ಬನ್ನೇರುಘಟ್ಟದಲ್ಲಿ ಮತ್ತೆ ನಾಲ್ಕು ಜಿಂಕೆ ಸಾವು

ಬೆಂಗಳೂರಿನ ಸೇಂಟ್‌ ಜಾನ್ಸ್‌ ವೈದ್ಯಕೀಯ ಕಾಲೇಜು ಆಸ್ಪತ್ರೆಯ ಉದ್ಯಾನದಿಂದ 37 ಚುಕ್ಕೆ ಜಿಂಕೆಗಳನ್ನು ಬನ್ನೇರುಘಟ್ಟ ಜೈವಿಕ ಉದ್ಯಾನಕ್ಕೆ ಆಗಸ್ಟ್‌ 17ರಂದು ತರಲಾಗಿತ್ತು. ಆಗಸ್ಟ್‌ 22ರಿಂದ ಸೆಪ್ಟಂಬರ್‌ 19ರವರೆಗೆ 13 ಜಿಂಕೆ ಮೃತಪಟ್ಟಿದ್ದವು. ಸೆ.21ರ ವೇಳೆಗೆ ಆ ಸಂಖ್ಯೆ 19ಕ್ಕೆ ಏರಿಕೆಯಾಗಿತ್ತು.

ಅರಣ್ಯ ಸಚಿವ ಈಶ್ವರ ಖಂಡ್ರೆ ಉದ್ಯಾನಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ಸೋಂಕಿನಿಂದ ಬಳಲುತ್ತಿರುವ ಜಿಂಕೆಗಳ ಸ್ಥಿತಿಯನ್ನು ಸುಧಾರಿಸಲು ವಿಶೇಷ ಕ್ರಮಗಳನ್ನು ಕೈಗೊಳ್ಳುವಂತೆ ಸೂಚಿಸಿದ್ದರು.

ಪಶುವೈದ್ಯಕೀಯ ಆರೈಕೆಯ ಹೊರತಾಗಿಯೂ ನಾಲ್ಕು ಜಿಂಕೆಗಳು ಮೃತಪಟ್ಟಿವೆ. ನುರಿತ ಪಶುವೈದ್ಯರ ತಂಡವು ಕ್ವಾರೆಂಟೈನ್‌ನಲ್ಲಿರುವ ಉಳಿದ ಜಿಂಕೆಗಳಿಗೆ ಅಗತ್ಯ ವೈದ್ಯೋಪಚಾರ ಮತ್ತು ಆರೈಕೆ ಮಾಡುತ್ತಿದ್ದಾರೆ ಎಂದು ಉದ್ಯಾನದ ಕಾರ್ಯನಿರ್ವಾಹಕ ನಿರ್ದೇಶಕ ಸೂರ್ಯಸೇನ್‌ ತಿಳಿಸಿದ್ದಾರೆ.