ಅವಳಿ ನಗರಕ್ಕೆ ನೀರು ಪೂರೈಕೆ ಯೋಜನೆ | ನಿರಂತರ ನೀರು; ಮುಂದಿನ ವರ್ಷ ಲಭ್ಯ

ನೀರಿನ ಶುಲ್ಕ ಪಾವತಿಸುವ ವ್ಯವಸ್ಥೆಯನ್ನು ಸುಲಭವಾಗಿಸಲು ಹಲವು ಮಾರ್ಗಗಳನ್ನು ಆರಂಭಿಸಲಾಗಿದೆ. ಯುಪಿಐ ಆ್ಯಪ್‌ (ಫೋನ್‌ ಪೇ, ಗೂಗಲ್‌ ಪೇ...), ಡೆಬಿಟ್‌ ಕಾರ್ಡ್‌/ ಕ್ರೆಡಿಟ್‌ ಕಾರ್ಡ್‌ ಬಳಸಲು ಸ್ವೈಪಿಂಗ್‌ ಮೆಷಿನ್‌, ಫೋನ್‌ ಬಿಲ್‌ನಲ್ಲಿಯೇ ಕ್ಯೂಆರ್‌ ಕೋಡ್‌ ಕೊಡಲಾಗಿ ಸ್ಕ್ಯಾನ್‌ ಮೂಲಕ ಹಣ ಪಾವತಿಸಬಹುದು. ಗ್ರಾಹಕರಿಗೆ ಎಸ್‌.ಎಂ.ಎಸ್‌ ಸೇವೆ ಕೂಡ ನೀಡಲಾಗುತ್ತಿದೆ. ನೀರು ಪೂರೈಕೆ ಮಾಹಿತಿ, ಬಿಲ್ಲಿಂಗ್‌– ಪಾವತಿ, ದೂರು ಪರಿಹಾರದ ಸ್ಥಿತಿ–ಗತಿ ಸೇರಿದಂತೆ 11 ರೀತಿಯ ಎಸ್‌ಎಂಎಸ್‌ ಸೇವೆ ನೀಡಲಾಗುತ್ತಿದೆ. ಮಾಹಿತಿಗೆ ಸಂಪರ್ಕಿಸಬೇಕಾದ ವೆಬ್‌ಸೈಟ್‌: www.hdmcwater.in

ಜನರು ಎದುರಿಸುತ್ತಿರುವ ನೀರಿನ ಸಮಸ್ಯೆ ಆಲಿಸಲು 24x7 ಕುಡಿಯುವ ನೀರು ಯೋಜನೆಯು ಸಹಾಯವಾಣಿ ಆರಂಭಿಸಲಾಗಿದೆ. ಜನರು ನೀಡುವ ದೂರನ್ನು ಆಲಿಸಿ, ತಕ್ಷಣ ಪರಿಹರಿಸಲು ಪ್ರಯತ್ನ ಮಾಡಲಾಗುತ್ತಿದೆ. ಈವರೆಗೆ 60,000 ದೂರುಗಳು ದಾಖಲಾಗಿವೆ. ಇವುಗಳಲ್ಲಿ ಶೇ 99 ಪರಿಹರಿಸಲಾಗಿದೆ. ಸಹಾಯವಾಣಿ ಸಂಖ್ಯೆ: 7996666247.

ಯೋಜನೆ ಅನುಷ್ಠಾನಗೊಳ್ಳುವ ವಾರ್ಡ್‌ಗಳಲ್ಲಿ ರೂರಲ್‌ ಡೆವಲಪ್‌ಮೆಂಟ್‌ ಸೊಸೈಟಿ ಸರ್ಕಾರೇತರ ಸಂಸ್ಥೆ (ಎನ್‌ಜಿಒ) ಪ್ರತಿನಿಧಿಗಳು ಭೇಟಿ ಕೊಟ್ಟು, ಸ್ಥಳೀಯರಿಗೆ ಯೋಜನೆಯ ಬಗ್ಗೆ ಮಾಹಿತಿ ನೀಡುತ್ತಾರೆ. ನೀರು ಬಳಕೆ, ಸಂರಕ್ಷಣೆ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದಾರೆ. ಈ ಯೋಜನೆಯ ಗ್ರಾಹಕರ (ನೀರು ಬಳಕೆದಾರರ) ಮಾಹಿತಿಯನ್ನು ಸಂಗ್ರಹಿಸಲಾಗುತ್ತಿದೆ. ಜಿಐಎಸ್‌ ಮೂಲಕ ಮ್ಯಾಪಿಂಗ್‌ ಮಾಡಿ, ಎಲ್ಲ ಮಾಹಿತಿಯನ್ನು ಕಂಪ್ಯೂಟರ್‌ಗೆ ಅಳವಡಿಸಲಾಗುತ್ತಿದೆ. ಎಲ್‌ ಆ್ಯಂಡ್‌ ಟಿ ಗುತ್ತಿಗೆ ಮುಗಿದ ತಕ್ಷಣ ಕಾಮಗಾರಿ ಪಾಲಿಕೆಗೆ ಹಸ್ತಾಂತರವಾದಾಗ ಯಾವುದೇ ತೊಂದರೆಯಾಗದಂತೆ ಕ್ರಮಕೈಗೊಳ್ಳಲಾಗುತ್ತಿದೆ.

ನೀರಸಾಗರ ಜಲಾಶಯದಲ್ಲಿ 1 ಟಿಎಂಸಿ ನೀರು ಸಂಗ್ರಹದ ಸಾಮರ್ಥ್ಯವಿದೆ. ಇಲ್ಲಿಂದ ಪ್ರತಿದಿನ 20 ದಶಲಕ್ಷ ಲೀಟರ್‌ ನೀರನ್ನು ಲಿಫ್ಟ್‌ ಮಾಡಿ, ಕಣವಿ ಹೊನ್ನಾಪುರ ಜಲಶುದ್ಧೀಕರಣ ಘಟಕಕ್ಕೆ ತರಲಾಗುತ್ತದೆ. ಇಲ್ಲಿ ಶುದ್ಧೀ ಕರಣ ಮಾಡಿದ ನಂತರ ಹಳೇ ಹುಬ್ಬಳ್ಳಿ, ನೆಹರು ನಗರ, ಎಸ್‌.ಎಂ. ಕೃಷ್ಣ ನಗರ, ಗೋಕುಲ್‌ ರಸ್ತೆ ಸೇರಿದಂತೆ 22 ವಾರ್ಡ್‌ಗಳಿಗೆ ನೀರು ಪೂರೈಸಲಾಗುತ್ತಿದೆ. ಇದಲ್ಲದೇ, ಕುಂದಗೋಳಕ್ಕೂ ಇಲ್ಲಿಂದಲೇ ಪ್ರತಿದಿನ ನೀರು ಸರಬರಾಜು ಮಾಡಲಾಗುತ್ತಿದೆ.