ದಾವಣಗೆರೆ| ಹವಾಮಾನದಲ್ಲಿ ಏರಿಳಿತ: ವೈರಾಣು ಜ್ವರಕ್ಕೆ ಹೈರಾಣಾದ ಜನ

ಜಿಲ್ಲಾ ಆಸ್ಪತ್ರೆ ಸೇರಿದಂತೆ ಎಲ್ಲಾ ಸರ್ಕಾರಿ ಆಸ್ಪತ್ರೆಗಳಲ್ಲೂ ಮಕ್ಕಳ ತಜ್ಞರು ಸೇರಿದಂತೆ ತಜ್ಞ ವೈದ್ಯರಿದ್ದಾರೆ. ವೈರಾಣು ಜ್ವರದ ಲಕ್ಷಣ ಆಧರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಮಕ್ಕಳ ಬಗ್ಗೆ ಪೋಷಕರು ಹೆಚ್ಚು ಕಾಳಜಿ ವಹಿಸಲಿ ಡಾ.ಎಸ್‌.ಷಣ್ಮುಖಪ್ಪ ಡಿಎಚ್‌ಒ

ಸಾಧ್ಯವಾದಷ್ಟು ಕಾಯಿಸಿ ಆರಿಸಿದ ನೀರನ್ನು ಕುಡಿಯಿರಿ * ವೈಯಕ್ತಿಕ ಸ್ವಚ್ಛತೆ ಕಾಪಾಡಿಕೊಳ್ಳಿ  * ಕಾಯಿಲೆ ಇರುವವರು ಕೆಮ್ಮುವಾಗ ಕರವಸ್ತ್ರ ಬಳಸಿ ಎಲ್ಲೆಂದರಲ್ಲಿ ಉಗುಳಬೇಡಿ * ಅಸ್ತಮಾ ರೋಗಿಗಳು ಗರ್ಭಿಣಿಯರು ವೃದ್ಧರು ರಕ್ತದೊತ್ತಡ (ಬಿ.ಪಿ.) ರೋಗಿಗಳು ಹೆಚ್ಚಿನ ಜಾಗ್ರತೆ ವಹಿಸಿ * ಐಸ್‌ಕ್ರೀಮ್‌ ಹಾಗೂ ಇನ್ನಿತರ ತಂಪು ಪಾನೀಯಗಳನ್ನು ಸೇವಿಸಬೇಡಿ * ಬಿಸಿ ಆಹಾರ ಪದಾರ್ಥ ಸೇವಿಸಿ ಬೆಚ್ಚಗಿನ ಉಡುಪು ಧರಿಸಿ

ಪಟ್ಟಣ ಸೇರಿದಂತೆ ತಾಲ್ಲೂಕಿನಾದ್ಯಂತ ಎರಡ್ಮೂರು ವಾರಗಳಿಂದ ಹವಾಮಾನ ವೈಪರೀತ್ಯದ ಪರಿಣಾಮವಾಗಿ ಮಕ್ಕಳಿಂದ ವೃದ್ಧರವರೆಗೆ ಎಲ್ಲಾ ವಯೋಮಾನದವರೂ ಶೀತ ನೆಗಡಿ ಕೆಮ್ಮು ಹಾಗೂ ಜ್ವರದಿಂದ ಬಳಲಿ ಚಿಕಿತ್ಸೆಗಾಗಿ ಆಸ್ಪತ್ರೆಗಳಿಗೆ ಎಡತಾಕುವಂತಾಗಿದೆ.  ಸ್ವಲ್ಪ ಹೊತ್ತು ಬಿರು ಬಿಸಿಲು ಇನ್ನು ಸ್ವಲ್ಪ ಹೊತ್ತು ಚಳಿಯ ವಾತಾವರಣ ಆಗಾಗ ಬಿಟ್ಟು ಬಿಟ್ಟು ಸುರಿಯುವ ಜಿಟಿಜಿಟಿ ಮಳೆಯು ಜನರಲ್ಲಿ ಅನಾರೋಗ್ಯ ಸೃಷ್ಟಿಸಿದೆ. ಹೆಚ್ಚಿನದಾಗಿ ಮಕ್ಕಳು ಶೀತ ನೆಗಡಿ ಕೆಮ್ಮು ಹಾಗೂ ಜ್ವರ ಬಾಧೆಗೆ ತುತ್ತಾಗುತ್ತಿದ್ದಾರೆ.  ‘ಇಲ್ಲಿನ ಸರ್ಕಾರಿ ಆಸ್ಪತ್ರೆಗಳಿಗೆ ಪ್ರತಿ ದಿನ 30ಕ್ಕೂ ಹೆಚ್ಚು ಮಕ್ಕಳು ಬರುತ್ತಿದ್ದು ಚಿಕಿತ್ಸೆ ನೀಡಲಾಗುತ್ತಿದೆ. ಚಳಿಯ ವಾತಾವರಣದ ಕಾರಣಕ್ಕೆ ಮಕ್ಕಳಿಗೆ ದೇಹವನ್ನು ಬಿಸಿಯಾಗಿ ಇಡಲು ಉಣ್ಣೆ ಬಟ್ಟೆಗಳನ್ನು ತೊಡಿಸಬೇಕು’ ಎಂದು ತಾಲ್ಲೂಕು ವೈದ್ಯಾಧಿಕಾರಿ ಈ. ಶಿವಕುಮಾರ್ ಸಲಹೆ ನೀಡಿದರು.  ‘ತಾಲ್ಲೂಕಿನ ಎಲ್ಲ ಸರ್ಕಾರಿ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲೂ ವೈರಲ್‌ ಫೀವರ್‌ಗೆ ಸಂಬಂಧಿಸಿ ಸಾಕಷ್ಟು ಔಷಧಿಗಳ ದಾಸ್ತಾನು ಇದೆ’ ಎಂದು ಮಾಹಿತಿ ನೀಡಿದರು.  ‘ಮಗನಿಗೆ ಮೂರು ದಿನಗಳಿಂದ ಶೀತ ಕೆಮ್ಮು ಹಾಗೂ ಜ್ವರ ಇದೆ. ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದುಕೊಂಡು ಬಂದಿದ್ದೇವೆ’ ಎಂದು ಪಟ್ಟಣದ ವಾಸಿ ರುಕ್ಸನಾ ಬೇಗಂ ಹೇಳಿದರು.