ಬೆಳಗಾವಿ | ಈದ್–ಉಲ್–ಫಿತ್ರ್ : ಹಬ್ಬದ ಸಡಗರವೂ, ಖರೀದಿ ಸಂಭ್ರಮವೂ

‘ರಂಜಾನ್ ಮಾಸದ ಪ್ರಯುಕ್ತ ತಿಂಗಳಿಡೀ ಅಲ್ಲಾಹು ದೇವರನ್ನು ಸ್ಮರಿಸಿದ ಮುಸ್ಲಿಮರು ಈಗ ಹಬ್ಬದ ತಯಾರಿ ನಡೆಸಿದ್ದಾರೆ. ನಿತ್ಯ ಐದು ಹೊತ್ತು ನಮಾಜ್ ಮಾಡಿ ಕುರ್‌ಆನ್‌ ಪಠಿಸಿ ಆತ್ಮಶುದ್ಧಿ ಮಾಡಿಕೊಂಡಿದ್ದಾರೆ. ಸತ್ಯದ ಹಾದಿಯಲ್ಲಿ ಸಾಗುವ ಸಂಕಲ್ಪ ತೊಟ್ಟಿದ್ದಾರೆ. ಈ ಜೀವನಶೈಲಿ ಒಂದೇ ತಿಂಗಳಿಗೆ ಸೀಮಿತವಾಗಬಾರದು. ವರ್ಷವಿಡೀ ಈ ನಡೆ ಅನುಸರಿಸಬೇಕು. ಸಮಾಜದಲ್ಲಿ ಎಲ್ಲರೊಂದಿಗೆ ಸಹಬಾಳ್ವೆಯಿಂದ ಬಾಳಿ ಪ್ರತಿಯೊಬ್ಬರಿಗೆ ಪ್ರೀತಿ ಹಂಚಬೇಕು’ ಎಂದು ಬೆಳಗಾವಿಯ ಪೊಲೀಸ್ ಕೇಂದ್ರಸ್ಥಾನದ ಮಸೀದಿಯ ಖಾರಿ ಝಾಕೀರ್ ಹುಸೇನ್ ಆರೀಫ್‌ ಖಾನ್ 'ಪ್ರಜಾವಾಣಿ'ಗೆ ಪ್ರತಿಕ್ರಿಯಿಸಿದರು.

ಬೆಳಗಾವಿ ಮಾರುಕಟ್ಟೆಗೆ ಸಂಜೆ ತಂಡೋ‍‍ಪತಂಡವಾಗಿ ಲಗ್ಗೆ ಇಡುತ್ತಿರುವ ಜನರು ವಿವಿಧ ಆಹಾರ ಖಾದ್ಯ ಸವಿಯುತ್ತಿದ್ದಾರೆ. ಮಾಂಸಾಹಾರ ಮಾತ್ರವಲ್ಲ; ಸಸ್ಯಾಹಾರ ಖಾದ್ಯಗಳೂ ಬಾಯಲ್ಲಿ ನೀರೂರಿಸುತ್ತಿವೆ. ಇನ್ನೂ ಫಿರ್ನಿ ಲಸ್ಸಿ ಹಣ್ಣಿನ ರಸ ಶರಬತ್ ಪ್ರೂಟ್ಸ್ ಸಲಾಡ್ ಮತ್ತು ವಿವಿಧ ಚಹಾ ಸೇವಿಸುವವರ ಸಂಖ್ಯೆಯೂ ಕಡಿಮೆ ಏನಿಲ್ಲ.