ಆಲೂರು: ರೈಲು ಹತ್ತಲು ಪ್ರಯಾಣಿಕರ ಹರಸಾಹಸ

1977 ರಿಂದ ರೈಲು ಓಡಾಡುತ್ತಿತ್ತು. ಆದರೆ, ಬ್ರಾಡ್‍ಗೇಜ್‍ಗೆ ಪರಿವರ್ತನೆಯಾದ ನಂತರ ಪಟ್ಟಣದಲ್ಲಿ ರೈಲುಗಳು ನಿಲ್ಲುತ್ತಿರಲಿಲ್ಲ. ಜನಸಾಮಾನ್ಯರು, ಜನಪ್ರತಿನಿಧಿಗಳು, ಸಂಘಸಂಸ್ಥೆಗಳ ಹೋರಾಟ ಮತ್ತು ಇಲಾಖೆ ಸಚಿವರು, ಅಧಿಕಾರಿಗಳ ಸಹಕಾರದಿಂದ, ಒಂದು ವಾರದಿಂದ ಬೆಂಗಳೂರು-ಮಂಗಳೂರಿಗೆ ಓಡಾಡುತ್ತಿರುವ ರೈಲುಗಳು ಬೆಳಿಗ್ಗೆ 10.20 ಕ್ಕೆ ಮತ್ತು ಸಂಜೆ 4.15 ಕ್ಕೆ ನಿಲ್ಲುತ್ತಿವೆ.

ಆದರೆ ಬೆಳಗಿನ ವೇಳೆಯಲ್ಲಿ ರೈಲಿನಲ್ಲಿ ಬೆಂಗಳೂರು ಕಡೆಗೆ ಪ್ರಯಾಣಿಸಲು ಆಲೂರಿನಿಂದ ಯಾವುದೇ ರೈಲು ಇಲ್ಲ. ಯಶವಂತರಪುರದಿಂದ ಬಂದು ಹಾಸನದಲ್ಲಿ ರಾತ್ರಿ ನಿಲ್ಲುವ ರೈಲು, ಪುನಃ ಯಶವಂತರಪುರಕ್ಕೆ ಹಾಸನದಿಂದ ಬೆಳಿಗ್ಗೆ 7 ಕ್ಕೆ ಹೊರಡಲಿದೆ. ಬೆಂಗಳೂರಿಗೆ ಹೋಗುವ ತಾಲ್ಲೂಕಿನ ಪ್ರಯಾಣಿಕರು ಬೆಳಿಗ್ಗೆ 7 ಕ್ಕೆ ಹಾಸನಕ್ಕೆ ಹೋಗಿ ರೈಲನ್ನು ಹತ್ತಬೇಕಾಗಿದೆ.

ಇದೇ ರೈಲನ್ನು ಯಶವಂತಪುರದಿಂದ ಸಕಲೇಶಪುರದವರೆಗೆ ವಿಸ್ತರಿಸಿದರೆ, ಬೆಂಗಳೂರಿನಿಂದ ಬರುವ ಆಲೂರು ಮತ್ತು ಸಕಲೇಶಪುರದ ಪ್ರಯಾಣಿಕರು ಸ್ವಗ್ರಾಮಕ್ಕೆ ಬಂದಿಳಿಯುತ್ತಾರೆ. ಅದೇ ರೈಲು ಬೆಳಿಗ್ಗೆ ಸಕಲೇಶಪುರದಿಂದ ಯಶವಂತಪುರಕ್ಕೆ ವಾಪಸ್‌ ಹೊರಟರೆ, ಆ ರೈಲಿನಲ್ಲಿ ಸ್ಥಳೀಯರು ಬೆಂಗಳೂರಿಗೆ ಹೋಗಿ ಕೆಲಸ ಮುಗಿಸಿಕೊಂಡು ಪುನಃ ಅದೇ ರೈಲಿನಲ್ಲಿ ವಾಪಸ್‌ ಬರಬಹುದು. ಇದರಿಂದ ಪ್ರಯಾಣಿಕರಿಗೂ ಮತ್ತು ರೈಲ್ವೆ ಇಲಾಖೆಗೂ ಅನುಕೂಲವಾಗಲಿದೆ ಎನ್ನುವ ಮಾತು ಜನರದ್ದು. 

ಪಟ್ಟಣದ ಮುಖ್ಯ ರಸ್ತೆಯಿಂದ ಆಶಾ ಬಡಾವಣೆ ಮೂಲಕ ಮತ್ತು ಹುಣಸವಳ್ಳಿ ರಸ್ತೆಯಿಂದ ರೈಲ್ವೆ ನಿಲ್ದಾಣಕ್ಕೆ ಓಡಾಡಲು ಎರಡು ದಾರಿಗಳಿವೆ. ಹುಣಸವಳ್ಳಿ ಮುಖ್ಯ ರಸ್ತೆಯಿಂದ ಆಶಾ ಬಡಾವಣೆಗೆ ಹೊಂದಿಕೊಂಡಂತೆ ಸುಮಾರು 500 ಮೀಟರ್‌ ದೂರ ಅಗಲವಾದ ಸಂಪರ್ಕ ರಸ್ತೆ ಇದೆ. ಹುಣಸವಳ್ಳಿ ರಸ್ತೆ ಡಾಂಬರ್‌ ರಸ್ತೆಯಾಗಿದ್ದು, ನಿಲ್ದಾಣಕ್ಕೆ ಹೋಗುವ ಸಂಪರ್ಕ ರಸ್ತೆಗೆ ಡಾಂಬರ್‌ ಹಾಕಿ ಸುಸಜ್ಜಿತಗೊಳಿಸಿದರೆ ವಾಹನಗಳು, ಸಾರ್ವಜನಿಕರು ಓಡಾಡಲು ಅನುಕೂಲವಾಗುತ್ತದೆ.