ನೀಲಿ ಇರುವೆ ಪತ್ತೆ ಹಚ್ಚಿದ ಬೆಂಗಳೂರು ಕೀಟಶಾಸ್ತ್ರಜ್ಞರ ತಂಡ

ಅರುಣಾಚಲ ಪ್ರದೇಶದ ಸ್ಥಳೀಯರ ವಿರುದ್ಧ ಬ್ರಿಟಿಷ್‌ ಸರ್ಕಾರ 1911-1912ರಲ್ಲಿ 'ಅಭೋರ್‌’ ಹೆಸರಿನ ದಂಡಯಾತ್ರೆ ನಡೆಸಿತ್ತು. ಆಗ ಸಿಯಾಂಗ್‌ ಕಣಿವೆಯ ನೈಸರ್ಗಿಕ ಇತಿಹಾಸ ಮತ್ತು ಭೌಗೋಳಿಕ ಇತಿಹಾಸ ದಾಖಲಿಸಲು ವೈಜ್ಞಾನಿಕ ತಂಡವೊಂದು ಮಿಲಿಟರಿಯ ಜೊತೆಗೂಡಿತ್ತು. ಈ ತಂಡವು ಮೊದಲ ಬಾರಿಗೆ ಸಿಯಾಂಗ್‌ ಕಣಿವೆ ಪ್ರದೇಶದ ದೊಡ್ಡಭಾಗಗಳನ್ನು ಅನ್ವೇಷಿಸಲು ವೈಜ್ಞಾನಿಕ ನಕ್ಷೆ ರೂಪಿಸಲು ಯಶಸ್ವಿಯಾಯಿತು. ಅಲ್ಲಿರುವ ಪ್ರತಿ ಸಸ್ಯ ಕಪ್ಪೆ ಹಲ್ಲಿ ಮೀನು ಪಕ್ಷಿ ಮತ್ತು ಸಸ್ತನಿ ಮತ್ತು ಕೀಟಗಳನ್ನು ವೈಜ್ಞಾನಿಕವಾಗಿ ದಾಖಲಿಸಿತ್ತು. ಇದಾಗಿ ಒಂದು ಶತಮಾನದ ನಂತರ ಬೆಂಗಳೂರಿನ ಏಟ್ರಿ ಸಂಸ್ಥೆಯ ಸಂಶೋಧಕರ ತಂಡ ಮತ್ತು ಫೆಲಿಸ್ಕ್ರಿಯೇಷನ್ಸ್‌ ತಂಡ ‘ಸಿಯಾಂಗ್ ಅನ್ವೇಷಣೆ’ ಬ್ಯಾನರ್‌ ಅಡಿ ಈ ಪ್ರದೇಶದ ಜೀವ ವೈವಿಧ್ಯ ಮರು ಸಮೀಕ್ಷೆಗೆ ಯಾತ್ರೆ ಆರಂಭಿಸಿದೆ. ಇದಕ್ಕೆ ನ್ಯಾಷನಲ್‌ ಜಿಯೋಗ್ರಾಫಿಕ್‌ ಸೊಸೈಟಿ ಅನುದಾನ ನೀಡಿದೆ. ಯಾತ್ರೆ ವೇಳೆ ಪ್ರಾಣಿ ವರ್ಗದ ಒಂದು ಹೊಸ ಉಪ ಕುಟುಂಬ ಆರು ಹೊಸ ತಳಿ ಮತ್ತು 40ಕ್ಕೂ ಹೆಚ್ಚು ಹೊಸ ಪ್ರಾಣಿ ಪ್ರಭೇದಗಳನ್ನು ಕೀಟಶಾಸ್ತ್ರಜ್ಞರು ಪತ್ತೆ ಮಾಡಿದ್ದಾರೆ.