅಲ್ಲಿ ಸಾಬೀತಾಯಿತು.

ಚೀನಾದ ಒಟ್ಟು ಜನಸಂಖ್ಯೆಯಾಗಿರುವ 138 ಕೋಟಿಯಲ್ಲಿ ಮಂಡಾರಿನ್ ಭಾಷೆ ಆಡುವವರ ಸಂಖ್ಯೆ 90 ಕೋಟಿ ಇದ್ದರೂ ಡಿಜಿಟಲ್ ಮತ್ತು ಉದ್ದಿಮೆ ವಹಿವಾಟಿನ ಜಗತ್ತಿನಲ್ಲಿ ಇಂಗ್ಲಿಷ್ ಭಾಷೆಯ ಪಾರಮ್ಯಕ್ಕೆ ಎದುರಾಗಿದ್ದ ದೊಡ್ಡ ಬೆದರಿಕೆಯೊಂದು ದೂರವಾಯಿತು.

ಚೀನಾದ ಹಲವಾರು ವಾಣಿಜ್ಯ ಕೂಟಗಳೂ ಇಂಗ್ಲಿಷ್ ಪ್ರಭಾವವನ್ನು ಅನಿವಾರ್ಯವಾಗಿ ಒಪ್ಪಿಕೊಂಡವು. ಮಂಡಾರಿನ್ ಬದಲಿಗೆ ಇಂಗ್ಲಿಷ್ಗೆ ಆದ್ಯತೆ ನೀಡಲಾರಂಭಿಸಿದವು. ಇದರಿಂದಾಗಿ ಇಂಗ್ಲಿಷ್ ಮಾತನಾಡುವ ಮ್ಯಾನೇಜರ್ಗಳಿಗಾಗಿ ಭಾರಿ ಬೇಡಿಕೆ ಕಂಡು ಬಂದಿತು. ಲಕ್ಷಾಂತರ ವಿದ್ಯಾರ್ಥಿಗಳು ತಮ್ಮ ಇಂಗ್ಲಿಷ್ ಭಾಷಾ ಕೌಶಲ ಹೆಚ್ಚಿಸಿಕೊಳ್ಳಲು ಉನ್ನತ ವಿದ್ಯಾಭ್ಯಾಸ ನೆಪದಲ್ಲಿ ಅಮೆರಿಕೆಗೆ ಪ್ರಯಾಣ ಬೆಳೆಸಿದರು.

ಕ್ರಮೇಣ ಇಂಗ್ಲಿಷ್್ ಭಾಷೆಯು ದಕ್ಷಿಣ ಅಮೆರಿಕ ಮತ್ತು ಇತರ ಸಮಾಜವಾದಿ ದೇಶಗಳಾದ ರಷ್ಯಾ, ಉಕ್ರೇನ್ ಮತ್ತಿತರ ದೇಶಗಳನ್ನೂ ಪ್ರವೇಶಿಸಿತು.

ಇತ್ತೀಚೆಗೆ ನಾನು ಬ್ರೆಜಿಲ್ಗೆ ಭೇಟಿ ನೀಡಿದಾಗ ಅಲ್ಲಿನ ಬಹುತೇಕ ಉದ್ಯಮಿಗಳು ಇಂಗ್ಲಿಷ್ನಲ್ಲಿಯೇ ಮಾತನಾಡುವುದನ್ನು ರೂಢಿಸಿಕೊಂಡಿರುವುದನ್ನು ಅಥವಾ ಅನುವಾದಕರನ್ನು ನೇಮಿಸಿಕೊಂಡಿರುವುದು ನನ್ನ ಅನುಭವಕ್ಕೆ ಬಂದಿತು.

ಜಾಗತಿಕ ಉದ್ಯಮ ಲೋಕದಲ್ಲಿ ಇಂಗ್ಲಿಷ್್ ಭಾಷೆಯ ಪ್ರಭಾವದ ಕುರಿತು, ಇತ್ತೀಚೆಗೆ ಪ್ರಮುಖ ಇಂಗ್ಲಿಷ್ ಹಣಕಾಸು ದಿನಪತ್ರಿಕೆಯೊಂದರಲ್ಲಿ ‘ಇಂಗ್ಲಿಷೀಕರಣ’ ಕುರಿತು ಲೇಖನವೊಂದು ಪ್ರಕಟಗೊಂಡಿತ್ತು. ಹಾರ್ವರ್ಡ್ ಬಿಸಿನೆಸ್ ಸ್ಕೂಲ್ನ ತ್ಸೆಡಲ್ ನೀಲೆ ಅವರನ್ನು ಉದ್ಧರಿಸಿ ಈ ಲೇಖನ ಬರೆಯಲಾಗಿತ್ತು.

ಲೆನೊವಾ, ಲುಫ್ತಾನ್ಸಾ, ಆಡಿ ಮತ್ತಿತರ ಸಂಸ್ಥೆಗಳು, ವಿಶ್ವದಾದ್ಯಂತ ತಮ್ಮ ವಹಿವಾಟಿನಲ್ಲಿ ಇಂಗ್ಲಿಷ್ ಅನ್ನು ಅಧಿಕೃತ ಭಾಷೆಯನ್ನಾಗಿ ಅಳವಡಿಸಿಕೊಂಡಿವೆ. ಈ ಬದಲಾವಣೆ ಫಲವಾಗಿ ಇಂತಹ ಸಂಸ್ಥೆಗಳಲ್ಲಿ ಪ್ರತಿಭಾನ್ವಿತರನ್ನು ನೇಮಿಸಿಕೊಳ್ಳುವ ಪ್ರಕ್ರಿಯೆ ಹೆಚ್ಚು ಸುಲಭವಾಗಿದೆ.

ಬ್ರಿಟಿಷರ ಆಡಳಿತದ ಬಳುವಳಿಯು ಜಾಗತಿಕ ಉದ್ಯಮ ಲೋಕದ ಉದ್ಯೋಗ ಅವಕಾಶಗಳಲ್ಲಿ ಭಾರತದ ಯುವ ಜನಾಂಗವು ಮುಂಚೂಣಿಯಲ್ಲಿ ಇರಲು ಅಪರೂಪದ ಅನುಕೂಲತೆ ಕಲ್ಪಿಸಿಕೊಟ್ಟಿದೆ. ಇದೊಂದು ನಿಜವಾಗಿಯೂ ಅನುಕೂಲತೆಯೇ ಎನ್ನುವ ಪ್ರಶ್ನೆಯೂ ಇಲ್ಲಿ ಉದ್ಭವಿಸುತ್ತದೆ. ಐತಿಹಾಸಿಕವಾಗಿ, ದೊಡ್ಡ ಮಹಾನಗರಗಳಲ್ಲಿನ ಯುವ ಜನಾಂಗವು ಸಹಜವಾಗಿಯೇ ಹೆಚ್ಚು ಪ್ರಯೋಜನ ಪಡೆದುಕೊಂಡಿದ್ದರೆ, ಗ್ರಾಮೀಣ ಯುವ ಜನತೆ ಈ ಅವಕಾಶ ಸದುಪಯೋಗ ಮಾಡಿಕೊಳ್ಳುವಲ್ಲಿ ಹಿಂದೆ ಬಿದ್ದಿದೆ.

ದೇಶದ ಇತರ ಅನೇಕ ಭಾಗಗಳಲ್ಲಿನ ಯುವಕರು ಇಂಗ್ಲಿಷ್್ ಭಾಷೆಯಲ್ಲಿ ಪರಿಣತಿ ಪಡೆಯುವಲ್ಲಿ ಹಿಂದೆ ಬಿದ್ದಿರುವುದು ನಿರಾಶೆ ಮೂಡಿಸುತ್ತದೆ. ಭಾರತೀಯ ಕೈಗಾರಿಕಾ ಒಕ್ಕೂಟವು (ಸಿಐಐ) ಇತ್ತೀಚೆಗೆ ನಡೆಸಿದ ಅಧ್ಯಯನದಲ್ಲಿಯೂ ಈ ವಿಷಯ ಸ್ಪಷ್ಟವಾಗಿದೆ.

ವ್ಯವಸ್ಥೆಯಲ್ಲಿನ ಎಲ್ಲ ದೋಷಗಳಿಗೆ ಸರ್ಕಾರವನ್ನೇ ಹೊಣೆ ಮಾಡುವುದು ತುಂಬ ಸುಲಭ. ಆದರೆ, ಇದರಿಂದ ಹೆಚ್ಚಿನ ಪ್ರಯೋಜನ ದೊರೆಯದು. ಶಿಕ್ಷಣ ವ್ಯವಸ್ಥೆಯೊಂದಿಗೆ ಸಂಬಂಧ ಹೊಂದಿರುವ ಪ್ರತಿಯೊಬ್ಬರಲ್ಲಿಯೂ ಈ ಬಗ್ಗೆ ತಿಳಿವಳಿಕೆ ಮೂಡುವ ಕೆಲಸ ನಡೆಯಬೇಕು. ಪಾಲಕರು ಮತ್ತು ಯುವ ಸಮೂಹದಲ್ಲಿ ಈ ಬಗ್ಗೆ ಹೆಚ್ಚು ಎಚ್ಚರ ಮೂಡುವ ಅಗತ್ಯವೂ ಇದೆ.

ಬ್ರಿಟಿಷ್ ಸಾಮ್ರಾಜ್ಯದಲ್ಲಿ ಸೂರ್ಯ ಮುಳುಗುವುದೇ ಇಲ್ಲ ಎಂದು ಈ ಹಿಂದೆ ಬ್ರಿಟಿಷರು ತುಂಬ ಹೆಮ್ಮೆಯಿಂದಲೇ ಹೇಳಿಕೊಳ್ಳುತ್ತಿದ್ದರು. ಸುಮಾರು 80 ವರ್ಷಗಳ ನಂತರವೂ ಇಂದಿನ ಜಾಗತಿಕ ಅರ್ಥ ವ್ಯವಸ್ಥೆಯಲ್ಲಿಯೂ ಈ ಮಾತು ಹೆಚ್ಚು ಪ್ರಸ್ತುತವಾಗಿದೆ. ಭಾರತ ಮತ್ತು ಇಲ್ಲಿನ ಯುವ ಜನತೆ ಇಂಗ್ಲಿಷ್ನಲ್ಲಿಯೇ ಜಾಗತಿಕವಾಗಿ ಚಿಂತಿಸುವುದರ ಮೂಲಕ ಉದ್ಯೋಗ ರಂಗದಲ್ಲಿನ ವಿಪುಲ ಸದವಕಾಶಗಳನ್ನು ಬಾಚಿಕೊಳ್ಳಬೇಕಾಗಿದೆ.

ನಿಮ್ಮ ಅನಿಸಿಕೆ ತಿಳಿಸಿ: editpagefeedback@prajavani.co.in

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಜಾಗತಿಕ ಉದ್ಯಮ ಲೋಕದಲ್ಲಿ ಇಂಗ್ಲಿಷ್‌ ಪ್ರಭಾವ

ಚಿನಕುರುಳಿ | 06 ಜುಲೈ 2025, ಭಾನುವಾರ

ವಾರ ಭವಿಷ್ಯ: 06-7-2025ರಿಂದ 12-7-2025 ರವರೆಗೆ- ಆಭರಣ ವ್ಯಾಪಾರಿಗಳಿಗೆ ಲಾಭ

IND vs ENG U19: ಅತಿ ವೇಗದ ಶತಕ ಸಿಡಿಸಿ ಇತಿಹಾಸ ನಿರ್ಮಿಸಿದ ವೈಭವ್ ಸೂರ್ಯವಂಶಿ

ತುಮಕೂರಿನಲ್ಲಿ ದಾವಣಗೆರೆ ಪಿಎಸ್‌ಐ ಬಿ.ಆರ್‌.ನಾಗರಾಜಪ್ಪ ಆತ್ಮಹತ್ಯೆ

ENG vs IND Test | ಆಂಗ್ಲರಿಗೆ ಆಕಾಶ್ ಆಘಾತ: ಭಾರತಕ್ಕೆ 336 ರನ್ ಜಯ

ಲಂಡನ್‌ನಲ್ಲಿ ಮಹಿಳಾ ಕ್ರಿಕೆಟ್ ತಂಡಕ್ಕೆ ಅದ್ದೂರಿ ಸ್ವಾಗತ

ENG vs IND | ಪಂದ್ಯವೊಂದರಲ್ಲಿ ಗರಿಷ್ಠ ಮೊತ್ತ: ಇಂಗ್ಲೆಂಡ್ ಪರ ಸ್ಮಿತ್ ದಾಖಲೆ

'ಇದಕ್ಕೆಲ್ಲ ಅರ್ಹ ನೀನು': ದಾಖಲೆ ಬರೆದ ಗಿಲ್‌ಗೆ ಬೆನ್ನುತಟ್ಟಿದ ಕೊಹ್ಲಿ

ಒಳನೋಟ | ಬೇಸಾಯಕ್ಕೆ ಯುವಜನ ಬೇಕಾಗಿದ್ದಾರೆ! ಕೃಷಿ ಒಲ್ಲೆ ಎನ್ನುವವರೇ ಹೆಚ್ಚು

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಚಿನಕುರುಳಿ | 06 ಜುಲೈ 2025, ಭಾನುವಾರ

ವಾರ ಭವಿಷ್ಯ: 06-7-2025ರಿಂದ 12-7-2025 ರವರೆಗೆ- ಆಭರಣ ವ್ಯಾಪಾರಿಗಳಿಗೆ ಲಾಭ

IND vs ENG U19: ಅತಿ ವೇಗದ ಶತಕ ಸಿಡಿಸಿ ಇತಿಹಾಸ ನಿರ್ಮಿಸಿದ ವೈಭವ್ ಸೂರ್ಯವಂಶಿ

ತುಮಕೂರಿನಲ್ಲಿ ದಾವಣಗೆರೆ ಪಿಎಸ್‌ಐ ಬಿ.ಆರ್‌.ನಾಗರಾಜಪ್ಪ ಆತ್ಮಹತ್ಯೆ