ಗುಳೇದಗುಡ್ಡ: ₹5 ಕೋಟಿ ನೀರಾವರಿ ಯೋಜನೆ ನಿಸ್ಪ್ರಯೋಜಕ

ಇಂಜಿನಿವಾರಿ ಗ್ರಾಮ ಹಳದೂರ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಸೇರಿದ ಮಲಪ್ರಭಾ ನದಿಯ ದಡದಲ್ಲಿರುವ ಗ್ರಾಮವು ಸಣ್ಣ ನೀರಾವರಿ ಇಲಾಖೆಯ ಆರ್‌ಐಡಿಎಫ್ 14ನೇ ಹಣಕಾಸು ಯೋಜನೆಯಡಿಯಲ್ಲಿ 2010 ರಲ್ಲಿ ₹4.99 ಕೋಟಿ ವೆಚ್ಚದಲ್ಲಿ 1225 ಎಕರೆ ಭೂಮಿಗೆ ನೀರು ಒದಗಿಸಲು ಸಿದ್ದಪಡಿಸಿದೆ. ಇಂಜಿನವಾರಿ ಏತ ನೀರಾವರಿ ಯೋಜನೆಯಿಂದ ರೈತರ ಕೃಷಿ ಭೂಮಿಗೆ ನೀರು ಒದಗಿಸಲು ಸಾಧ್ಯವಾಗಿಲ್ಲ. ಈ ಭಾಗದ ರೈತರ ಕನಸು ನನಸಾಗದೇ ಕನಸಾಗದೆ ಉಳಿದಿದೆ.

ಯೋಜನೆ ಅನಾನುಕೂಲ: ಒಂದು ವೇಳೆ ಕಾಲುವೆಗೆ ನೀರು ಹರಿಸಿದ್ದರೆ ಈ ಯೋಜನೆಯಿಂದ 1225 ಎಕರೆ ಕೃಷಿಭೂಮಿಗೆ ನೀರು ಒದಗಿಸಲಾಗುತ್ತಿತ್ತು. ವಾಸ್ತವದಲ್ಲಿ ಈ ಭಾಗದ ರೈತರ ಭೂಮಿಗಳು ನೀರಾವರಿಯಿಂದ ವಂಚಿತವಾಗಿವೆ. ರೈತರು ನೀರಿಲ್ಲದೆ, ಸರ್ಕಾರ ಮತ್ತು ಅಧಿಕಾರಿಗಳಿಗೆ ಹಿಡಿಶಾಪ ಹಾಕುವಂತಾಗಿದೆ.

ಕುಸಿದ ಕಾಲುವೆಗಳು: ಮಲಪ್ರಭಾ ನದಿಯ ದಂಡೆಯ ಮೇಲೆ ಇಂಜನವಾರಿ ಗ್ರಾಮದ ಹತ್ತಿರ ನಿರ್ಮಿಸಿದ ಪಂಪ್‍ಹೌಸ್ ನಿರ್ವಹಣೆಯಿಲ್ಲದೆ ಬಂದ್ ಆಗಿದೆ. ಅದಕ್ಕೆ ಬೀಗ ಜಡಿದು ಹಲವು ವರ್ಷಗಳೇ ಕಳೆದಿವೆ. ಅಧಿಕಾರಿಗಳು ಈ ಯೋಜನೆ ಪೂರ್ಣಗೊಳಿಸಿದರೂ ಇಂಜಿನವಾರಿ ಹಾಗೂ ಬೂದಿನಗಡ ವ್ಯಾಪ್ತಿಯ ಕೃಷಿಭೂಮಿ ನೀರಾವರಿಯಾಗುತ್ತಿಲ್ಲ. ಕಾಲುವೆ ಅಲ್ಲಲ್ಲಿ ಕುಸಿದು ಬೀಳುವ ಹಂತದಲ್ಲಿದೆ. ಕಾಲುವೆಯಲ್ಲಿ ಮುಳ್ಳುಕಂಠಿಗಳು ಬೆಳೆದು ನಿಂತಿವೆ. ಭೂಮಿಗೆ ನೀರು ಒದಗಿಸುವುದು ಮರೀಚಿಕೆಯಾಗಿದೆ.

ಕಳ್ಳರ ಪಾಲು: ವಿದ್ಯುತ್ ಸರಬರಾಜು ಕೊಠಡಿ ಬೀಗ ಮುರಿದು ಸಣ್ಣ ಟಿಸಿ ಹಾಗೂ ಅಲ್ಲಿರುವ ಆಯಿಲ್‌ನ್ನು ಕಳವು ಮಾಡಲಾಗಿದೆ. ಅಲ್ಲಿ ವಿದ್ಯುತ್ ಸರಬರಾಜಿಗೆ ತೊಂದರೆಯಾಗಿದೆ.