ಬಾಗಲಕೋಟೆ: ಕ್ಯಾಸಿನೊ ಮಾದರಿಯಲ್ಲಿ ಜೂಜಾಟ ನಡೆಸುತ್ತಿದ್ದ 3 ಕೇಂದ್ರಗಳ ಮೇಲೆ ಜಮಖಂಡಿ ಪೊಲೀಸರು ಸೋಮವಾರ ದಾಳಿ ನಡೆಸಿ 33 ಜನರನ್ನು ಬಂಧಿಸಿದ್ದಾರೆ.
ಜಮಖಂಡಿಯ ಕೆಲವು ಕಂಪ್ಯೂಟರ್ ಸೆಂಟರ್‌ಗಳಲ್ಲಿ ಈ ರೀತಿ ಜೂಜಾಟ ನಡೆಸಲಾಗುತ್ತಿದೆ ಎಂಬ ಮಾಹಿತಿ ಆಧರಿಸಿ ಪೊಲೀಸರು ದಾಳಿ ನಡೆಸಿದರು. ಕಂಪ್ಯೂಟರ್ ಪರದೆಯ ಮೇಲೆ ತಿರುಗುವ ಚಕ್ರಗಳಲ್ಲಿನ ಸಂಖ್ಯೆಯ ಮೇಲೆ ಬಾಜಿ ಕಟ್ಟಿಸಿಕೊಳ್ಳಲಾಗುತ್ತಿತ್ತು. ಕಟ್ಟಿದ ಸಂಖ್ಯೆಯ ಮೇಲೆ ಚಕ್ರ ನಿಂತಲ್ಲಿ ಬಾಜಿ ಕಟ್ಟಿದ ಮೊತ್ತದ ದುಪ್ಪಟ್ಟು ಹಣ ನೀಡಲಾಗುತ್ತಿತ್ತು.
ಈ ಜೂಜಾಟದ ಚಟಕ್ಕೆ ಕಾಲೇಜು ಕಲಿಯುವವರು ಸೇರಿದಂತೆ ಯುವ ಜನತೆ ಹೆಚ್ಚು ಬಲಿಯಾಗಿದ್ದರು. ಜೂಜಾಟ ಆಡಿಸುತ್ತಿದ್ದವರನ್ನು ಬಂಧಿಸಿ ಅವರಿಂದ ಒಟ್ಟು ₹ 39,240 ನಗದು, 47 ಕಂಪ್ಯೂಟರ್, 34 ಮೊಬೈಲ್ ಫೋನ್ ಹಾಗೂ 19 ಸಿಪಿಯುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಲೋಕೇಶ ಜಗಲಾಸರ್ ಮಾರ್ಗದರ್ಶನದಲ್ಲಿ ಜಮಖಂಡಿ ಸರ್ಕಲ್ ಇನ್‌ಸ್ಪೆಕ್ಟರ್ ವಿಜಯ ಮುರಗುಂಡಿ ನೇತೃತ್ವದಲ್ಲಿ ಸಬ್ಇನ್‌ಸ್ಪೆಕ್ಟರ್ ಎಚ್.ಡಿ.ಜಮಖಂಡಿ ಹಾಗೂ ಕೆ.ಟಿ.ಶೋಭಾ ಒಳಗೊಂಡ ತಂಡ ದಾಳಿ ನಡೆಸಿ ಮೂರು ಪ್ರತ್ಯೇಕ ಪ್ರಕರಣಗಳನ್ನು ದಾಖಲಿಸಿಕೊಂಡಿದೆ.
