ಸೋಮವಾರ, ನವೆಂಬರ್ 28, 2022
20 °C
ಬಿಬಿಎಂಪಿ ಅರಣ್ಯ ವಿಭಾಗ: ಕಡಿಯಲು ಮುಂದೆ; ಬೆಳೆಸಿ, ರಕ್ಷಿಸುವಲ್ಲಿ ಹಿಂದೆ

ಬಿಬಿಎಂಪಿ ಅರಣ್ಯ ವಿಭಾಗ: ನೆಟ್ಟ ಸಸಿ ಮರವಾದದ್ದಕ್ಕೆ ಲೆಕ್ಕವಿಲ್ಲ

ಆರ್‌. ಮಂಜುನಾಥ್‌ Updated:

ಅಕ್ಷರ ಗಾತ್ರ : | |

ಬೆಂಗಳೂರು: ಲಕ್ಷಾಂತರ ಸಸಿಗಳನ್ನು ನೆಡಲಾಗಿದೆ. ಯಾವ ವರ್ಷ ಎಷ್ಟು ಎಂಬುದೂ ದಾಖಲಾಗಿದೆ. ಆದರೆ, ಅವುಗಳೆಲ್ಲ ಮರವಾಗಿವೆಯೇ, ರಕ್ಷಣೆಯಾಗುತ್ತಿವೆಯೇ ಎಂಬ ಮಾಹಿತಿ ಮಾತ್ರ ಬಿಬಿಎಂಪಿ ಅರಣ್ಯ ವಿಭಾಗದಲ್ಲಿ ಇಲ್ಲ.

ಬಿಬಿಎಂಪಿ ಅರಣ್ಯ ವಿಭಾಗ ನಗರದಲ್ಲಿ ಹಲವು ಅಭಿವೃದ್ಧಿ ಯೋಜನೆಗಳಿಗೆ ಬೃಹತ್‌ ಮರಗಳನ್ನು ಧರೆಗುರುಳಿಸುತ್ತದೆ. ಒಂದು ಮರಕ್ಕೆ ಬದಲಾಗಿ 10 ಸಸಿಗಳನ್ನು ನೆಡಲಾಗುತ್ತಿದೆ ಎಂದೂ ಹೇಳುತ್ತದೆ. ಆ ಸಸಿಗಳು ಎಲ್ಲಿವೆ, ಮರವಾಗಿರುವುದು ಎಷ್ಟು ಎಂದರೆ ಅರಣ್ಯ ವಿಭಾಗದ ಅಧಿಕಾರಿಗಳು ಮತ್ತೊಬ್ಬ ಅಧಿಕಾರಿಗಳತ್ತ ಬೊಟ್ಟು ಮಾಡುತ್ತಾರೆ.

ಕಡಿದ ಮರಕ್ಕೆ ಪ್ರತಿಯಾಗಿ ಸಸಿಗಳನ್ನು ಎಲ್ಲಿ ನೆಡಲಾಗಿದೆ ಎಂಬ ಪ್ರಶ್ನೆಗೆ, ‘ಉದ್ಯಾನ, ತೆರೆದ ಪ್ರದೇಶ ಎಲ್ಲಿ ಸಿಗುತ್ತೋ ಅಲ್ಲಿ ಹಾಕಿದ್ದೇವೆ’ ಎಂಬ ಹಾರಿಕೆಯ ಉತ್ತರ ಅರಣ್ಯ ವಿಭಾಗದಿಂದ ಬರುತ್ತದೆ.

ಮಾಹಿತಿ ಇಲ್ಲ: ಬಿಬಿಎಂಪಿ ಅರಣ್ಯ ವಿಭಾಗದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಸರಿನಾ ಸಿಕ್ಕಲಿಗರ್‌ ಅವರಲ್ಲಿ ಸಸಿ ನೆಟ್ಟ, ನಿರ್ವಹಣೆಯ ಮಾಹಿತಿ ಕೇಳಿದಾಗ, ‘ವಿಭಾಗದ ವ್ಯವಸ್ಥಾಪಕರಲ್ಲಿ ಪಡೆಯಿರಿ’ ಎಂದರು. ವ್ಯವಸ್ಥಾಪಕರು, ‘ವೃಕ್ಷ ಅಧಿಕಾರಿಯವರಲ್ಲಿ ಮಾಹಿತಿ ಇದೆ’ ಎಂದರು. ಒಬ್ಬರು ಮರ ಕತ್ತರಿಸಿದ ಮಾಹಿತಿ ನೀಡಿದರು. ಮತ್ತೊಬ್ಬರು ಸಸಿ ನೆಟ್ಟ ವಿವರ ನೀಡಿದರಷ್ಟೆ. ನೆಟ್ಟ ಸಸಿ ಮರವಾದ ಬಗ್ಗೆ ಮಾತ್ರ ಯಾರಲ್ಲಿಯೂ ಮಾಹಿತಿ ಇಲ್ಲ.

ಎಲ್ಲಿ ಹೋದವು ಸಸಿ?: ‘ಗ್ರೀನ್‌ ಸಿಟಿ’ ಎಂಬ ಹೆಗ್ಗಳಿಕೆ ಹೊಂದಿರುವ ಬೆಂಗಳೂರಿನಲ್ಲಿ ಪರಿಸರ ದಿನ ಸೇರಿ ಹಲವು ಸಂದರ್ಭಗಳಲ್ಲಿ ಬಿಬಿಎಂಪಿ, ಸರ್ಕಾರದ ಹಲವು ಇಲಾಖೆಗಳು ಸೇರಿದಂತೆ ಸಂಘ–ಸಂಸ್ಥೆಗಳು ಲಕ್ಷಾಂತರ ಸಸಿಗಳನ್ನು ನೆಡುತ್ತಿವೆ. ಆದರೆ, ಆ ಪ್ರಮಾಣದ ಮರಗಳು ಕಾಣಸಿಗುತ್ತಿಲ್ಲ. ಕೆಲವು ಅಧ್ಯಯನಗಳ ಪ್ರಕಾರ ಸುಮಾರು 20 ಲಕ್ಷ ಮರಗಳು ನಗರದಲ್ಲಿವೆ. 2014ರಲ್ಲಿ ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್‌ಸಿ) ಪ್ರಕಾರ 14.78 ಲಕ್ಷ, 2016ರಿಂದ ಬಿಬಿಎಂಪಿ ಅರಣ್ಯ ವಿಭಾಗ 4.73 ಲಕ್ಷ ಸಸಿಗಳನ್ನು ನೆಟ್ಟಿದೆ.

ಬಿಬಿಎಂಪಿ ಅರಣ್ಯ ವಿಭಾಗದಿಂದ ಗುತ್ತಿಗೆ ಪಡೆದವರು ಒಂದು ಸಸಿ ನೆಟ್ಟು ಅದನ್ನು ಎರಡು ವರ್ಷ ಪೋಷಿಸಿದರೆ ₹900 ಪಡೆಯುತ್ತಾರೆ. ಲಕ್ಷಾಂತರ ಸಸಿ ನೆಟ್ಟ ಬಗ್ಗೆ ದಾಖಲೆ ಪುಸ್ತಕವಿದೆ. ಆದರೆ, ಮರವಾಗಿರುವ ಬಗ್ಗೆ ದಾಖಲೆ ಇಲ್ಲ.

ಮರ ಗಣತಿಯಾಗಲಿ...

ನಗರದಲ್ಲಿ ಮರಗಳ ಗಣತಿಯಾಗಬೇಕು. ಇದರಿಂದ ಹಲವು ವರ್ಷಗಳಿಂದ ಇರುವ ಮರಗಳೆಷ್ಟು, ಹೊಸದಾಗಿ ನೆಟ್ಟಿರುವ ಸಸಿಗಳು ಮರವಾಗಿರುವ ಲೆಕ್ಕಗಳೆಲ್ಲ ಸಿಗುತ್ತದೆ. ಪ್ರತಿ 6 ತಿಂಗಳಿಗೆ ಮರಗಳ ಗಣತಿಯ ಮಾಹಿತಿಯನ್ನು ವೆಬ್‌ಸೈಟ್‌ನಲ್ಲಿ ಪ್ರಕಟಿಸಬೇಕು. ವಾಸ್ತವದಲ್ಲಿ ಎಲ್ಲಿ ಸಸಿಗಳಿವೆ, ಮರಗಳಿಗೆ ಎಂಬುದು ಡಿಜಿಟಲ್‌ ದಾಖಲೆ ಇರಬೇಕು ಎಂದು ಪರಿಸರ ಕಾರ್ಯಕರ್ತ ವಿಜಯ್‌ ನಿಶಾಂತ್ ಒತ್ತಾಯಿಸಿದರು.

ಸಸಿಗಳು ಪರಿಹಾರವಲ್ಲ...

‘ಬೃಹತ್‌ ಮರವೊಂದನ್ನು ಕಡಿದುಹಾಕಿ, ಅದರ ಬದಲು ಎಷ್ಟೇ ಸಂಖ್ಯೆಯ ಸಸಿಗಳನ್ನು ನೆಟ್ಟರೂ ಅದಕ್ಕೆ ಪರಿಹಾರವಾಗುವುದಿಲ್ಲ.
ಪ್ರತಿಯೊಂದು ಮರಕ್ಕೂ ತನ್ನದೇ ಮೌಲ್ಯವಿದೆ. ಎಲ್ಲವನ್ನೂ ರಕ್ಷಿಸಬೇಕು. ಬಿಬಿಎಂಪಿಯ ಅರಣ್ಯ ವಿಭಾಗ ಮೂರ್ನಾಲ್ಕು ಮೀಟರ್‌ ಎತ್ತರದ ದೊಡ್ಡ ಮರಗಳ ಪಟ್ಟಿಯನ್ನು ನೀಡುತ್ತದೆ. ಮರ ಕಡಿಯಲು ಸಾರ್ವಜನಿಕ ಪ್ರಕಟಣೆ ನೀಡುವ ಮುನ್ನ ವಾಸ್ತವವನ್ನು ಅರಿತುಕೊಳ್ಳಬೇಕು’ ಎಂದು ಸಿಟಿಜನ್‌ ಫಾರ್ ಸಿಟಿಜನ್ಸ್‌ ಸಂಸ್ಥಾಪಕ ರಾಜ್‌ಕುಮಾರ್ ದುಗಾರ್‌ ಹೇಳಿದರು.

ಅಲ್ಲೇ ಸಸಿ ನೆಡಿ

‘ನಗರದಲ್ಲಿ ಮರಗಳ ರಕ್ಷಣೆ ಬಿಬಿಎಂಪಿಯ ಕರ್ತವ್ಯ. ಬಿಎಂಆರ್‌ಸಿಎಲ್‌, ಕೆಆರ್‌ಡಿಸಿಲ್‌, ರೈಲ್ವೆ ಸೇರಿದಂತೆ ಯಾವುದೇ ಯೋಜನೆಗಾಗಿ ಮರಗಳನ್ನು ಕಡಿಯುವ ಸುತ್ತಮತ್ತಲಿನ ಪ್ರದೇಶದಲ್ಲೇ ಸಸಿಗಳನ್ನು ನೆಡಬೇಕು’ ಎಂದು ನಮ್ಮ ಬೆಂಗಳೂರು ಪ್ರತಿಷ್ಠಾನದ ವ್ಯವಸ್ಥಾಪಕ ವಿನೋದ್‌ ಜಾಕೋಬ್‌ ಆಗ್ರಹಿಸಿದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು