ಗೋಕಾಕ್‌ ಚಳವಳಿಯಿಂದ ಉಳಿದ ಕನ್ನಡ: ಸುದರ್ಶನ

ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಎರಡನೇ ದಿನ ನಡೆದ ‘ಜನಾಂದೋಲನಗಳು’ ಎಂಬ ವಿಚಾರಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಕರ್ನಾಟಕದಲ್ಲಿ ಓದುತ್ತಿರುವ ಪ್ರತಿಯೊಬ್ಬರೂ ಕನ್ನಡ ಕಲಿಯಬೇಕು ಎಂಬ ಉದ್ದೇಶದಿಂದ ನಡೆದ ಗೋಕಾಕ್ ಚಳುವಳಿ ಇಂದು ರಾಜ್ಯದಲ್ಲಿ ಕನ್ನಡ ಭಾಷೆ ಉಳಿಸುವಲ್ಲಿ ಯಶಸ್ವಿಯಾಗಿದೆ. ಕನ್ನಡದ ಅಸ್ಮಿತೆಗೆ ಧಕ್ಕೆ ಬಂದಾಗ ಹುಟ್ಟಿಕೊಂಡ ಈ ಚಳವಳಿಗೆ ಚಿತ್ರನಟ ಡಾ.ರಾಜ್‌ಕುಮಾರ್ ಧುಮುಕಿದ್ದು, ಇದಕ್ಕೆ ಮತ್ತಷ್ಟು ಹುರುಪು ನೀಡಿತು’ ಎಂದರು.

‘ದಮನಿತರ ಚಳವಳಿ’ ಕುರಿತು ಮಾತನಾಡಿದ ದಲಿತ ಸಾಹಿತ್ಯ ಪರಿಷತ್ ಜಿಲ್ಲಾ ಘಟಕ ಅಧ್ಯಕ್ಷ ಗುರುರಾಜು ಯರಗನಹಳ್ಳಿ, ‘ದಲಿತರು ಹಿಂದೂಗಳಲ್ಲ ಎಂದು 1930ರಲ್ಲಿ ಡಾ.ಬಿ.ಅಂಬೇಡ್ಕರ್ ಪ್ರತಪಾದಿಸಿದ ದಿನದಿಂದಲೇ ದೇಶದಲ್ಲಿ ದಮನಿತರ ಚಳವಳಿ ಆರಂಭವಾಯಿತು. 1920ರಿಂದ 1932ರವರೆಗೆ ಸ್ವತಂತ್ರರಾಗಿದ್ದ ದೇಶದ ದಲಿತರು ಪೂನಾ ಒಪ್ಪಂದ ಬಳಿಕ ಸ್ವತಂತ್ರ ಹೀನರಾದರು. ಪ್ರತ್ಯೇಕ ಚುನಾಯಣೆಗೆ ಹೋದ ಬಳಿಕ ಅರೆಜೀವವಾದರು. ಡಾ.ಬಿ.ಆರ್ ಅಂಬೇಡ್ಕರ್ ಅವರ ಬರಹ ಮತ್ತು ಭಾಷಣಗಳು ಇಂದಿನ‌ ದಲಿತರಿಗೆ ದಾರಿದೀಪವಾಗಬೇಕಿದೆ. ಅವರ ಬರಹಗಳೇ ಇಂದು ದಲಿತರ ಚಳುವಳಿಗೆ ಮುನ್ನಡಿಯಾಗಿವೆ’ ಎಂದರು.

‘ರಾಜ್ಯದಲ್ಲಿ ದಲಿತರ ಹೋರಾಟಕ್ಕೆ ದಲಿತ ಸಂಘರ್ಷ ಸಮಿತಿಯ ಕೊಡುಗೆ ಅಪಾರವಾದುದ್ದಾಗಿದೆ. ಅದರ ಪ್ರಭಾವ ಇಡೀ ರಾಜ್ಯಕ್ಕೆ ಆವರಿಸಿ ಪ್ರತಿ ಜಿಲ್ಲೆಗಳಲ್ಲೂ ತನ್ನ ಕಬಂದಬಾಹು ಚಾಚಿದೆ. 1994ರಲ್ಲಿ ಕೊಳ್ಳೇಗಾಲದ ಮುಳ್ಳೂರು ಗ್ರಾಮದಲ್ಲಿ ಡಿಎಸ್ಎಸ್ ವತಿಯಿಂದ ನಡೆದ ತರಬೇತಿ ಕಾರ್ಯಕ್ರಮ ಈ ಭಾಗದಲ್ಲಿ ದಲಿತ ಸಂಘರ್ಷ ಸಮಿತಿ ವಿಸ್ತಾರವಾಗಲು ಸಹಕಾರಿಯಾಯಿತು. ಹೋರಾಟ, ಚಳವಳಿಗಳು ನಡೆದರೂ ಇಂದಿಗೂ ಸಾಕಷ್ಟು ಕಡೆ ಅಸ್ಪೃಶ್ಯತೆ ಜೀವಂತವಾಗಿದೆ. ಅಸ್ಪೃಶ್ಯತೆ ಜೀವಂತವಿರುವವರೆಗೂ ಚಳವಳಿ, ಹೋರಾಟಗಳು ಜೀವಂತವಾಗಿರುತ್ತವೆ’ ಎಂದರು.

ದಲಿತ ಸಂಘರ್ಷ ಸಮಿತಿಯ ಸಂಚಾಲಕ ದೊಡ್ಡಿಂದುವಾಡಿ ಸಿದ್ದರಾಜು, ಕನ್ನಡ ಹೋರಾಟಗಾರ ಚಾ.ರಂ.ಶ್ರೀನಿವಾಸ ಗೌಡ, ಕೊಳ್ಳೇಗಾಲದ ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ನಿಕಟಪೂರ್ವ ಅಧ್ಯಕ್ಷ ನಂಜುಂಡಸ್ವಾಮಿ, ದಸಂಸ ಸಂಚಾಲಕ ಯರಿಯೂರು, ಪ್ರಾಂಶುಪಾಲ ಎಸ್‌.ಪ್ರಮೋದ್‌, ಸರ್ಕಾರಿ ಪ್ರಾಥಮಿಕ ಶಿಕ್ಷಕರ ಸಂಘದ ಎಂ.ಮಾದಪ್ಪ ಇದ್ದರು.

‘ಜಿಲ್ಲೆಯ ಅಸ್ಮಿತೆ ಉಳಿಸಿದ ಚಳವಳಿ’

ಅಧ್ಯಕ್ಷತೆ ವಹಿಸಿದ್ದ ಪ್ರಗತಿಪರ ಚಿಂತಕ ವೆಂಕಟರಮಣಸ್ವಾಮಿ (ಪಾಪು) ಮಾತನಾಡಿ, ‘ಈ ಭಾಗದ ಅಸ್ಮಿತೆಯನ್ನು ಉಳಿಸುವಲ್ಲಿ ಚಳವಳಿಗಳು ಮುಖ್ಯ ಪಾತ್ರ ವಹಿಸಿವೆ. ದಲಿತ ಸಂಘರ್ಷ ಸಮಿತಿ ಪ್ರೇರಣೆಯಿಂದ ಹುಟ್ಟಿಕೊಂಡ ದಲಿತ ಚಳವಳಿಗಳು ದಮನಿತರ ದನಿಯಾಗಿ ಕಾರ್ಯನಿರ್ವಹಿಸಿವೆ. ಜಿಲ್ಲೆಯಲ್ಲಿ ನಡೆದ ಹಲವು ಚಳವಳಿಗಳ ಪರಿಣಾಮ ಸಾಕಷ್ಟು ಸಮಸ್ಯೆಗಳು ಪರಿಹಾರದ ಹಾದಿಯನ್ನು ಕಂಡಿವೆ. ಚಳವಳಿಗಳು ಮರುಹುಟ್ಟು ಪಡೆಯುವುದರ ಜತೆಗೆ ಈ ಭಾಗದ ದೀನ ದಲಿತರ ವಿಮೋಚನೆಗೆ ಶ್ರಮಿಸುವಂತ ನಿಟ್ಟಿನಲ್ಲಿ ಸಾಗುವುದರ ಮೂಲಕ ಮತ್ತಷ್ಟು ವಿಚಾರಗಳನ್ನು ಜನತೆಗೆ ಅರಿವು ಮೂಡಿಸಬೇಕು’ ಎಂದು ಆಶಿಸಿದರು.