ಸಂತೇಬೆನ್ನೂರು | ಹವಾಮಾನ ವೈಪರೀತ್ಯ: ಕಡಲೆ ಇಳುವರಿ ಕುಸಿತ

ಮಳೆಯಾಧಾರಿತ ಕೃಷಿ ಭೂಮಿಯಲ್ಲಿ ಈ ಬಾರಿ ಪ್ರತಿ ಎಕರೆಗೆ ಗರಿಷ್ಠ ಮೂರು ಕ್ವಿಂಟಲ್ ಕಡಲೆ ಇಳುವರಿ ಬರಲಿದೆ. ಅಕ್ಟೋಬರ್ ಅಂತ್ಯದಲ್ಲಿ ಮೂರು ಎಕರೆಗೆ ಕಡಲೆ ಬಿತ್ತನೆ ಮಾಡಲಾಗಿತ್ತು. ಡಿಸೆಂಬರ್‌ನಲ್ಲಿ ಹೂವು ಬಿಡುವ ಸಂದರ್ಭದಲ್ಲಿ ಮಂಜು ಬೀಳಲಿಲ್ಲ. ಚಳಿ ಪ್ರಮಾಣ ಕಡಿಮೆ ಇತ್ತು. ಹಾಗಾಗಿ ನಿರೀಕ್ಷಿಸಿದ ಪ್ರಮಾಣದಲ್ಲಿ ಕಾಯಿಗಟ್ಟಲಿಲ್ಲ. ಬಿತ್ತನೆಗೆ ಒಂದು ಹಸಿ ಮಳೆ ಆಗಿತ್ತು. ಆನಂತರ ಒಂದು ಮಳೆ ಬಂದರೂ ಇಬ್ಬನಿಯಲ್ಲಿ ಕಡಲೆ ಸಮೃದ್ಧವಾಗಿ ಬೆಳೆಯುತ್ತಿತ್ತು. ಇಬ್ಬನಿಯೂ ಬೀಳದೆ ಗಿಡ ಸೊರಗಿದವು ಎಂದು ಭೀಮನೆರೆ ರೈತ ವಿಶ್ವನಾಥ್ ಅಳಲು ತೋಡಿಕೊಂಡರು.

‘ಬಿತ್ತನೆಗೆ ಪ್ರತಿ ಎಕರೆಗೆ ₹ 4,000ದಿಂದ ₹ 5,000 ಖರ್ಚು ತಗುಲಿದೆ. ಕೊಯ್ಲು, ಯಾಂತ್ರಿಕ ಒಕ್ಕಣೆಗೆ ಪ್ರತಿ ಎಕರೆಗೆ ₹ 4,000 ಖರ್ಚಾಗುತ್ತದೆ. ಕಳೆ, ಔಷಧ ಸಿಂಪಡಣೆಗೆ ₹ 4,000 ಖರ್ಚು ಆಗಿದೆ. ಪ್ರತಿ ಎಕರೆಗೆ ಕಡಲೆ ಬೆಳೆಯಲು ₹ 12, 000 ಖರ್ಚು ಆಗುತ್ತದೆ. ಬಹುತೇಕ ಹೊಲಗಳಲ್ಲಿ 2 ಕ್ವಿಂಟಲ್‌ಗಿಂತ ಹೆಚ್ಚು ಇಳುವರಿ ಸಾಧ್ಯವಿಲ್ಲ. ಸದ್ಯ ಮಾರುಕಟ್ಟೆಯಲ್ಲಿ ಪ್ರತಿ ಕ್ವಿಂಟಲ್‌ಗೆ ₹ 5000 ಇದೆ. ಇಳುವರಿ ಕುಸಿತದಿಂದ ನಷ್ಟ ಅನುಭವಿಸುವಂತಾಗಿದೆ’ ಎಂದು ರೈತ ರುದ್ರೇಶ್ ಹೇಳಿದರು.

‘ಕೆಲ ರೈತರು ನೀರು ಹಾಯಿಸುವ ಮೂಲಕ ಕಡಲೆ ಬೆಳೆಯಲ್ಲಿ ಇಳುವರಿ ಹೆಚ್ಚಿಸಿಕೊಂಡಿದ್ದಾರೆ. ನೀರು ಕೊಟ್ಟ ಕಡಲೆ ಜಮೀನಿನಲ್ಲಿ 6ರಿಂದ 7 ಕ್ವಿಂಟಲ್ ಇಳುವರಿ ಸಿಗಲಿದೆ. 12 ಎಕರೆಯಲ್ಲಿ ಕಡೆಲೆ ಬೆಳೆದಿದ್ದೇನೆ. 4 ಎಕರೆಗೆ ಮಾತ್ರ ನೀರುಣಿಸಿದ್ದೇನೆ. ಉಳಿದಂತೆ ಒಣ ಭೂಮಿಯಲ್ಲಿ ಕಡಲೆ ಬೆಳೆ ಕುಸಿದಿದೆ’ ಎಂದು ರೈತ ಅನಿಲ್ ಕುಮಾರ್ ಹೇಳಿದರು.