ಅಂಕಣ | ವೈರಾಣು ಸೃಷ್ಟಿ ಮತ್ತು ಮಾರ್ಗದರ್ಶಿ ಸೂತ್ರ

ಪ್ರಪಂಚದ ಎಲ್ಲ ದೇಶಗಳನ್ನು ಕಾಡಿದ ಸಾರ್ಸ್-ಕೋವಿಡ್-2 ಮತ್ತು ಓಮೈಕ್ರಾನ್ ತಳಿಯ ಜೀನೀಯ ದ್ರವ್ಯದಿಂದ ಕೊರೊನಾ ವೈರಾಣುವಿನ ಹೊಸ ತಳಿಸೃಷ್ಟಿಯಾಗಿರುವುದು ಅಮೆರಿಕದ ಬಾಸ್ಟನ್ ವಿಶ್ವವಿದ್ಯಾಲಯದ ‘ನ್ಯಾಷನಲ್ ಎಮರ್ಜಿಂಗ್ ಇನ್ಫೆಕ್ಷಸ್ ಡಿಸೀಸ್ ಲ್ಯಾಬೊರೇಟರೀಸ್’ನಲ್ಲಿ. ಹಿಂದಿನ ವರ್ಷದ ಅಕ್ಟೋಬರ್ ಮಧ್ಯಭಾಗದಲ್ಲಿ ಬಾಸ್ಟನ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಈ ವಿಷಯವನ್ನು ಪ್ರಕಟಿಸುತ್ತಿದ್ದಂತೆ, ಕೋವಿಡ್– 19 ತಂದ ಆಘಾತದಿಂದ ಆಗತಾನೆ ಚೇತರಿಸಿಕೊಳ್ಳುತ್ತಿದ್ದ ಬಹುತೇಕ ದೇಶಗಳು, ಈ ಪ್ರಯೋಗವನ್ನು ‘ಗೆಯ್ನ್ ಆಫ್ ಫಂಕ್ಷನ್’ ಅಥವಾ ‘ಕಾರ್ಯವೃದ್ಧಿ’ ಪ್ರಯೋಗವೆಂದು ಕಟುವಾಗಿ ಟೀಕಿಸಿ, ಖಂಡಿಸಿದವು.

ಪ್ರಕೃತಿಯಲ್ಲಿರುವ ವೈರಾಣುಗಳು ಕಾಲಾನುಕ್ರಮ ದಲ್ಲಿ ಸಹಜವಾಗಿಯೇ ವ್ಯತ್ಯಯಗೊಳ್ಳುತ್ತವೆ. ಇಂಥವು ಅಪಾಯಕಾರಿಯೂ ಆಗಬಹುದು. ಪ್ರಕೃತಿಯಲ್ಲಿರುವ ವೈರಾಣುಗಳನ್ನು ಬಳಸಿ, ರೋಗ ಹರಡುವ ಅವುಗಳ ಸಾಮರ್ಥ್ಯ, ವೇಗದಂತಹವುಗಳನ್ನು ಅಪಾಯಕಾರಿಯಾದ ರೀತಿಯಲ್ಲಿ ವೃದ್ಧಿಸಿ, ಅವು ರೂಪಾಂತರಗೊಳ್ಳುವ ರೀತಿ, ರೋಗ ಪ್ರಸರಣ ವಿಧಾನವನ್ನು ಮುಂಚಿತವಾಗಿಯೇ ತಿಳಿಯುವುದು ಈ ಕಾರ್ಯವೃದ್ಧಿ ಸಂಶೋಧನೆಯ ಉದ್ದೇಶ. ಅಂತಹ ಜ್ಞಾನದಿಂದ ಕೋವಿಡ್‍ನಂತಹ ರೋಗ ಬರುವ ಮುಂಚೆಯೇ ಅದನ್ನು ಸಮರ್ಥವಾಗಿ ಎದುರಿಸಲು ಬೇಕಾದ ಸಿದ್ಧತೆ ಸಾಧ್ಯವಾಗುತ್ತದೆ ಎಂಬುದು ವಿಜ್ಞಾನಿಗಳ ಸಮರ್ಥನೆ. ಕೋವಿಡ್– 19 ವಿರುದ್ಧ ಅತ್ಯಂತ ತ್ವರಿತಗತಿಯಲ್ಲಿ ವ್ಯಾಕ್ಸಿನ್ ಸಿದ್ಧಪಡಿಸಲು ಸಾಧ್ಯವಾದದ್ದು ಅಂಥ ಜ್ಞಾನ ಲಭ್ಯವಿದ್ದುದರಿಂದ ಎಂಬ ವಾದವಿದೆ. ಅದು ನಿಜವಾಗಿದ್ದಲ್ಲಿ, ಆ ವೇಳೆಗಾಗಲೇ ಕೊರೊನಾ ವೈರಾಣು ಗೋಪ್ಯವಾದ ಪ್ರಯೋಗಗಳಿಗೆ ಒಳಗಾಗಿತ್ತು ಎಂದಾಗುತ್ತದೆ. ಹಾಗಾದರೆ ಪ್ರಯೋಗಾಲಯದಿಂದ ಆಕಸ್ಮಿಕವಾಗಿ ಸೋರಿಕೆಯಾದ ಕೊರೊನಾ ವೈರಾಣುವಿನಿಂದ ಕೋವಿಡ್ ಹರಡಿತೇ? ಈ ಪ್ರಶ್ನೆಗೆ ಖಚಿತ ಉತ್ತರ ದೊರೆತಿಲ್ಲ.

ಅಮೆರಿಕ, ಇಂಗ್ಲೆಂಡ್, ಇಸ್ರೇಲ್, ಯುರೋಪ್‍ನ ಅನೇಕ ವಿಶ್ವವಿದ್ಯಾಲಯಗಳು, ಸಂಶೋಧನಾ ಸಂಸ್ಥೆಗಳ ವಿಜ್ಞಾನಿಗಳು, ವೈದ್ಯರು, ಸಾರ್ವಜನಿಕ ಸಂಘಟನೆಗಳು, ಮಾಧ್ಯಮಗಳಿಂದ ಪ್ರಯೋಗಕ್ಕೆ ಬಂದ ತೀವ್ರ ಟೀಕೆಗೆ ಪ್ರತಿಕ್ರಿಯಿಸಿರುವ ಪ್ರಯೋಗಾಲಯದ ನಿರ್ದೇಶಕ
ಡಾ. ರೊನಾಲ್ಡ್ ಕೋರ್ಲೇ ‘ನಮ್ಮ ದೇಹದ ರೋಗ ರಕ್ಷಣಾ ವ್ಯವಸ್ಥೆ ಮತ್ತು ವ್ಯಾಕ್ಸಿನ್‍ಗಳು ನೀಡುವ ವಿಶೇಷ ರಕ್ಷಣೆಗಳ ಕಣ್ತಪ್ಪಿಸಿ ಓಮೈಕ್ರಾನ್ ವೈರಾಣು ಹೇಗೆ ನಮ್ಮ ದೇಹವನ್ನುಪ್ರವೇಶಿಸುತ್ತದೆ ಎಂಬುದನ್ನು ತಿಳಿಯುವುದು ಈ ಪ್ರಯೋಗದ ಮುಖ್ಯ ಉದ್ದೇಶವಾಗಿತ್ತು. ಅದು ಕಾರ್ಯವೃದ್ಧಿ ಪ್ರಯೋಗವಾಗಿರಲಿಲ್ಲ. ಇಲಿಗಳ ಮೇಲೆ ನಡೆಸಿದ ಪ್ರಯೋಗಗಳಿಂದ, ಹೊಸ ಕೋವಿಡ್ ವೈರಾಣು ಈ ಮೊದಲಿನ ಸಾರ್ಸ್-ಕೋವಿಡ್-19 ವೈರಾಣುವಿನಷ್ಟು ತೀವ್ರವಾದುದೂ ಅಲ್ಲ, ಬೇಗ ರೋಗ ಹರಡುವುದೂ ಇಲ್ಲ ಎಂಬ ವಿಷಯ ತಿಳಿದುಬಂದಿದೆ. ಅತ್ಯಂತ ಸುರಕ್ಷಿತ ಪ್ರಯೋಗಾಲಯದಲ್ಲಿ ನಡೆದಿರುವ ಈ ಪ್ರಯೋಗದಿಂದ ಅಪಾಯದ ಸಾಧ್ಯತೆ ಇಲ್ಲವೇ ಇಲ್ಲ’ ಎಂದಿದ್ದಾರೆ. ಆದರೆ ಹೊಸ ತಳಿಯ ಕೊರೊನಾ ವೈರಾಣುವನ್ನು ಸೃಷ್ಟಿಸಿರುವ ಈ ಪ್ರಯೋಗ ಮತ್ತು ಕಾರ್ಯವೃದ್ಧಿ ಪ್ರಯೋಗಗಳ ನಡುವಿನ ವ್ಯತ್ಯಾಸ ತೀರಾ ಗೌಣವೆಂಬುದು ಅನೇಕ ವೈದ್ಯ ವಿಜ್ಞಾನಿಗಳ ಅಭಿಪ್ರಾಯ.

ಅಮೆರಿಕದ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಹೆಲ್ತ್ ಸಂಸ್ಥೆಯ ಭಾಗವಾದ ‘ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಅಲರ್ಜಿ ಆ್ಯಂಡ್ ಇನ್ಫೆಕ್ಷಸ್ ಡಿಸೀಸ್’ (ಎನ್‍ಐಎಐಡಿ) ಸಂಸ್ಥೆಯು ಬಾಸ್ಟನ್ ವಿಶ್ವವಿದ್ಯಾಲಯದ ಪ್ರಯೋಗಕ್ಕೆ ಅನುದಾನ ನೀಡಿತ್ತು. ಆದರೆ ಆ ಸಂಶೋಧನೆಯ ಎಲ್ಲ ವಿವರಗಳೂ ತನಗೆ ತಿಳಿದಿರಲಿಲ್ಲ ಎಂದು ಅದೀಗ ತಿಳಿಸಿದೆ. ‘ಬಾಸ್ಟನ್ ಪಬ್ಲಿಕ್ ಕಮಿಷನ್ ಮತ್ತು ವಿಶ್ವವಿದ್ಯಾಲಯದಲ್ಲೇ
ಇರುವ ಜೈವಿಕ ಪ್ರಯೋಗ ಸುರಕ್ಷತಾ ಪರಿಶೀಲನಾ ಸಮಿತಿ ನಮ್ಮ ಪ್ರಯೋಗಗಳಿಗೆ ಅನುಮೋದನೆ ನೀಡಿದ್ದವು’ ಎಂಬ ಸಂಶೋಧಕರ ವಿವರಣೆಯನ್ನು ಬಹುತೇಕ ವಿಜ್ಞಾನಿಗಳು, ವೈಜ್ಞಾನಿಕ ಸಂಶೋಧನಾ ಸಂಸ್ಥೆಗಳು ಸುತರಾಂ ಒಪ್ಪಿಲ್ಲ. ಗೆಯ್ನ್ ಆಫ್ ಫಂಕ್ಷನ್ ಪ್ರಯೋಗ ಗಳನ್ನು ಜೈವಿಕ ಸಮರದ ಪ್ರಬಲ ಅಸ್ತ್ರವನ್ನಾಗಿ ಬಳಸುವ ಸಾಧ್ಯತೆಯನ್ನು 2010ರಲ್ಲೇ ಸ್ಪಷ್ಟವಾಗಿ ಗುರುತಿಸಿದ್ದ ವಿಶ್ವ ಆರೋಗ್ಯ ಸಂಸ್ಥೆಯು ‘ಡ್ಯೂಯಲ್ ಯೂಸ್ ರಿಸರ್ಚ್ ಆಫ್ ಕನ್ಸರ್ನ್’ ಎಂಬ ಶೀರ್ಷಿಕೆಯ ಮಾರ್ಗದರ್ಶಿ ಸೂತ್ರಗಳನ್ನು ಎಲ್ಲ ದೇಶಗಳಿಗೆ ನೀಡಿತ್ತು.

ಶಾಂತಿಯುತ ಉದ್ದೇಶಗಳಿಗಾಗಿ ಕೈಗೊಳ್ಳುವ, ಆದರೆ ಮಿಲಿಟರಿ ಗುರಿ ಸಾಧನೆಗಾಗಿ ಬಳಸಬಹುದಾದ ಜೀವವಿಜ್ಞಾನ, ಜೈವಿಕ ವೈದ್ಯಕೀಯ ಕ್ಷೇತ್ರದ ಎಲ್ಲ ಸಂಶೋಧನೆಗಳಿಗೆ ಈ ಸೂತ್ರಗಳು ಅನ್ವಯವಾಗುತ್ತವೆ. ಈ ಸಲಹಾ ಸೂತ್ರಗಳಂತೆ, ಇಂಥ ಪ್ರಯೋಗ ಗಳನ್ನು ನಡೆಸುವ ಪ್ರಯೋಗಾಲಯಗಳು, ಅತ್ಯುತ್ಕೃಷ್ಟ ಮಟ್ಟದ ‘ಬಯೋ ಸೇಫ್ಟಿ ಲೆವೆಲ್- 4’ ಎಂಬ ಸುರಕ್ಷತಾ ಕ್ರಮಗಳನ್ನು ಅಳವಡಿಸಿಕೊಳ್ಳಬೇಕು. 2014ರಲ್ಲಿ ಈ ಮಾರ್ಗದರ್ಶಿ ಸೂತ್ರಗಳನ್ನು ವಿಶದವಾಗಿ ಪರಿಶೀಲಿಸಿದ ಜೈವಿಕ ನೀತಿ ತತ್ವಗಳ (ಬಯೋಎಥಿಕ್ಸ್) ಪ್ರಸಿದ್ಧ ಪ್ರಾಧ್ಯಾಪಕ ಮೈಕೆಲ್ ಸೆಲ್ಗೆಲಿಡ್ ಅವರು, ಪ್ರಪಂಚದ ಅನೇಕ ದೇಶಗಳಲ್ಲಿ ಅತ್ಯುನ್ನತ ಮಟ್ಟದ ಸುರಕ್ಷತೆಯ ವ್ಯವಸ್ಥೆಯಿಲ್ಲದಿದ್ದರೂ ಅಪಾಯಕಾರಿ ಪ್ರಯೋಗಗಳು ನಡೆಯುತ್ತಿರುವ ಸಾಧ್ಯತೆಯನ್ನು ಎತ್ತಿ ತೋರಿದರು. ಈ ರೀತಿಯ ಪ್ರಯೋಗಗಳು ಬಹಳ ಗೋಪ್ಯವಾಗಿ, ಅಪಾರ ದರ್ಶಕವಾಗಿ ನಡೆಯುವುದರಿಂದ, ಅನಿರೀಕ್ಷಿತವಾಗಿಇಡೀ ಪ್ರಪಂಚವೇ ಪ್ರಾಣಾಂತಿಕ ಪರಿಣಾಮಗಳನ್ನು ಎದುರಿಸುವ ಸಂದರ್ಭ ಬರುತ್ತದೆ ಎಂಬ ಎಚ್ಚರಿಕೆಯು ಕೋವಿಡ್- 19ರ ಪ್ರಕರಣದಲ್ಲಿ ನಿಜವಾಗಿತ್ತು.

ಬಾಸ್ಟನ್ ಪ್ರಯೋಗದ ಸಾಧಕ- ಬಾಧಕಗಳ ಚರ್ಚೆ ತಾರಕಕ್ಕೇರುತ್ತಿದ್ದ ಸಮಯದಲ್ಲೇ, ಈ ವರ್ಷದ ಜನವರಿ ಮಧ್ಯಭಾಗದಲ್ಲಿ, ಅಪಾಯಕಾರಿ ವೈರಾಣುಗಳಿಗೆ ಸಂಬಂಧಿಸಿದ ಸಂಶೋಧನೆಗಳ ಕಟ್ಟುನಿಟ್ಟಾದ ನಿಯಂತ್ರಣಕ್ಕೆ ಸಂಬಂಧಿಸಿದ ಕರಡು ವರದಿಯೊಂದನ್ನು ಅಮೆರಿಕದ ‘ನ್ಯಾಷನಲ್ ಸೈನ್ಸ್ ಅಡ್ವೈಸರಿ ಬೋರ್ಡ್ ಫಾರ್ ಬಯೋಸೇಫ್ಟಿ’ (ಎನ್‍ಎಸ್‍ಎಬಿಬಿ) ಪ್ರಕಟಿಸಿದ್ದು, ಅದು ಸಾರ್ವಜನಿಕ ವಲಯದಲ್ಲಿ ಲಭ್ಯವಿದೆ. ಜನವರಿ 27ರಂದು, ಎನ್‍ಎಸ್‍ಎಬಿಬಿಯಲ್ಲಿ ನಡೆದ ಸಮಾಲೋಚನಾ ಸಭೆಯಲ್ಲಿ ವಿವಿಧ ಕ್ಷೇತ್ರಗಳ ಪರಿಣತರ ತಂಡ ಈ ವರದಿಯನ್ನು ಕೂಲಂಕಷವಾಗಿ ಪರಿಶೀಲಿಸಿದೆ.

‘ಸಂಶೋಧನೆಗೆ ಅನುಮೋದನೆ ಮತ್ತು ಅನುದಾನ ಪಡೆಯಲು ಅರ್ಜಿ ಸಲ್ಲಿಸುವ ಹಂತದಲ್ಲಿಯೇ ಪ್ರಯೋಗ ದಲ್ಲಿರುವ ಅಪಾಯದ ಸಾಧ್ಯತೆ ಮತ್ತು ದೊರೆಯುವ ಪ್ರಯೋಜನಗಳನ್ನು ಅನುಮಾನಕ್ಕೆ ಆಸ್ಪದವಿಲ್ಲದಂತೆ ಸ್ಪಷ್ಟವಾಗಿ ನಿರೂಪಿಸಬೇಕು, ಸಂಶೋಧನೆಯ ಪ್ರಸ್ತಾಪ ವನ್ನು ಪರಿಶೀಲಿಸುವ ಪರಿಣತರ ಹಿನ್ನೆಲೆ, ಪರಿಶೀಲನೆಯ ವಿಧಾನದಂತಹವು ಸಂಪೂರ್ಣ ಪಾರದರ್ಶಕವಾಗಿರಬೇಕು, ಖಾಸಗಿ ಸಂಸ್ಥೆಗಳ ಅನುದಾನದಿಂದ ನಡೆಯುವ ಅಪಾಯಕಾರಿ ವೈರಾಣುಗಳ ಸಂಶೋಧನೆಗೂ ಈ ಕಟ್ಟುಪಾಡುಗಳು ಅನ್ವಯವಾಗಬೇಕು, ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಹೆಲ್ತ್ ನೆರವಿನಿಂದ ಬೇರೆಯ ದೇಶಗಳಲ್ಲಿ ನಡೆಯುತ್ತಿರುವ ಕಾರ್ಯವೃದ್ಧಿ ಸ್ವರೂಪದ ಸಂಶೋಧನೆಗಳ ಮೇಲೂ ಕಟ್ಟುನಿಟ್ಟಾದ ಕಣ್ಗಾವಲಿರಬೇಕು, ಪ್ರಯೋಗಾಲಯ ಸೌಲಭ್ಯ, ಸುರಕ್ಷತಾ ಕ್ರಮಗಳು ಅಂತರರಾಷ್ಟ್ರೀಯ ತಜ್ಞರ ಪರಿಶೀಲನೆಗೆ ಮುಕ್ತವಾಗಿರಬೇಕು’ ಎಂಬಂತಹ ಬದಲಾವಣೆಗಳನ್ನು ಸೂಚಿಸಲಾಗಿದೆ.

ಈ ಎಲ್ಲ ಬದಲಾವಣೆಗಳನ್ನೂ ಒಳಗೊಂಡ ಸಮಗ್ರ ಮಾರ್ಗದರ್ಶಿ ಸೂತ್ರಗಳು ಮುಂದಿನ ಮೂರು ತಿಂಗಳ ಒಳಗಾಗಿ ಅಂತಿಮಗೊಳ್ಳುವ ನಿರೀಕ್ಷೆಯಿದೆ. ಅಂತರರಾಷ್ಟ್ರೀಯ ಕಾನೂನುಗಳನ್ನು ಗೌರವಿಸಿ, ಮನ್ನಣೆ ನೀಡುವ ಎಲ್ಲ ದೇಶಗಳೂ ಈ ಮಾರ್ಗದರ್ಶಿ ಸೂತ್ರಗಳನ್ನು
ಅನುಸರಿಸುತ್ತವೆ. ಆದರೆ ನಿಜವಾದ ಅಪಾಯವಿರುವುದು ನಾಗರಿಕ ಪ್ರಪಂಚದ ಅಂತಹ ಎಲ್ಲ ನಿಬಂಧನೆಗಳನ್ನೂ ಧಿಕ್ಕರಿಸಿ, ಅಪಾಯಕಾರಿ ವೈರಾಣು ಪ್ರಯೋಗಗಳನ್ನು ಗೋಪ್ಯವಾಗಿ ನಡೆಸಿ, ಆಕಸ್ಮಿಕವಾಗಿಯೋ ಅಥವಾ ಉದ್ದೇಶಪೂರ್ವಕವಾಗಿಯೋ ಇಡೀ ಜಗತ್ತನ್ನೇ ಅಪಾಯದ ಅಂಚಿಗೆ ತಳ್ಳುವ ಪುಂಡ ದೇಶಗಳಿಂದ.