ಬೆಳಗಾವಿ | ಪಿಯು ಪರೀಕ್ಷೆ ಫಲಿತಾಂಶ: ಪೋಷಕರಿಲ್ಲದ‌ ಕೊರಗು ಮೀರಿ ಸಾಧನೆ

ಬೆಳಗಾವಿಯ ಸರ್ಕಾರಿ ಬಾಲಕರ ಬಾಲಮಂದಿರದಲ್ಲಿ ವಾಸವಿರುವ ಪ್ರಕಾಶ ಲಗಮಣ್ಣ ಬೀರನೋಳಿ ಶೇ.88 ಅಂಕಗಳೊಂದಿಗೆ ಪಿಯು ಕಲಾ ವಿಭಾಗದ ಪರೀಕ್ಷೆಯಲ್ಲಿ ಉನ್ನತ ಶ್ರೇಣಿಯಲ್ಲಿ ಪಾಸಾಗಿದ್ದಾರೆ. ಲಿಂಗರಾಜ ಪಿಯು ಕಾಲೇಜಿನಲ್ಲಿ ಓದುತ್ತಿರುವ ಅವರು ಹುಕ್ಕೇರಿ ತಾಲ್ಲೂಕಿನ ಬಸಾಪುರದವರು. ‘ನನ್ನ ತಂದೆ ಕೃಷಿಕ. ತಾಯಿ ಮೃತಪಟ್ಟಿದ್ದಾರೆ. ಎಸ್ಸೆಸ್ಸೆಲ್ಸಿ ಪರೀಕ್ಷೆಯಲ್ಲಿ ಶೇ.91 ಅಂಕ ಗಳಿಸಿದ್ದ ನನಗೆ ಹೆಚ್ಚಿನ ವಿದ್ಯಾಭ್ಯಾಸದ ಆಸೆಯಿತ್ತು. ಆದರೆ ಇಡೀ ಕುಟುಂಬಕ್ಕೆ ಆಸರೆಯಾಗಿದ್ದು ಹತ್ತೇ ಗುಂಟೆ ಜಮೀನು. ಕಲಿಕೆಗೆ ಬಡತನ ಅಡ್ಡಿಯಾಗುತ್ತಲೇ ಇತ್ತು. ಹಾಗಾಗಿ ಮಕ್ಕಳ ಸಹಾಯವಾಣಿ ಸಂಖ್ಯೆ 1098ರ ಮಾಹಿತಿ ಪಡೆದು ಬಾಲಕರ ಬಾಲಮಂದಿರಕ್ಕೆ ಬಂದೆ. ಇಲ್ಲಿ ಪ್ರವೇಶ ಸಿಕ್ಕಿದ್ದರಿಂದ ಓದಿಗೆ ಅನುಕೂಲವಾಯಿತು’ ಎಂದರು. ‘ನನ್ನ ಶೈಕ್ಷಣಿಕ ವೆಚ್ಚ ವಸತಿ ಮತ್ತು ಆಹಾರದ ವ್ಯವಸ್ಥೆಯನ್ನು ಸರ್ಕಾರದವರೇ ಮಾಡಿದ್ದಾರೆ. ಎಲ್ಲರ ಪ್ರೇರೇಪಣೆಯಿಂದ ಅಂದುಕೊಂಡ ಕನಸು ಸಾಕಾರವಾಗಿದೆ. ನನ್ನ ತಂದೆ ಉಪನ್ಯಾಸಕರು ಮತ್ತು ಸರ್ಕಾರಿ ಬಾಲಮಂದಿರದವರಿಗೆ ಈ ಸಾಧನೆ ಅರ್ಪಿಸುವೆ’ ಎಂದು ತಿಳಿಸಿದರು. ‘ನಿತ್ಯ ಬೆಳಿಗ್ಗೆ 6ಕ್ಕೆ ಎದ್ದರೆ ರಾತ್ರಿಯವರೆಗೆ ಸಿಕ್ಕ ಸಮಯವನ್ನೆಲ್ಲ ಅಧ್ಯಯನಕ್ಕೆ ಮೀಸಲಿಡುತ್ತಿದ್ದೆ. ಪರೀಕ್ಷೆ ಸಮೀಪಿಸಿದಾಗ ನಿತ್ಯ ಬೆಳಿಗ್ಗೆ 4ಕ್ಕೆ ಎದ್ದು ತಯಾರಿ ನಡೆಸುತ್ತಿದ್ದೆ’ ಎನ್ನುವ ಅವರು ಕನ್ನಡದಲ್ಲಿ 97 ಇಂಗ್ಲಿಷ್‌ನಲ್ಲಿ 62 ಇತಿಹಾಸದಲ್ಲಿ 93 ಅರ್ಥಶಾಸ್ತ್ರದಲ್ಲಿ 89 ಭೂಗೋಳದಲ್ಲಿ 93 ರಾಜ್ಯಶಾಸ್ತ್ರದಲ್ಲಿ 94 ಅಂಕ ಪಡೆದಿದ್ದಾರೆ. ಬಿ.ಎ ಕೋರ್ಸ್‌ಗೆ ಪ್ರವೇಶ ಪಡೆದು ಪೊಲೀಸ್‌ ಅಧಿಕಾರಿಯಾಗಬೇಕೆಂಬ ಕನಸು ಅವರದ್ದು.