ಬೀಳಗಿ: ಪಟ್ಟಣದ ಕಾಟಕರ ಓಣಿಯ ಹುಚ್ಚಪ್ಪಯ್ಯನ ಕಟ್ಟಿ ಹತ್ತಿರ ಮನೆಯೊಂದರಲ್ಲಿ ಶುಕ್ರವಾರ ರಾತ್ರಿ ಅಡುಗೆ ಅನಿಲ ಸಿಲಿಂಡರ್ ಗ್ಯಾಸ್ ಸ್ಪೋಟಗೊಂಡು ಮನೆಯಲ್ಲಿದ್ದ ಗರ್ಭಿಣಿ ಹಾಗೂ 2 ವರ್ಷದ ಮಗು ಸೇರಿ 7 ಜನರಿಗೆ ಗಾಯವಾಗಿದೆ.
ಲಕ್ಷ್ಮಿ ನರಸಿಂಹಪ್ಪ ಹೆಳವರ ಅವರು ಕುಂದರಗಿಯ ಸುರಗಿರಿ ಬೆಟ್ಟದ ಭುವನೇಶ್ವರಿ ದೇವಸ್ಥಾನದಿಂದ ಮನೆಗೆ ಬಂದು ಅವರ ಸೊಸೆ ಸವಿತಾ ಪ್ರವೀಣ ಹೆಳವರ ಮನೆಯೊಳಗೆ ಹೋಗಿ ವಿದ್ಯುತ್ ಬಟನ್ ಹಾಕಿದ ತಕ್ಷಣ ಗ್ಯಾಸ್ ಸಿಲಿಂಡರ್ ಸ್ಪೋಟಗೊಂಡಿದೆ.
ಸಿಲಿಂಡರ್ ಸ್ಫೋಟದಿಂದ ಸವಿತಾಗೆ ಗಾಯವಾಗಿದ್ದಲ್ಲದೇ, ಪಕ್ಕದ ಮನೆಯ ಕಟ್ಟೆಯ ಮೇಲೆ ಕುಳಿತಿದ್ದ 6 ಜನರಿಗೆ ಏಕಾಏಕಿ ಬೆಂಕಿ ತಗುಲಿ ಗಾಯವಾಗಿದೆ. ಮಹಿಳೆಯೊಬ್ಬರಿಗೆ ಹಾಗೂ 2 ವರ್ಷದ ಮಗುವಿಗೆ ಹೆಚ್ಚಿನ ಪ್ರಮಾಣದಲ್ಲಿ ದೇಹ ಸುಟ್ಟಿದೆ. ಬೀಳಗಿ ಸರ್ಕಾರಿ ಆಸ್ಪತ್ರೆಯಿಂದ ಹೆಚ್ಚಿನ ಚಿಕಿತ್ಸೆಗಾಗಿ ಬಾಗಲಕೋಟೆ ಆಸ್ಪತ್ರೆಗೆ ದಾಖಲಿಸಲಾಗಿದೆ.
