ಗೋಡೆಗಳಲ್ಲಿ ಕಾನೂನು ವಿವರ: ಮಲ್ಲಂದೂರಲ್ಲಿ ಮಾದರಿ ಠಾಣೆ

ಮಲ್ಲಂದೂರು ವೃತ್ತದಿಂದಲೇ ಬಿಳಿ ಬಣ್ಣದ ಕಟ್ಟಡ, ಅದಕ್ಕೆ ಅಳವಡಿಸಿರುವ ಕೆಂಪು ಬಣ್ಣದ ನಾಮಫಲಕಗಳು ಕಾಣಿಸುತ್ತವೆ.

ಕಾಂಪೌಂಡ್‌ ಮತ್ತು ಗೋಡೆಗಳು ಕಾನೂನು ಅರಿವು ಮೂಡಿಸುವ ಭಂಡಾರವಾಗಿ ಮಾರ್ಪಟ್ಟಿವೆ. ಇಲಾಖೆಯ ನಿಯಮಗಳು, ಪೋಕ್ಸೊ ಕಾಯ್ದೆ, ಸಂಚಾರ ನಿಯಮ, ಅಪ್ರಾಪ್ತರಿಗೆ ವಾಹನ ಚಾಲನೆಗೆ ಕೊಡಬೇಡಿ, ಮಕ್ಕಳನ್ನ ಕೆಲಸಕ್ಕೆ ಬಳಸಬಾರದು, ಬಾಲಾಪಾರಾಧ ಶಿಕ್ಷಾರ್ಹ ಅಪರಾಧ ಸೇರಿ ಹಲವು ಮಾಹಿತಿಯನ್ನು ಚಿತ್ರಗಳ ಮೂಲಕ ಬಿಂಬಿಸಲಾಗಿದೆ.

ಕಾಡುಪ್ರಾಣಿಗಳ ಬೇಟೆ, ಮರ ಕಡಿಯುವುದು, ಕಾಡುಪ್ರಾಣಿಗಳ ರಕ್ಷಣೆ ಮಾಡಬೇಕು ಎಂಬ ಮಾಹಿತಿ ನೀಡುವ ಮೂಲಕ ಪರಿಸರ ರಕ್ಷಣೆಯ ಕಾಳಜಿಯನ್ನೂ ಮೆರೆಯಲಾಗಿದೆ.

ಕಾಂಪೌಂಡ್ ದಾಟಿ ಒಳ ಹೋದರೆ ಕಟ್ಟಡದ ಎರಡು ಬದಿಯಲ್ಲಿ ಹುಲ್ಲುಹಾಸಿನ ಉದ್ಯಾನ ಎದುರಾಗುತ್ತದೆ. ಅಲ್ಲಿ ತರಹೇವಾರಿ ಗಿಡಗಳನ್ನು ಬೆಳೆಸಲಾಗಿದ್ದು, ಸಿಬ್ಬಂದಿಯೇ ನಿರ್ವಹಣೆ ಮಾಡುತ್ತಿದ್ದಾರೆ. ಠಾಣೆಯ ಒಳ ಹೋಗುವ ಮುನ್ನವೇ ಮೇಜು ಅಳವಡಿಸಲಾಗಿದೆ. ದೂರು ನೀಡಲು ಬಂದವರು ಕುಳಿತುಕೊಳ್ಳಲು ಆಸನಗಳ ವ್ಯವಸ್ಥೆ ಮಾಡಲಾಗಿದೆ. ಒಳ ಹೋದರೆ ಚಿಕ್ಕಮಗಳೂರು ಜಿಲ್ಲೆ ಮತ್ತು ರಾಜ್ಯದ ಹಲವು ಪ್ರಮುಖ ತಾಣಗಳ ಚಿತ್ರಗಳಿವೆ. ಇನ್ನೊಂದೆಡೆ ಠಾಣೆ ವ್ಯಾಪ್ತಿಯ ನಕ್ಷೆಗಳಿವೆ. 

ಠಾಣೆಯ ರೆಕಾರ್ಡ್‌ ರೂಂ, ಕಂಪ್ಯೂಟರ್ ಕೊಠಡಿ ಎಲ್ಲವೂ ಹೈಟೆಕ್‌ ಆಗಿವೆ. ಅದರಲ್ಲೂ ಸಬ್‌ಇನ್‌ಸ್ಪೆಕ್ಟರ್ ಕೊಠಡಿ ಯಾವ ಎಸ್ಪಿ ಕೊಠಡಿಗೂ ಕಡಿಮೆ ಇಲ್ಲ ಎಂಬಂತಿದೆ. ಮಲೆನಾಡಿನಲ್ಲಿ ತಣ್ಣನೆಯ ವಾತಾವರಣದಲ್ಲಿರುವ ಈ ಠಾಣೆಗೆ ಬರುವ ದೂರುಗಳ ಸಂಖ್ಯೆಯೂ ಕಡಿಮೆಯಿದ್ದು, ಠಾಣೆಯ ವಾತಾವರಣ ಕೂಡ ತಣ್ಣಗಿದೆ.

ಠಾಣೆಗೆ ಒಮ್ಮೆ ಬಂದವರು ನಿರ್ವಹಣೆ ಕಂಡು ಅಚ್ಚರಿ ಪಡೆದೆ ಹೋಗುವುದಿಲ್ಲ. ಜನಸ್ನೇಹಿಯಾಗಿಯೂ ಠಾಣೆಯನ್ನು ನಿರ್ವಹಿಸಲಾಗುತ್ತಿದೆ ಎಂದು ಸಿಬ್ಬಂದಿ ಹೇಳುತ್ತಾರೆ.