ಎಚ್‌ಎಎಲ್‌ನಿಂದ 300ನೇ ‘ಧ್ರುವ್’ ಹೆಲಿಕಾಪ್ಟರ್
ಅಕ್ಷರ ಗಾತ್ರ :ಆ |ಆ |ಆ
ಬೆಂಗಳೂರು: ಎಚ್ಎಎಲ್ 300ನೇ ‘ಸುಧಾರಿತ ಲಘು ಹೆಲಿಕಾಪ್ಟರ್’ (ಎಎಲ್‌ಎಚ್‌) ಧ್ರುವ್ ತಯಾರಿಸಿದ್ದು, ಅದನ್ನು ಮಂಗಳವಾರ ಗಣ್ಯರ ಮುಂದೆ ಪ್ರದರ್ಶಿಸಲಾಯಿತು.
ಈ ಸಂದರ್ಭದಲ್ಲಿ ಮಾತನಾಡಿದ ಎಚ್ಎಎಲ್ ವ್ಯವಸ್ಥಾಪಕ ನಿರ್ದೇಶಕ ಆರ್‌.ಮಾಧವನ್, 1992ರ ಆ.30ರಂದು ಎಎಲ್‌ಎಚ್‌ನ ಮೂಲ ಮಾದರಿಯ (ಪ್ರೊಟೊಟೈಪ್‌) ಹಾರಾಟ ನಡೆದಿತ್ತು. ಆ ಬಳಿಕ ಹಿಂತಿರುಗಿ ನೋಡಿದ್ದೇ ಇಲ್ಲ. ಈಗ ವಿಶ್ವದರ್ಜೆಯ, ಸರಿಸಾಟಿ ಇಲ್ಲದ ಹೆಲಿಕಾಪ್ಟರ್ ಎಂದು ಮನ್ನಣೆ ಪಡೆದಿದೆ ಎಂದರು.
ಎಎಲ್‌ಎಚ್‌ ಮಾರ್ಕ್–1 ರಿಂದ ಮಾರ್ಕ್– 4 ರವರೆಗೆ ಸಾಗಿ ಬಂದ ವಿಕಾಸದ ಹಾದಿ ಅಸಾಧಾರಣ. ಇದರಿಂದ ದೇಶಿ ನಿರ್ಮಿತ ಹೆಲಿಕಾಪ್ಟರ್‌ಗಳ ವಿನ್ಯಾಸ ಮತ್ತು ಅಭಿವೃದ್ಧಿಗೆ ಹೆಚ್ಚಿನ ಆದ್ಯತೆ ಸಿಕ್ಕಿತು ಎಂದು ಅವರು ನೆನಪಿಸಿಕೊಂಡರು.
300 ನೇ ಹೆಲಿಕಾಪ್ಟರ್‌ನ ರೋಲ್‌ ಔಟ್‌ ಪ್ರಮಾಣಪತ್ರವನ್ನು ಏರೋನಾಟಿಕಲ್‌ ಗುಣಮಟ್ಟ ಖಾತರಿ ಮಹಾ ನಿರ್ದೇಶನಾಲಯದ ಹೆಚ್ಚುವರಿ ಮಹಾ ನಿರ್ದೇಶಕ ವೈ.ಕೆ.ಶರ್ಮಾ ಅವರು ಹೆಲಿಕಾಪ್ಟರ್ ಕಾಂಪ್ಲೆಕ್ಸ್‌ನ ಸಿಇಒ ಜಿ.ವಿ.ಎಸ್‌ ಭಾಸ್ಕರ್‌ ಅವರಿಗೆ ಹಸ್ತಾಂತರಿಸಿದರು.
ಪ್ರಸ್ತುತ ಎಚ್ಎಎಲ್ 73 ಎಎಲ್‌ಎಚ್‌ಗಳನ್ನು ತಯಾರಿಸುತ್ತಿದ್ದು, ಇದರಲ್ಲಿ ಭೂಸೇನೆಗೆ 41, ನೌಕಾಪಡೆಗೆ 16 ಮತ್ತು ಭಾರತೀಯ ಕೋಸ್ಟ್‌ ಗಾರ್ಡ್‌ಗೆ 16 ಹೆಲಿಕಾಪ್ಟರ್‌ಗಳ ತಯಾರಿಕೆ ಗುತ್ತಿಗೆ ಪಡೆದಿದೆ. ಈಗಾಗಲೇ 38 ತಯಾರಿಸಿದ್ದು, ಉಳಿದ ಹೆಲಿಕಾಪ್ಟರ್‌ಗಳನ್ನು 2022 ರಲ್ಲಿ ಪೂರ್ಣಗೊಳಿಸಲಿದೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
