ಹರಿಹರ | ಓವರ್ ಲೋಡ್ ಕಬ್ಬು ಸಾಗಣೆ; ಅಪಾಯಕ್ಕೆ ಆಹ್ವಾನ

ಕಬ್ಬು ಕಟಾವು ಮಾಡಿ ಸಕ್ಕರೆ ಕಾರ್ಖಾನೆಗಳಿಗೆ ಸಾಗಣೆ ಮಾಡಲಾಗುತ್ತಿದೆ. ಹರಿಹರ ನಗರದಲ್ಲಿ ನಿತ್ಯ ನೂರಾರು ಕಬ್ಬು ಸಾಗಣೆ ವಾಹನಗಳು ಸಂಚರಿಸುತ್ತವೆ.

ಮಿತಿಗಿಂತ ಹೆಚ್ಚು ಭಾರ ಹೊತ್ತು ನಗರದ ರಸ್ತೆಗಳಲ್ಲಿ ಸಾಗುವ ಡಬಲ್ ಟ್ರಾಲಿ ಟ್ರ್ಯಾಕ್ಟರ್ ಹಾಗೂ ಲಾರಿಗಳನ್ನು ಕಂಡು ಇತರೆ ವಾಹನಗಳ ಸವಾರರು ಭಯಪಡುವ ಸ್ಥಿತಿಯಿದೆ.

ಹಾವೇರಿ ಜಿಲ್ಲೆ ಭಾಗದಿಂದ ಕಬ್ಬು ಲೋಡ್ ಮಾಡಿದ ಲಾರಿ ಮತ್ತು ಟ್ರ್ಯಾಕ್ಟರ್‌ಗಳು ನಗರದೊಳಗೆ ಬೀರೂರು- ಸಮ್ಮಸಗಿ ಹೆದ್ದಾರಿ (ತುಂಗಭದ್ರಾ ಸೇತುವೆ) ಮೂಲಕ ಪ್ರವೇಶಿಸುತ್ತವೆ. ನಂತರ ಗಾಂಧಿ ವೃತ್ತದ ಮೂಲಕ ಹರಪನಹಳ್ಳಿ ಕಡೆಗೆ ಹೊಸಪೇಟೆ-ಶಿವಮೊಗ್ಗ ಹೆದ್ದಾರಿಯಲ್ಲಿ ಸಾಗುತ್ತವೆ.

ನಗರ ವ್ಯಾಪ್ತಿಯ 4 ಕಿ.ಮೀ. ಮಾರ್ಗದಲ್ಲಿ ಈ ವಾಹನಗಳು ಸಾಗುತ್ತವೆ. ಅತಿಯಾದ ಭಾರ ಹಾಗೂ ಗಾತ್ರದಿಂದಾಗಿ ಈ ವಾಹನಗಳು ತೆವಳುತ್ತಾ ಸಾಗುವಾಗ ಓಲಾಡುತ್ತವೆ. ಈ ವಾಹನದ ಹಿಂದೆ, ಅಕ್ಕ– ಪಕ್ಕ ಸಂಚರಿಸುವ ಬೇರೆ ವಾಹನ ಸವಾರರು ಓವರ್ ಟೇಕ್ ಮಾಡಲು ಹಿಂಜರಿಯುತ್ತಾರೆ.

ಬೆಳಿಗ್ಗೆ ಮತ್ತು ಸಂಜೆ ಶಾಲೆಗಳು ಆರಂಭ ಹಾಗೂ ಬಿಡುವ ಸಮಯದಲ್ಲಿ ನಗರದೊಳಗೆ ಶಾಲಾ ಮಕ್ಕಳನ್ನು ಸಾಗಿಸುವ ಆಟೊ, ಕಾರುಗಳ ಸಂಚಾರ ಅಧಿಕವಾಗಿರುತ್ತದೆ. ಆ ವೇಳೆಯೇ ಕಬ್ಬು ಸಾಗಣೆ ವಾಹನಗಳ ಸಂಚಾರವೂ ಅಧಿಕವಾಗಿರುತ್ತದೆ. ಇದು ಅಪಘಾತಕ್ಕೆ ಆಹ್ವಾನ ನೀಡುವಂತಿದೆ.

6 ಚಕ್ರದ ಲಾರಿ ಹಾಗೂ ಎರಡು ಟ್ರಾಲಿಗಳನ್ನು ಜೋಡಿಸಿದ ಟ್ರ್ಯಾಕ್ಟರ್‌ಗಳ ಮೂಲಕ ಕಬ್ಬು ಸಾಗಣೆ ಮಾಡಲಾಗುತ್ತಿದೆ. 6 ಚಕ್ರದ ಲಾರಿಯಲ್ಲಿ ನಿಯಮದ ಪ್ರಕಾರ ಗರಿಷ್ಠ 12.50 ಟನ್ ಕಬ್ಬು ಸಾಗಣೆ ಮಾಡಬಹುದು. ಆದರೆ, ಈ ಲಾರಿಗಳಲ್ಲಿ ಅಂದಾಜು 16 ರಿಂದ 20 ಟನ್ ಭಾರದ ಕಬ್ಬನ್ನು ಸಾಗಿಸಲಾಗುತ್ತಿದೆ.

ಇನ್ನು 6 ಟನ್ ಸಾಮರ್ಥ್ಯದ ಟ್ರ್ಯಾಕ್ಟರ್‌ಗಳಲ್ಲಿ 10 ರಿಂದ 12 ಟನ್ ಕಬ್ಬು ಸಾಗಿಸಲಾಗುತ್ತಿದೆ. ಸಕ್ಕರೆ ಕಾರ್ಖಾನೆಗಳ ಜೊತೆಗೆ ಸಾಗಣೆ ಒಪ್ಪಂದ ಮಾಡಿಕೊಳ್ಳುವ ಸಾಗಣೆದಾರರು ಲಾರಿ, ಟ್ಯ್ರಾಕ್ಟರ್‌ಗಳಲ್ಲಿ ಹೀಗೆ ನಿಯಮ ಮೀರಿ ಕಬ್ಬು ಸಾಗಣೆ ಮಾಡುತ್ತಿದ್ದಾರೆ. ಹೆಚ್ಚೂ ಕಡಿಮೆ 10 ಲೋಡ್‌ನಲ್ಲಿ ಸಾಗಿಸಬೇಕಾದ ಕಬ್ಬನ್ನು ಇವರು 5ರಿಂದ 6 ಲೋಡ್‌ಗಳಲ್ಲೇ ಸಾಗಣೆ ಮಾಡುತ್ತಿದ್ದಾರೆ.

ನಗರದ ನಾಡಬಂದ್ ಶಾವಲಿ ದರ್ಗಾ ಎದುರು 3 ವರ್ಷದ ಹಿಂದೆ ಕಬ್ಬಿನ ಟ್ರ್ಯಾಕ್ಟರ್‌ ಅಪಘಾತದಲ್ಲಿ 12 ವರ್ಷದ ಬಾಲಕ ಮೃತಪಟ್ಟಿದ್ದ, ಕಳೆದ ನ.22ರಂದು ನಗರದ ಹೊರವಲಯದಲ್ಲಿ ಕಬ್ಬಿನ 1 ಲಾರಿ ಹಾಗೂ ಟ್ರ್ಯಾಕ್ಟರ್‌ಗಳ ಉರುಳಿ ಬಿದ್ದಿದ್ದವು.