ಇವರ ಗರಡಿಯಲ್ಲಿ ತರಬೇತಿ ಪಡೆದ 11ಕ್ಕೂ ಹೆಚ್ಚು ಮಕ್ಕಳು ಇತ್ತೀಚೆಗೆ ಚಂಡೀಗಢದಲ್ಲಿ ನಡೆದ ಯೋಗ ಸ್ಪರ್ಧೆಯಲ್ಲಿ ಉತ್ತಮ ಸಾಧನೆ ತೋರಿ 11 ಪದಕಗಳನ್ನು ಜಯಿಸಿದ್ದಾರೆ. ಕಲಾವಿದೆಯೂ ಆಗಿರುವ ರಂಜಾನ್‌ಬಿ ಮಕ್ಕಳಿಗೆ ಚಿತ್ರಕಲೆಯನ್ನೂ ಹೇಳಿಕೊಡುತ್ತಿದ್ದಾರೆ. ವಾರಾಂತ್ಯಕ್ಕೆ ಹಂಪಿಯಲ್ಲಿ ಪರಿಸರ ನಡಿಗೆ, ಚಾರಣಕ್ಕೆ ಕರೆದೊಯ್ಯುತ್ತಾರೆ. ಎಲ್ಲೇ ಯೋಗ, ಸಾಂಸ್ಕೃತಿಕ ಕಾರ್ಯಕ್ರಮ ಆಯೋಜಿಸಿದರೂ ಅವರನ್ನು ಆ ಸ್ಪರ್ಧೆಗೆ ಸಜ್ಜುಗೊಳಿಸಿ, ಅಲ್ಲಿಗೆ ಕರೆದೊಯ್ದು ಪದಕ ಗೆಲ್ಲುವಂತೆ ಮಾಡುತ್ತಾರೆ. ಇವರ ಪತಿ ಟಿ. ಫಕ್ರುದ್ದೀನ್‌, ಜಿಮ್ ಟ್ರೈನರ್‌ ಆಗಿದ್ದು ಅವರು ಸಮಯ ಸಿಕ್ಕಾಗಲೆಲ್ಲಾ ಪತ್ನಿಗೆ ನೆರವಾಗುತ್ತಾರೆ. ಹೀಗೆ ಸತಿ–ಪತಿ ನಿಸ್ವಾರ್ಥದಿಂದ ಕೆಲಸ ಮಾಡಿ, ಮುಖ್ಯವಾಹಿನಿಯಿಂದ ದೂರ ಉಳಿದ ಮಕ್ಕಳಿಗೆ ಜ್ಞಾನ ಧಾರೆಯೆರೆದು ಸಶಕ್ತರನ್ನಾಗಿ ಮಾಡುತ್ತಿದ್ದಾರೆ.
