ಹೊನ್ನಾಳಿ | ಕುಸ್ತಿ ಟೂರ್ನಿಗೆ ತೆರೆ: ತೊಡೆ ತಟ್ಟಿದ 250ಕ್ಕೂ ಹೆಚ್ಚು ಪೈಲ್ವಾನರು

ಹೊನ್ನಾಳಿ: ಪಟ್ಟಣದ ದೊಡ್ಡಕೇರಿ ಬೀರಲಿಂಗೇಶ್ವರ ದೇವರ ಕಾರ್ತಿಕೋತ್ಸವ ಅಂಗವಾಗಿ ಹಮ್ಮಿಕೊಂಡಿದ್ದ ಬಯಲು ಕಾಟಾ ಜಂಗಿ ಕುಸ್ತಿಗೆ ಶುಕ್ರವಾರ ತೆರೆಬಿದ್ದಿತು. ಟೂರ್ನಿಯಲ್ಲಿ 250ಕ್ಕೂ ಹೆಚ್ಚು ಕುಸ್ತಿಪಟುಗಳು ಕಣಕ್ಕಿಳಿದಿದ್ದರು. ಮೂರನೇ ದಿನದ ಕುಸ್ತಿ ಪಂದ್ಯಕ್ಕೆ ಬಯಲುಸೀಮೆ ಪ್ರದೇಶಾಭಿವೃದ್ಧಿ ನಿಗಮದ ಅಧ್ಯಕ್ಷ ಎಚ್.ಬಿ. ಮಂಜಪ್ಪ ಚಾಲನೆ ನೀಡಿದರು.

. ಗಮನ ಸೆಳೆದ ಮಹಿಳಾ ಕುಸ್ತಿ: ಯುವಕರನ್ನೂ ಮೀರಿಸುವಂತೆ ಮಹಿಳೆಯರು ಕುಸ್ತಿ ಪ್ರದರ್ಶಿಸಿದ್ದು ವಿಶೇಷ. ಬೆಳಗಾವಿಯ ಪ್ರಜ್ಞಾ ಹಾಗೂ ದಾವಣಗೆರೆಯ ಪೂಜಾ ಅವರು ಅರ್ಧಗಂಟೆಗೂ ಹೆಚ್ಚು ಕಾಲ ಕಣದಲ್ಲಿ ಕಾದಾಡಿದರು. ಪೂಜಾ ವಿಜೇತರಾದರು. ಮತ್ತೊಂದು ಪಂದ್ಯದಲ್ಲಿ ದಾವಣಗೆರೆಯ ಆಕಾಂಕ್ಷಾ ಮತ್ತು ಗದಗ್ನ ಪ್ರಿಯಾಂಕಾ ಸ್ಪರ್ಧಿಸಿದರು. ಈ ನಾಲ್ವರು ಯುವತಿಯರು ಆಲ್ ಇಂಡಿಯಾ ಯೂನಿವರ್ಸಿಟಿ ಕುಸ್ತಿಪಟುಗಳಾಗಿದ್ದಾರೆ ಎಂದು ತರಬೇತುದಾರರು ತಿಳಿಸಿದರು.

. ದೇವರ ಗಣಮಕ್ಕಳಾದ ಅಣ್ಣಪ್ಪಸ್ವಾಮಿ, ಪ್ರಭುಸ್ವಾಮಿ, ಬುದ್ದಿವಂತರ ನರಸಿಂಹಪ್ಪ, ಗೌಡರ ಗಾಳೇಶಪ್ಪ, ತೆಂಗಿನಮರದ ಮಾದಪ್ಪ, ಕುಸ್ತಿ ಸಮಿತಿ ಅಧ್ಯಕ್ಷ ಎಚ್.ಬಿ. ಅಣ್ಣಪ್ಪ, ಗೌರವಾಧ್ಯಕ್ಷ ಎನ್.ಕೆ. ಆಂಜನೇಯ, ಖಜಾಂಚಿ ಕಾಳಿಂಗಪ್ಪ, ಪುರಸಭಾ ಮಾಜಿ ಸದಸ್ಯರಾದ ಎಚ್.ಡಿ. ವಿಜೇಂದ್ರಪ್ಪ, ಧರ್ಮಪ್ಪ, ಕತ್ತಿಗೆ ನಾಗರಾಜ್, ಕಾಟ್ಯಾ ಪೈಲ್ವಾನ್, ಅಂಜುನಾಯ್ಕ, ಮಾಜಿ ಸೈನಿಕ ಎಂ. ವಾಸಪ್ಪ, ಅಧಿಕಾರಿಗಳಾದ ಪಿಎಸ್ಐ ಕುಮಾರ್, ನಿರ್ಮಲಾ, ನ್ಯಾಮತಿ ಸಿಪಿಐ ರವಿ, ಜಿ.ಪಂ. ಎಇಇ ಅಶೋಕ್, ಪರ್ತಕರ್ತರಾದ ರಾಜು, ಜಯಪ್ಪ, ಮಲ್ಲೇಶ್, ಯೋಗೀಶ್, ಮೃತ್ಯುಂಜಯ ಪಾಟೀಲ್ ಉಪಸ್ಥಿತರಿದ್ದರು. ಅಪಾರ ಸಂಖ್ಯೆಯ ಜನರು ಭಾಗವಹಿಸಿದ್ದರು.