ರೈತರಿಂದ ಜಾನುವಾರು ಮಾರಾಟ

ಗದಗ: ಜಿಲ್ಲೆಯಲ್ಲಿ ಮೇವಿನ ಕೊರತೆ ಜತೆಗೆ ಲಭ್ಯ ಇರುವ ಗುಣಮಟ್ಟದ ಮೇವು ತುಂಬಾ ದುಬಾರಿ ಆಗಿರುವುದರಿಂದ ರೈತರು ಅನಿವಾರ್ಯವಾಗಿ ಪ್ರೀತಿಯಿಂದ ಸಾಕಿದ ಜಾನುವಾರುಗಳ ಮಾರಾಟಕ್ಕೆ ಮುಂದಾಗಿದ್ದಾರೆ. ಗದುಗಿನ ಎಪಿಎಂಸಿ ಆವರಣ ದಲ್ಲಿ ಪ್ರತಿ ಶನಿವಾರ ನಡೆಯುವ ಜಾನುವಾರು ಸಂತೆಗೆ ಎತ್ತುಗಳನ್ನು ಮಾರಾಟ ಮಾಡಲು ತರುತ್ತಿ ರುವ ರೈತರ ಸಂಖ್ಯೆ ಪ್ರತಿ ವಾರ ಏರಿಕೆಯಾಗುತ್ತಿದೆ.

ಜಲ್ಲಾಡಳಿತ ಜಿಲ್ಲೆಯಲ್ಲಿ 5 ಕಡೆ ಗೋಶಾಲೆ ತೆರೆ ದಿದೆ. ಹಾಗೂ 6 ಕಡೆ ಮೇವು ಬ್ಯಾಂಕ್‌ಗಳನ್ನು ಪ್ರಾರಂಭಿಸಿದೆ. ಆದರೆ, ಮೇವು ಬ್ಯಾಂಕ್‌ಗಳಲ್ಲಿ ಸಿಗುವ ಮೇವು ತುಂಬಾ ಹಳೆಯದು ಮತ್ತು ಕಳಪೆ ಗುಣಮಟ್ಟದ್ದು. ಟೆಂಡರ್‌ ಮೂಲಕ ಜಿಲ್ಲಾಡಳಿತ ಈ ಮೇವನ್ನು ಖಾಸಗಿ ಪೂರೈಕೆದಾರರಿಂದ ಖರೀದಿ ಸಿದೆ. ಒಂದೆರಡು ವರ್ಷ ಹಳೆಯದಾದ ಈ ಮೇವು ಜಾನುವಾರುಗಳಿಗೆ ತಿನ್ನಲು ಯೋಗ್ಯವಾಗಿಲ್ಲ.

ಪುಡಿ ಪುಡಿಯಾಗಿರುವ ಹೊಟ್ಟು ಮೇವನ್ನು ತಿಂದರೆ ಎತ್ತುಗಳ ನಾಲಗೆ ಊದಿಕೊಳ್ಳುತ್ತದೆ. ಸರಿಯಾಗಿ ಜೀರ್ಣವಾಗುವುದಿಲ್ಲ. ಜತೆಗೆ ಶೇಖರಿಸಿ ಇಟ್ಟಿರುವ ಮೇವಿನಲ್ಲಿ ಸರಿಯಾಗಿ ಗಾಳಿಯಾಡದೆ ಕಮಟು ವಾಸನೆ ಬರುತ್ತಿದೆ. ಹೀಗಾಗಿ ಇಂತಹ ಮೇವನ್ನು ತಿನ್ನಲು ಎತ್ತುಗಳು ಇಷ್ಟಪಡುವುದಿಲ್ಲ. ಜತಗೆ ಕುಡಿ ಯುವ ನೀರಿನ ಅಭಾವ ತೀವ್ರವಾಗಿದೆ. ಹೀಗಾಗಿ, ಪ್ರೀತಿಯಿಂದ ಸಾಕಿದ  ಜಾನುವಾರು ಗಳನ್ನು ಅನಿವಾರ್ಯವಾಗಿ ಮಾರಾಲು ತಂದಿದ್ದೇವೆ ಎಂದು ತಮ್ಮ ನೋವು ತೋಡಿಕೊಂಡರು ಕಣವಿ ಗ್ರಾಮದ ರೈತ ರಾಚಯ್ಯ.

ಮೇವಿನ ದರ ಗಗನಕ್ಕೆ: ಈ ಬಾರಿ ಮುಂಗಾರು ಮತ್ತು ಹಿಂಗಾರು ಬೆಳೆ ಜಿಲ್ಲೆಯಲ್ಲಿ ಕೈಕೊಟ್ಟಿದೆ. ಹೀಗಾಗಿ, ಮೇವಿಗೆ ತೀವ್ರ ಕೊರತೆ ಉಂಟಾಗಿದೆ. ಜತೆ ಮೇವಿನ ದರವೂ ಕಳೆದ ವರ್ಷಕ್ಕೆ ಹೋಲಿಸಿ ದರೆ ದುಪ್ಪಟ್ಟಾಗಿದೆ. ಒಂದು ಟ್ರ್ಯಾಕ್ಟರ್ ಬಿಳಿ ಜೋಳದ ದಂಟಿನ ಮೇವಿಗೆ ₹ 6ರಿಂದ ₹ 8 ಸಾವಿರ ಬೆಲೆ ಇದೆ. ಕಳೆದ ವರ್ಷ ಇದು ₹ 4ರಿಂದ ₹ 5 ಸಾವಿರ ಆಸುಪಾಸಿನಲ್ಲಿತ್ತು. ಹೊಟ್ಟು ಮೇವಿನ ಬೆಲೆ ₹ 4ರಿಂದ ₹ 5 ಸಾವಿರದವರೆಗೆ ಇದೆ. ಜಿಲ್ಲೆಯಲ್ಲಿ ಎಲ್ಲೂ ಹಸಿ ಮೇವು ಲಭ್ಯವಿಲ್ಲ. ಶೇಂಗಾ ಹೊಟ್ಟು ಜಾನುವಾರುಗಳು ತಿನ್ನುತ್ತವೆ. ಅನಿವಾರ್ಯವಾಗಿ ಬಿಳಿಜೋಳದ ದಂಟು ಕೊಡುತ್ತಿದ್ದೇವೆ.

ಜಿಲ್ಲಾಡಳಿತ ಮೇವು ಬ್ಯಾಂಕ್‌ ಮೂಲಕ ಸಬ್ಸಿಡಿ ದರದಲ್ಲಿ ಮೇವು ಮಾರಾಟ ಮಾಡುತ್ತಿದೆ. ಆದರೆ, ಇಲ್ಲಿ ಕೆ.ಜಿಗೆ ₹ 3  ನೀಡಿ ಮೇವು ಖರೀದಿಸಬೇಕು. ಪ್ರತಿ ದಿನ ಎತ್ತಿನ ಜೋಡಿಯೊಂದಕ್ಕೆ ಸರಾಸರಿ 15 ಕೆ.ಜಿ ಮೇವು ಬೇಕು. ಕೆಲವರ ಬಳಿ ಎರಡಕ್ಕಿಂತ ಹೆಚ್ಚಿನ ಎತ್ತುಗಳಿರುತ್ತವೆ. ಬರದ ಬವಣೆಯಿಂದ ತತ್ತರಿಸಿರುವ ರೈತರಿಗೆ ಪ್ರತಿ ನಿತ್ಯ ಮೇವಿಗಾಗಿ ಮತ್ತೆ ₹ 50ರಿಂದ ₹ 100 ಖರ್ಚು ಮಾಡುವುದು ಕಷ್ಟ ಎಂಬುದು  ಎರೆಹಂಚಿನಾಳ ಗ್ರಾಮದ ರೈತ ರಾಮ ರಡ್ಡಿ ಅಬ್ಬಿಗೇರಿ ಅವರ ಅನಿಸಿಕೆ.