ಬೆಳಗಾವಿ| ಒಗ್ಗಟ್ಟಿನ ಮಂತ್ರ; ಅಭಿವೃದ್ಧಿಯಾದ ದಾಸ್ತಿಕೊಪ್ಪ ಗ್ರಾಮ

ಎಂ.ಕೆ.ಹುಬ್ಬಳ್ಳಿ (ಬೆಳಗಾವಿ ಜಿಲ್ಲೆ): ಚನ್ನಮ್ಮನ ಕಿತ್ತೂರು ತಾಲ್ಲೂಕಿನ ದಾಸ್ತಿಕೊಪ್ಪ ಗ್ರಾಮ‌ಕ್ಕೆ ಹಿಂದಿನ ಸರ್ಕಾರದ ಅವಧಿಯಲ್ಲಿ ‘ಅಮೃತ ಗ್ರಾಮ’ ಯೋಜನೆಯಡಿ ದೊರೆತ ₹25 ಲಕ್ಷ ಪ್ರೋತ್ಸಾಹ ಧನ ಕಾಯಕಲ್ಪಕ್ಕೆ ಕಾರಣವಾಗಿದೆ.

ಆ ಹಣದಲ್ಲಿ ಗ್ರಾಮ ಪಂಚಾಯಿತಿ ಕಟ್ಟಡ ನವೀಕರಣದ ಜೊತೆಗೆ, ಉಪಕರಣಗಳು ಮತ್ತು ಸ್ವಚ್ಛತಾ ಸಾಮಗ್ರಿಗಳ ಖರೀದಿ ಆಗಿದೆ.

‌ಏನೇನು ಅಭಿವೃದ್ಧಿ?

ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಗೆ ಹೈಟೆಕ್‌ ಸ್ಪರ್ಶ ನೀಡಲಾಗಿದೆ. ಗಟ್ಟಿಮುಟ್ಟಾದ ಚಾವಣಿ, ವರ್ಣಮಯ ಗೋಡೆಗಳು, ಮೈದಾನಕ್ಕೆ ಪೇವರ್ಸ್‌ ಅಳವಡಿಕೆ, ಆರ್‌ಒ ಪ್ಲ್ಯಾಂಟ್‌, ರಂಗಮಂಟಪ, ವ್ಯಾಯಾಮ ಸಾಮಗ್ರಿ, ಸುಸಜ್ಜಿತ ಶೌಚಾಲಯ, ಕಬಡ್ಡಿ ಮೈದಾನಕ್ಕೆ ಮ್ಯಾಟ್ ಅಳವಡಿಕೆ, ಸ್ಮಾರ್ಟ್‌ಬೋರ್ಡ್‌, ವಿದ್ಯುತ್‌ ವ್ಯವಸ್ಥೆ ಮಾಡಲಾಗಿದೆ.

ಅಂಗನವಾಡಿ ಪುಟಾಣಿಗಳಿಗೆ ಚಿಕ್ಕ ಕುರ್ಚಿಗಳು ಹಾಗೂ ಆಟಿಕೆ ಸಾಮಗ್ರಿಗಳನ್ನು ನೀಡಲಾಗಿದೆ. ಪ್ರತಿ ಮನೆಗೂ ಶೌಚಾಲಯವಿದ್ದು, ಕಳೆದ ವರ್ಷ ‘ಬಹಿರ್ದೆಸೆ ಮುಕ್ತ ಗ್ರಾಮ’ ಘೋಷಣೆ ಮಾಡಲಾಗಿದೆ.

ಚರಂಡಿಗಳ ವ್ಯವಸ್ಥೆ, ಕಾಂಕ್ರೀಟ್ ರಸ್ತೆಗಳ ನಿರ್ಮಾಣ, ಹೊಲದ ರಸ್ತೆಗಳ ದುರಸ್ತಿ, 11 ಸ್ಥಳಗಳಲ್ಲಿ ಹೈಮಾಸ್ಟ್‌ ಕಂಬ– ಬಲ್ಬ್‌ ಅಳವಡಿಕೆ, ಬೀದಿಗಳಲ್ಲಿ ಸೌರ ವಿದ್ಯುತ್‌ ವ್ಯವಸ್ಥೆ, ನೀರು ಶುದ್ಧೀಕರಣ ಘಟಕ, ಜಲ ಜೀವನ ಮಿಷನ್‌ ಅಡಿ ಪ್ರತಿ ಮನೆಗೆ ನಲ್ಲಿ ಸಂಪರ್ಕ, ಎರಡು ಸಮುದಾಯ ಭವನ, ಪ್ರತಿದಿನ ಮನೆಗೆ ತೆರಳಿ ಕಸ ಸಂಗ್ರಹಿಸಲು ವಾಹನ ವ್ಯವಸ್ಥೆ, ಸ್ವಚ್ಛತೆಗೆ ಪ್ರತ್ಯೇಕ ಸಿಬ್ಬಂದಿ ನಿಯೋಜನೆ; ಎಲ್ಲ ಆಯಾಮಗಳಲ್ಲೂ ಈ ಊರು ಸುಧಾರಣೆಯತ್ತ ಸಾಗಿದೆ. ಸ್ವಚ್ಛತೆ– ಅಭಿವೃದ್ಧಿ ಎಂಬ ಎರಡು ಗುರಿಗಳನ್ನು ಇಟ್ಟುಕೊಂಡು ಸದಸ್ಯರು ಮುಂದೆ ಸಾಗಿದ್ದಾರೆ.

ಅನುದಾನ ವಿವರ

15ನೇ ಹಣಕಾಸು ಯೋಜನೆ ಅಡಿ ₹50 ಲಕ್ಷ, ನರೇಗಾದ ₹1 ಕೋಟಿ, ಜಿಲ್ಲಾ ಪಂಚಾಯಿತಿ ವಿಶೇಷ ಅನುದಾನ ₹10 ಲಕ್ಷ, ತಾಲ್ಲೂಕು ಪಂಚಾಯಿತಿಯಿಂದ ₹ 61 ಲಕ್ಷ, ಹಿಂದಿನ ಶಾಸಕರ ನಿಧಿ ₹97 ಲಕ್ಷ, ಇಬ್ಬರು ವಿಧಾನ ಪರಿಷತ್‌ ಸದಸ್ಯರ ನಿಧಿ ₹15 ಲಕ್ಷ, ರಾಜ್ಯಸಭೆ ಸದಸ್ಯರ ನಿಧಿ ₹5 ಲಕ್ಷ; ಹೀಗೆ ವಿವಿಧ ಮೂಲಗಳಿಂದ ಹಣ ತರುವಲ್ಲಿ ಸದಸ್ಯರು ಯಶಸ್ವಿಯಾಗಿದ್ದಾರೆ.

ಮೂರು ವರ್ಷಗಳ ಅವಧಿಯಲ್ಲಿ ಬಳಸಿಕೊಂಡ ಅನುದಾನ ₹4.50 ಕೋಟಿ. ಇದರಲ್ಲಿ ಜೆಜೆಎಂ ಹಾಗೂ ಶಾಲೆಯ ವಿಜ್ಞಾನ ಪ್ರಯೋಗಾಲಯದ ಕೆಲಸಗಳು ಪ್ರಗತಿಯಲ್ಲಿವೆ.

3,226ಕ್ಕೂ ಹೆಚ್ಚು ಜನಸಂಖ್ಯೆ ಹೊಂದಿರುವ ಈ ಊರಿನಲ್ಲಿ ಎಂಟು ಮಂದಿ ಪಂಚಾಯಿತಿ ಸದಸ್ಯರಿದ್ದಾರೆ. ಎಲ್ಲರೂ ಪಕ್ಷಭೇದ ಮರೆತು ಬೆರೆತಿದ್ದರಿಂದ ಊರಿನಲ್ಲಿ ಸುಧಾರಣಾ ಕಾರ್ಯಗಳು ಆಗುತ್ತಿವೆ ಎನ್ನುವುದು ಜನರ ಅಭಿಪ್ರಾಯ.