ಲಕ್ಷ್ಮೇಶ್ವರ | ಪಾತಾಳ ಕಂಡ ಜಲಮೂಲ: ಪರದಾಟ

ಲಕ್ಷ್ಮೇಶ್ವರ: ಭೀಕರ ಬರಗಾಲದ ಕಾರಣ ತಾಲ್ಲೂಕಿನಲ್ಲಿನ ಹಳ್ಳ-ಕೊಳ್ಳ, ಕೆರೆ-ಕಟ್ಟೆ, ಕೃಷಿಹೊಂಡ, ಚೆಕ್ ಡ್ಯಾಂಗಳು ನೀರಿಲ್ಲದೆ ಬಣಗುಡುತ್ತಿವೆ. ಇದರ ಪರಿಣಾಮ ಕೊಳವೆ ಬಾವಿಗಳಲ್ಲಿನ ಗಂಗೆ ಪಾತಾಳ ಸೇರುತ್ತಿದ್ದಾಳೆ. ಈಗಾಗಲೇ ಕೆಲ ಕೊಳವೆ ಬಾವಿಗಳೂ ಬತ್ತುತ್ತಿದ್ದು, ಮುಂದಿನ ದಿನಗಳಲ್ಲಿ ಕುಡಿಯುವ ನೀರಿಗೂ ಬರ ಎದುರಾಗುವ ಲಕ್ಷಣಗಳು ಈಗಲೇ ಗೋಚರಿಸುತ್ತಿವೆ.

ಕೆರೆ, ಹಳ್ಳ, ನದಿಗಳು ಸಂಪೂರ್ಣ ಬತ್ತಿದ ಕಾರಣ ಅಂತರ್ಜಲಮಟ್ಟ ತೀವ್ರ ಕುಸಿಯುತ್ತಿದೆ. ಲಕ್ಷ್ಮೇಶ್ವರ ಸೇರಿದಂತೆ ತಾಲ್ಲೂಕಿನ ಕೆಲ ಭಾಗಗಳಲ್ಲಿ ನೀರಿನ ಸಮಸ್ಯೆ ತಲೆದೋರುತ್ತಿದೆ. ತುಂಗಭದ್ರೆ ಬತ್ತಿದ ಕಾರಣ ಲಕ್ಷ್ಮೇಶ್ವರ ಪಟ್ಟಣ ಒಳಗೊಂಡಂತೆ ದೊಡ್ಡೂರು, ಸೂರಣಗಿ ಗ್ರಾಮಸ್ಥರಿಗೂ ನದಿ ನೀರಿನ ಬವಣೆ ಎದುರಾಗಿದೆ.

ನದಿಯಲ್ಲಿ ನೀರಿಲ್ಲದ ಕಾರಣ ಒಂದು ತಿಂಗಳಿಂದ ಲಕ್ಷ್ಮೇಶ್ವರಕ್ಕೆ ನದಿ ನೀರು ಪೂರೈಕೆ ಆಗಿಲ್ಲ.ಪಟ್ಟಣದ ಸಾವಿರಾರು ನಿವಾಸಿಗಳು ಕೊಳವೆ ಬಾವಿಗಳ ನೀರನ್ನು ಆಶ್ರಯಿಸುವ ಪರಿಸ್ಥಿತಿ ಉದ್ಭವಿಸಿದೆ. ಇಲ್ಲಿಯವರೆಗೆ ನದಿ ನೀರನ್ನು ಕುಡಿದ ಜನತೆಗೆ ಕೊಳವೆ ಬಾವಿಗಳ ನೀರು ಸವುಳ ಆಗಿದೆ. ಹೀಗಾಗಿ ಕೆಲವರು ಶುದ್ಧ ಘಟಕದಿಂದ ನೀರನ್ನು ತಂದರೆ, ಇನ್ನು ಕೆಲವರು ತಾಲ್ಲೂಕಿನ ಅಡರಕಟ್ಟಿಯಲ್ಲಿ ಜೆಜೆಎಂ ಯೋಜನೆಯಡಿ ಪೂರೈಕೆ ಆಗುತ್ತಿರುವ ನದಿ ನೀರನ್ನು ಆಟೊ ಮತ್ತು ದೂಡುವ ಗಾಡಿಗಳಲ್ಲಿ ತರುತ್ತಿದ್ದಾರೆ.

ಇನ್ನು ಲಭ್ಯ ಇರುವ ಕೊಳವೆ ಬಾವಿಗಳಿಂದ ಜನತೆಗೆ ನೀರು ಪೂರೈಸಲು ಪುರಸಭೆ ಸರ್ಕಸ್ ಮಾಡುತ್ತಿದೆ. ಲಕ್ಷ್ಮೇಶ್ವರ ದೊಡ್ಡ ಪಟ್ಟಣ ಆಗಿರುವುದರಿಂದ ಕೆಲ ಭಾಗಗಳಲ್ಲಿ ನೀರಿನ ಪೂರೈಕೆ ಸರಿಯಾಗಿ ಆಗುತ್ತಿಲ್ಲ. ಪಟ್ಟಣದಲ್ಲಿನ ಇಟ್ಟಿಗೇರಿ ಕೆರೆ, ಕೆಂಪಿಗೇರಿ ಕೆರೆ, ಮೋಟಾರ್‍ಗಟ್ಟಿ ಕೆರೆಗಳು ಖಾಲಿ ಇವೆ. ಈ ಕೆರೆಗಳು ತುಂಬಿದಾಗ ಸುತ್ತಮುತ್ತಲಿನ ನೂರಾರು ಕೊಳವೆ ಬಾವಿಗಳಲ್ಲಿ ನೀರು ಇರುತ್ತಿತ್ತು. ಆದರೆ ಇದೀಗ ಕೊಳವೆ ಬಾವಿಗಳ ನೀರೂ ಸಹ ಕಡಿಮೆ ಆಗುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ಈಗಿನ್ನೂ ಬೇಸಿಗೆ ಆರಂಭವಾಗಿದ್ದು ಈಗಾಗಲೇ ನೀರಿನ ಬವಣೆ ಕಾಡುತ್ತಿದೆ. ಇನ್ನು ಬೇಗನೇ ಮಳೆ ಆಗದಿದ್ದರೆ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಲಿದೆ.