ಪ್ರಿ–ಫಿಕ್ಸ್ಡ್‌ ಆಟೊ ಕೌಂಟರ್‌ ಆರಂಭ

ಕೋರಮಂಗಲದ ಫೋರಂ ಮಾಲ್, ಕಮರ್ಷಿಯಲ್ ಸ್ಟ್ರೀಟ್, ಮೆಜೆಸ್ಟಿಕ್‌ ಬಳಿ ಈ ಕೌಂಟರ್‌ಗಳು ಶೀಘ್ರವೇ ಮರು ಚಾಲನೆ ಪಡೆದುಕೊಳ್ಳಲಿವೆ. ‘ಚಾಲಕರು ಹೆಚ್ಚಿನ ದರ ಪಡೆಯುವುದಕ್ಕೆ ಇದರಿಂದ ಕಡಿವಾಣ ಬೀಳಲಿದೆ. ಪ್ರಿ–ಫಿಕ್ಸ್ಡ್‌ ಮತ್ತು ಪ್ರಿ–‍ಪೇಯ್ಡ್‌ ಕೌಂಟರ್‌ಗಳಲ್ಲಿ ಪ್ರಯಾಣ ದರಪಟ್ಟಿಗಳನ್ನು ಹಿಡಿದು ಪೊಲೀಸರು ಪರಿಶೀಲನೆ ನಡೆಸಲಿದ್ದಾರೆ’ ಎಂದು ನಗರದ ಪೊಲೀಸ್ ವಿಶೇಷ ಆಯುಕ್ತ(ಸಂಚಾರ) ಎಂ. ಅಬ್ದುಲ್‌ ಸಲೀಂ ತಿಳಿಸಿದರು.

‘ಈಗಾಗಲೇ ಇರುವ ಪ್ರಿ–ಪೇಯ್ಡ್ ಕೌಂಟರ್‌ಗಳಿಗೆ ಮರು ಚಾಲನೆ ನೀಡಲು ಬೆಂಗಳೂರು ಮೆಟ್ರೊ ರೈಲು ನಿಗಮದ ಜತೆ ಒಟ್ಟಾಗಿ ಕೆಲಸ ಮಾಡಲಿದ್ದೇವೆ. ಜನನಿಬಿಡ ಮತ್ತು ಮೆಟ್ರೊ ನಿಲ್ದಾಣಗಳಲ್ಲಿ ಪ್ರಿ–ಫಿಕ್ಸ್ಡ್‌ ಕೌಂಟರ್‌ಗಳು ಕಾರ್ಯಾರಂಭವಾಗಲಿವೆ. ಪ್ರಯಾಣಿಕರು ಕೊನೆಯ ತಾಣಗಳನ್ನು ತಲುಪಲು ಇದರಿಂದ ಅನುಕೂಲ ಆಗಲಿದೆ. ಪ್ರಯಾಣಿಕರಿಂದಲೂ ಇದಕ್ಕೆ ಒತ್ತಡವಿದೆ’ ಎಂದು ಹೇಳಿದರು.