ಗುರುವಾರ , ಜೂನ್ 24, 2021
28 °C

ಆಸ್ತಿ ವಿವಾದ: ಕೋವಿಡ್ ಸೋಂಕಿತ ಅಣ್ಣನನ್ನು ಕೊಚ್ಚಿ ಕೊಂದ ತಮ್ಮ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಕಳಸ: ಕೋವಿಡ್-19ನಿಂದ ಬಳಲುತ್ತಿದ್ದ ಅಣ್ಣನನ್ನು ಸ್ವಂತ ತಮ್ಮನೇ ಆಸ್ತಿ ವಿವಾದಕ್ಕೆ ಸಂಬಂಧಿಸಿದಂತೆ ಮರಸಣಿಗೆ ಗ್ರಾಮದಲ್ಲಿ ಶನಿವಾರ ರಾತ್ರಿ ಹತ್ಯೆ ಮಾಡಿರುವುದು ವರದಿಯಾಗಿದೆ.

ಇಲ್ಲಿನ ಕಂಬಳಗದ್ದೆಯ ಚಂದ್ರಮತಿ ಮತ್ತು ಅನಂತರಾಜಯ್ಯ ದಂಪತಿಗಳ ಪುತ್ರ ಮಹಾವೀರ (45) ಕೊಲೆಯಾದವರು. ಮಹಾವೀರ ಇಲ್ಲಿನ ಇಡಿಕಿಣಿ ಕೃಷಿ ಮತ್ತು ಸಹಕಾರ ಸಂಘದಲ್ಲಿ ನೌಕರಿ ಮಾಡುತ್ತಿದ್ದರು. ಅವರ ತಮ್ಮ ಪಾರ್ಶ್ವನಾಥ (34) ಮೂಡಬಿದ್ರೆ ಬಳಿಯಿರುವ ತನ್ನ ಅಕ್ಕನ ಮನೆಯಲ್ಲಿ 3 ವರ್ಷಗಳಿಂದ ವಾಸ್ತವ್ಯ ಇದ್ದರು. 6 ತಿಂಗಳ ಹಿಂದೆ ಊರಿಗೆ ಮರಳಿದ್ದರು.

ಈ ಕುಟುಂಬಕ್ಕೆ 8 ಎಕರೆ ಜಮೀನು ಇದ್ದು ಆಸ್ತಿ ವಿಚಾರವಾಗಿ ಪುತ್ರರಿಬ್ಬರ ನಡುವೆ ಕಲಹ ನಡೆಯುತ್ತಲೇ ಇತ್ತು ಎಂದು ತಾಯಿ ಚಂದ್ರಮತಿ ಅವರು ಕಳಸ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ.

ಕೋವಿಡ್ ಸೋಂಕಿಗೆ ಒಳಗಾಗಿದ್ದ ಮಹಾವೀರ ಅವರನ್ನು ಮೂಡಿಗೆರೆ ಕೋವಿಡ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅಲ್ಲಿಂದ ಶನಿವಾರ ಸಂಜೆ ಮರಸಣಿಗೆಗೆ ಕರೆತರಲಾಗಿತ್ತು.

'ರಾತ್ರಿ 8.30ರ ವೇಳೆಗೆ ಮರಸಣಿಗೆಯಿಂದ ಬಂದ ಪಾರ್ಶ್ವನಾಥ ಮನೆಯ ಜಗಲಿಯಲ್ಲಿ ಮಲಗಿದ್ದ ಅಣ್ಣ ಮಹಾವೀರನ ಮುಖ ಮತ್ತು ತಲೆಗೆ ಕತ್ತಿಯಿಂದ ಕಡಿದಿದ್ದಾನೆ. ಇದನ್ನು ಕಂಡು ನಾನು ಅವನ ಕೈಯಿಂದ ಕತ್ತಿ ಕಸಿದುಕೊಂಡೆ. ಆಗ ಸೌದೆ ಕೊಟ್ಟಿಗೆಯಲ್ಲಿ ಇದ್ದ ಕೊಡಲಿಯನ್ನು ಹುಡುಕಿ ಮತ್ತೆ ಅಣ್ಣನ ತಲೆ ಮತ್ತು ಎಡ ಭಾಗದ ಕಿವಿ ಬಳಿ ಕೊಚ್ಚಿದ್ದಾನೆʼ ಎಂದು ಚಂದ್ರಮತಿ ದೂರಿದ್ದಾರೆ.

ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಮಹಾವೀರ ಅವರನ್ನು ಆಸ್ಪತ್ರೆಗೆ ಕಳಿಸಲು ಅಕ್ಕಪಕ್ಕದ ಮನೆಗಳಿಗೆ ಹೋಗಿ ಕರೆದರೂ ಕೋವಿಡ್ ರೋಗಿ ಎಂಬ ಕಾರಣಕ್ಕೆ ಯಾರೂ ಸ್ಪಂದಿಸಲಿಲ್ಲ. ಅಷ್ಟರಲ್ಲಿ ಮಹಾವೀರನ ಪ್ರಾಣ ಹೋಗಿತ್ತು. ಈ ಕೊಲೆ ಆಸ್ತಿ ವಿವಾದದಿಂದ ನಡೆದಿದೆ ಎಂದು ತಿಳಿಸಿದ್ದಾರೆ.

ಪಾರ್ಶ್ವನಾಥನನ್ನು ಕಳಸ ಪೊಲೀಸರು ಬಂಧಿಸಿದ್ದಾರೆ. ಕಳಸದ ಬಜರಂಗದಳ ಕಾರ್ಯಕರ್ತರು ಪಿಪಿಇ ಕಿಟ್‍ಗಳನ್ನು ಧರಿಸಿ ಶವ ಸಾಗಿಸಲು ಮತ್ತು ಅಂತ್ಯಕ್ರಿಯೆ ನಡೆಸಲು ನೆರವಾದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು