ದೇಗುಲ ಪ್ರವೇಶಿಸುವ ಬಿಷ್ಟಪ್ಪಯ್ಯ ಮುಖ್ಯಗೋಪುರದ ಎಡಬದಿಯಲ್ಲಿದ್ದ ಯಾತ್ರಾರ್ಥಿಗಳ ಕೊಠಡಿಗಳನ್ನು ತಿಂಗಳ ಹಿಂದೆ ತೆರವುಗೊಳಿಸಲಾಗಿತ್ತು. ಇದೇ 8ರಂದು ಅಲ್ಲಿದ್ದ ಹಾಸುಗಲ್ಲುಗಳನ್ನು ಸರಿಯಾಗಿ ಜೋಡಿಸಿ ಇಡುವಾಗ ಪುಷ್ಕರಣಿ ಪತ್ತೆಯಾಗಿತ್ತು. ಸುಮಾರು ನಾಲ್ಕು ಅಡಿ ಅಳವಿರುವ ಪುಷ್ಕರಣಿಯ ಗೋಡೆಯ ಮೇಲೆ ಮೀನು, ಏಡಿ ಹಾಗೂ ನೃತ್ಯದ ಭಂಗಿಯ ಆಕರ್ಷಕ ಕೆತ್ತನೆಗಳಿವೆ. ಪುಷ್ಕರಣಿಯ ಒಂದು ಭಾಗದಲ್ಲಿ ಮೆಟ್ಟಿಲುಗಳಿವೆ. ಅದರ ವಿರುದ್ಧ ದಿಕ್ಕಿನಲ್ಲಿ ನಂದಿ ವಿಗ್ರಹವಿದ್ದು, ಅದಕ್ಕೆ ಕೊಳಾಯಿ ಸಂಪರ್ಕ ಕಲ್ಪಿಸಿದ್ದ ಕುರುಹುಗಳಿವೆ. ಆ ಕೊಳಾಯಿ ಮೂಲಕ ಈ ಹಿಂದೆ ಪುಷ್ಕರಣಿಗೆ ನೀರು ಹರಿದು ಬರುತ್ತಿತ್ತು ಎಂದು ಭಾರತೀಯ ಪುರಾತತ್ವ ಸರ್ವೇಕ್ಷಣ ಇಲಾಖೆಯ (ಎ.ಎಸ್.ಐ.) ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.