ಬುಧವಾರ, ನವೆಂಬರ್ 25, 2020
21 °C

ದಿನದ ಸೂಕ್ತಿ: ನಿಜವಾದ ಸಹಾಯ

ಎಸ್. ಸೂರ್ಯಪ್ರಕಾಶ ಪಂಡಿತ್‌ Updated:

ಅಕ್ಷರ ಗಾತ್ರ : | |

Prajavani

ಸಂತ ಏವ ಸತಾಂ ನಿತ್ಯಮಾಪತ್ತರಣಹೇತವಃ ।

ಗಜಾನಾಂ ಪಂಕಮಗ್ನಾನಾಂ ಗಜಾ ಏವ ಧುರಂಧರಾ ಃ ।।

ಇದರ ತಾತ್ಪರ್ಯ ಹೀಗೆ:

‘ಸಜ್ಜನರನ್ನು ಕಷ್ಟಗಳಿಂದ ಪಾರುಮಾಡಲು ಕಾರಣರಾಗಬಲ್ಲವರು ಸಜ್ಜನರೇ. ಕೆಸರಿನಲ್ಲಿ ಸಿಕ್ಕಿಹಾಕಿಕೊಂಡ ಆನೆಗಳನ್ನು ಮೇಲೆಳೆಯಬಲ್ಲವು ಆನೆಗಳೇ ತಾನೆ?’

ಇದೊಂದು ಅರ್ಥಗರ್ಭಿತವಾದ ಸುಭಾಷಿತ.

ಮೊದಲಿಗೆ ಒಂದು ಸರಳವಾದ ಉದಾಹರಣೆಯ ಮೂಲಕ ಇದನ್ನು ಅರ್ಥಮಾಡಿಕೊಳ್ಳಲು ನೋಡೋಣ. 

ನಮಗೆ ಈಗ ಸಾವಿರ ರೂಪಾಯಿಗಳ ಆವಶ್ಯಕತೆಯಿದೆ. ಸಾಲ ಮಾಡಬೇಕಿದೆ. ಅದನ್ನು ನಾವು ಯಾರ ಹತ್ತಿರ ಕೇಳುತ್ತೇವೆ? ಹೀಗೆ ಕೇಳುವಾಗ ಮುಖ್ಯವಾಗಿ ಎರಡು ಮಾನದಂಡಗಳನ್ನು ಬಳಸಿಕೊಳ್ಳುತ್ತೇವೆ. ಮೊದಲನೆಯದು: ನಮ್ಮ ಆತ್ಮೀಯರಲ್ಲಿಯೇ ಕೇಳಬೇಕು ಎಂದು ತೀರ್ಮಾನಿಸಿಕೊಳ್ಳುತ್ತೇವೆ. ಎರಡನೆಯದು: ಆತ್ಮೀಯರಷ್ಟೇ ಅಲ್ಲ, ಅವರು ನಮಗೆ ಆವಶ್ಯಕತೆ ಇರುವಷ್ಟು ಹಣವನ್ನು ಹೊಂದಿದವರೂ ಆಗಿರಬೇಕು; ನಮ್ಮ ಕಷ್ಟಕ್ಕೆ ಸ್ಪಂದಿಸಬಲ್ಲವರೂ ಆಗಿರಬೇಕು. ಎಂದರೆ ಒಂದು ರೀತಿಯಲ್ಲಿ ಅವರು ನಮ್ಮದೇ ಪ್ರತಿಬಿಂಬದಂತಿರಬೇಕು. 

ಇದು ಏಕೆಂದರೆ, ನಮ್ಮನ್ನು ಅರ್ಥಮಾಡಿಕೊಳ್ಳಬಲ್ಲವರಷ್ಟೆ ನಮ್ಮ ಬಗ್ಗೆ ಕಾಳಜಿಯನ್ನೂ ವಹಿಸಬಲ್ಲರು; ಸಹಾಯವನ್ನೂ ಮಾಡಬಲ್ಲವರು. ಅವರು ನಮ್ಮ ಆತ್ಮದ ವಿಸ್ತರಣವೇ ಆಗಿರುತ್ತಾರೆ. ಅಂಥವರು ಮಾತ್ರವೇ ನಮ್ಮ ಕಷ್ಟಕಾಲದಲ್ಲಿ ಒದಗುತ್ತಾರೆ. ನಮಗೆ ಅನಾರೋಗ್ಯ ಆವರಿಸಿಕೊಂಡಾಗ ನಮ್ಮ ಶರೀರವೇ ಅದರ ವಿರುದ್ಧ ಹೋರಾಡಬೇಕಾಗಿರುವುದು ಅಲ್ಲವೆ?

ಸುಭಾಷಿತ ಹೇಳುತ್ತಿರುವುದು ಇಂಥ ಸೂಕ್ಷ್ಮತೆಯ ಬಗ್ಗೆಯೇ ಹೌದು.

ಒಳ್ಳೆಯವರಿಗೆ ಒಳ್ಳೆಯವರಷ್ಟೇ ಸಹಾಯಕ್ಕೆ ನಿಲ್ಲಬಲ್ಲರು. ಇದನ್ನು ನಿರೂಪಿಸಲು ಸುಭಾಷಿತ ಬಳಸಿರುವ ಉದಾಹರಣೆಯೂ ಸೊಗಸಾಗಿದೆ. ಆನೆಯೊಂದು ಕೆಸರಿನಲ್ಲಿ ಸಿಕ್ಕಿಹಾಕಿಕೊಂಡಿದೆ. ಅದನ್ನು ಅಲ್ಲಿಂದ ಮೇಲಕ್ಕೆ ಎತ್ತಬೇಕು. ಅದನ್ನು ಅಲ್ಲಿಂದ ಎಳೆಯಲು ಆಗ ನಾವು ಆನೆಯನ್ನೇ ಬಳಸಬೇಕು. ಹೀಗಲ್ಲದೆ ಇನ್ನೊಂದು ಪ್ರಾಣಿಯನ್ನು, ಎಂದರೆ ಆನೆಗಿಂತಲೂ ಸಣ್ಣ ಪ್ರಾಣಿಯನ್ನು, ಬಳಸಿಕೊಂಡರೆ ಆನೆಯ ತೂಕವನ್ನು ಅದು ಜಗ್ಗಲಾರದು. 

ಇಂದು ನಮ್ಮ ಸಮಾಜ ಎದುರಿಸುತ್ತಿರುವ ಸಮಸ್ಯೆಗಳಿಗೂ ಈ ಉದಾಹರಣೆಯನ್ನು ವಿಸ್ತರಿಸಿ ನೋಡಬಹುದು. ನಮ್ಮ ಸಮಸ್ಯೆಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡು, ಅದಕ್ಕೆ ಯುಕ್ತ ರೀತಿಯಲ್ಲಿ ಸ್ಪಂದಿಸಿ, ಪರಿಹಾರವನ್ನು ಕಾಣಿಸಬಲ್ಲ ಧೀಮಂತ, ಸಮರ್ಥ ಜನನಾಯಕರು ನಮಗೆ ಇಂದು ಬೇಕಾಗಿದೆ. ಅಂಥವರ ಆಗಮನ ಆಗಲಿ; ಸಮಾಜದ ಏಳಿಗೆಯಾಗಲಿ ಎಂಬ ಹಾರೈಕೆಯನ್ನು ನಾವೆಲ್ಲರೂ ಮಾಡೋಣ.

 

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.