ದೊಡ್ಡತಪ್ಪಲೆ ಬಳಿ ನಿರಂತರ ಭೂಕುಸಿತ: ಶಿರಾಡಿ ಮಾರ್ಗದ ಸಂಚಾರ ಅಸ್ತವ್ಯಸ್ತ

ಹೀಗೆಂದು ಅಂಗಲಾಚುತ್ತಿರುವುದು ಬೆಂಗಳೂರು–ಮಂಗಳೂರು ರಾಷ್ಟ್ರೀಯ ಹೆದ್ದಾರಿ ಶಿರಾಡಿ ಘಾಟ್‌ ಮಾರ್ಗದಲ್ಲಿ ನಿತ್ಯ ಸರಕು ಸಾಗಣೆ ಮಾಡುವ ಲಾರಿ ಚಾಲಕರು ಹಾಗೂ ಕ್ಲೀನರ್‌ಗಳು.

ಶುಕ್ರವಾರ ಬೆಳಿಗ್ಗೆ ಇಲ್ಲಿಯ ಬೈಪಾಸ್ ಹಾಗೂ ಆನೇಮಹಲ್‌ ಗ್ರಾಮದಲ್ಲಿ ಲಾರಿಗಳು ಸಾಲುಗಟ್ಟಿ ನಿಂತಿದ್ದವು. ಕೆಲವು ಚಾಲಕರು, ಕ್ಲೀನರ್‌ಗಳು ರಸ್ತೆಯಲ್ಲಿಯೇ ಹಲ್ಲು ಉಜ್ಜುತ್ತಿದ್ದರೆ, ಆಂಧ್ರಪ್ರದೇಶದ ಚಾಲಕ ನಾಗೇಂದ್ರ ಲಾರಿಯೊಳಗೆ ಮಿನಿ ಸಿಲಿಂಡ್‌ ಸ್ಟೌನಲ್ಲಿ ಅಡುಗೆ ಮಾಡುತ್ತಿದ್ದರು.

ಕೆಲವು ಚಾಲಕರು ಸುರಿಯುತ್ತಿದ್ದ ಮಳೆಯಲ್ಲಿಯೇ ನೆನೆಯುತ್ತಾ ದೋಣಿಗಾಲ್‌ ಕಡೆಯಿಂದ ಬರುತ್ತಿದ್ದ 112 ಪೊಲೀಸ್ ವಾಹನ ನಿಲ್ಲಿಸಿ, ‘ದೊಡ್ಡತಪ‍್ಪಲೆಯಲ್ಲಿ ಮಣ್ಣು ಕ್ಲಿಯರ್ ಆಯ್ತಾ. ನಮ್ಮ ಲಾರಿಗಳನ್ನು ಯಾವಾಗ ಬಿಡ್ತೀರಿ? ಏನಾದರೂ ಮಾಡಿ ಬೇಗ ಬಿಡಿ. ಮನೆ ಬಿಟ್ಟು ವಾರ ಆಯ್ತು’ ಎಂದು ಮಂಗಳೂರಿನ ಚಾಲಕ ಅಶ್ರಫ್‌ ಹಾಗೂ ಇತರರು ಕೇಳುತ್ತಿದ್ದರು.

ದೊಡ್ಡತಪ್ಪಲೆ ಬಳಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಗುಡ್ಡ ಕುಸಿದು, ಮಣ್ಣು ರಸ್ತೆಯ ಮೇಲೆ ಪದೇ ಪದೇ ಬೀಳುತ್ತಿರುವುದರಿಂದ ಈ ಮಾರ್ಗದಲ್ಲಿ ವಾಹನಗಳ ಸಂಚಾರ ಅಸ್ತವ್ಯಸ್ತಗೊಂಡಿದೆ.

ನಿತ್ಯ 35 ಸಾವಿರಕ್ಕೂ ಹೆಚ್ಚು ವಾಹನಗಳು ಈ ಮಾರ್ಗದಲ್ಲಿ ಸಂಚರಿಸುತ್ತವೆ. ಮಣ್ಣು ಕುಸಿತ ಸಮಸ್ಯೆಯಿಂದಾಗಿ ಪ್ರತಿ ಅರ್ಧ, ಒಂದು ಗಂಟೆಗೊಮ್ಮೆ ಸಂಚಾರ ಸಂಪೂರ್ಣ ಬಂದ್ ಆದರೆ, ಒಂದು ಕಡೆ ವಾಹನಗಳನ್ನು ಬಿಟ್ಟು ಮತ್ತೊಂದು ಕಡೆ ನಿಲ್ಲಿಸಬೇಕಾಗುತ್ತದೆ. ಹೀಗಾಗಿ ಲಾರಿಗಳ ಸಂಚಾರಕ್ಕೆ ಸಮಸ್ಯೆ ಉಂಟಾಗಿದೆ.

‘ಬಳ್ಳಾರಿಯಿಂದ ಮಂಗಳೂರಿಗೆ ಸಿಮೆಂಟ್‌ ತರಲು ಹೋಗುತ್ತಿದ್ದೇವೆ. ಹಾಸನದ ಬೈಪಾಸ್‌ನಲ್ಲಿಯೇ ಎರಡು ದಿನ ನಿಲ್ಲಿಸಿದ್ದರು. ಪೊಲೀಸರನ್ನು ಕಾಡಿ ಬೇಡಿಕೊಂಡು ಗುರುವಾರ ರಾತ್ರಿ ಸಕಲೇಶಪುರ ಬೈಪಾಸ್‌ಗೆ ಬಂದಿದ್ದೇವೆ. 13 ಗಂಟೆಯಿಂದ ರಸ್ತೆಯಲ್ಲಿಯೇ ಇದ್ದೇವೆ. ಮೂರು ದಿನಗಳಿಂದ ಊಟ, ತಿಂಡಿಗೆ ಸಮಸ್ಯೆ ಆಗಿದೆ’ ಎಂದು ಆಂಧ್ರಪ್ರದೇಶದ ಚಾಲಕ ನಾಗಾರ್ಜುನ ಸಮಸ್ಯೆ ಹೇಳಿಕೊಂಡರು.

‘ಗಾಡಿಯನ್ನು ಈಗ ಬಿಡಬಹುದು, ಆಗ ಬಿಡಬಹುದು ಎಂದು ನಿದ್ರೆ ಸಹ ಮಾಡದೇ ರಸ್ತೆ ನೋಡುತ್ತ ಕುಳಿತುಕೊಂಡಿದ್ದೇವೆ. ಸ್ವಲ್ಪ ರೇಷನ್ ಇತ್ತು. ಹೇಗೋ ಗಾಡಿಯಲ್ಲೇ ಅನ್ನ– ಸಾರು ಮಾಡಿಕೊಂಡು ತಿನ್ನುತ್ತಿದ್ದೇವೆ’ ಎಂದು ತಿಳಿಸಿದರು.

‘ಬಳ್ಳಾರಿಯಿಂದ ಮಂಗಳೂರಿಗೆ ಸಿಮೆಂಟ್‌ ಸಾಗಣೆ ಮಾಡುತ್ತಿದ್ದೇವೆ. ನಾಲ್ಕು ದಿನಗಳಲ್ಲಿ ಹೋಗಿ ಬರುತ್ತೇವೆ. ಇದೀಗ 9 ದಿನಗಳಿಂದ ರಸ್ತೆಯಲ್ಲಿಯೇ ಬಾಕಿಯಾಗಿದ್ದೇವೆ. ಹೋಗುವಾಗಲೂ ರಸ್ತೆ ಬಂದ್‌, ಬರುವಾಗಲೂ ಶಿರಾಡಿ ಬಂದ್ ಆಗಿ ಸಕಲೇಶಪುರದಲ್ಲಿ 18 ಗಂಟೆಯಿಂದ ರಸ್ತೆಯಲ್ಲಿಯೇ ಇದ್ದೇವೆ’ ಎಂದು ಚಾಲಕ ಅಶ್ರಫ್‌ ತಿಳಿಸಿದರು.

ನಾನು ಪಕ್ಕದ ಪುತ್ತೂರಿನವ. ಸಕಲೇಶಪುರ–ಹೆಗ್ಗದ್ದೆ ನಡುವೆ ನಾಲ್ಕು ಪಥದ ರಸ್ತೆ ಕಾಮಗಾರಿ ಶುರು ಮಾಡಿದ ಮೇಲೆ ಪ್ರತಿ ವರ್ಷದ ಮಳೆಗಾಲದಲ್ಲಿ ನಮ್ಮ ಪಾಡು ಇದೀ ರೀತಿ. 8 ವರ್ಷಗಳಿಂದ ಈ 10 ಕಿ.ಮೀ. ರಸ್ತೆ ಮಾಡೋಕಾಗದೇ, ಪ್ರಯಾಣಿಕರು ಹಾಗೂ ನಮಗೆಲ್ಲಾ ಭಾರೀ ಸಮಸ್ಯೆ ಉಂಟು ಮಾಡಿದ್ದಾರೆ. ಮನೆಗೆ ಹೋಗಿ ಹೆಂಡತಿ ಮಕ್ಕಳ ಮುಖ ನೋಡಿ 9 ದಿನಗಳಾಯ್ತು’ ಎಂದು ಚಾಲಕ ಅಶ್ರಫ್‌ ಹೇಳಿದರು.