ಸೆಸ್ಕ್‌ ವಿದ್ಯುತ್ ಕರ ವಸೂಲಿಗೆ ಹಿನ್ನಡೆ

ಬೇಲೂರು: ಕಾಂಗ್ರೆಸ್ ಸರ್ಕಾರದ ಗೃಹಜ್ಯೋತಿ ಯೋಜನೆಯ ಆಶ್ವಾಸನೆಯಿಂದ ವಿದ್ಯುತ್ ಕರ ವಸೂಲಿಯಲ್ಲಿ ಗಣನೀಯ ಪ್ರಮಾಣದ ಇಳಿಕೆ ಕಂಡಿದೆ.

ಇಲ್ಲಿನ ಸೆಸ್ಕ್ ಕಚೇರಿಯಲ್ಲಿ ತಿಂಗಳಿಗೆ ಸರಾಸರಿ ₹ 1.10 ಕೋಟಿಯಿಂದ ₹1.20 ಕೋಟಿ ವಿದ್ಯುತ್ ಕರ ವಸೂಲಿಯಾಗುತ್ತಿತ್ತು, ಏಪ್ರಿಲ್ ತಿಂಗಳಿನಲ್ಲಿ ₹1.12 ಕೋಟಿ ವಸೂಲಾಗಿತ್ತು. ಆದರೆ ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದ ಕಾರಣ ಮೇ ತಿಂಗಳಿನಲ್ಲಿ‌ ₹ 98. 57 ಲಕ್ಷ ಹಣ ವಸೂಲಾಗಿದ್ದು, ಸುಮಾರು ₹ 14ಲಕ್ಷದಿಂದ ₹ 20 ಲಕ್ಷದವರೆಗೆ ಕಡಿಮೆಯಾಗಿದೆ.

ಸರ್ಕಾರ 200 ಯೂನಿಟ್‌ಬರೆಗೆ ಉಚಿತ ಎಂದು ಹೇಳಿದೆ. ನೀವೆಕೆ ಬಂದು ಬಿಲ್ ಕೇಳುತ್ತಿದ್ದಿರಾ ಎಂದು ಜನರು ಬಿಲ್ ಕಲೆಕ್ಟರ್‌ಗಳನ್ನು ದಬಾಯಿಸುತ್ತಿದ್ದಾರೆ. ವ್ಯಾಪಾರಕ್ಕಾಗಿ ವಿದ್ಯುತ್ ಬಳಸುತ್ತಿರುವವರು ಸಹ ಬಿಲ್ ಕಟ್ಟಲು ಹಿಂದೇಟು ಹಾಕುತ್ತಿದ್ದಾರೆ.

ಗ್ರಾಹಕರಿಗೆ ಸಮಜಾಯಿಷಿ ನೀಡಿ, ಯೋಜನೆ ಅನುಷ್ಠಾನಕ್ಕೆ ಬಂದಿಲ್ಲ. ಬಂದ ನಂತರ ಬಿಲ್ ಕೇಳುವುದಿಲ್ಲ ಎಂದು ತಿಳಿಸಿ, , ಬಿಲ್ ಪಡೆಯುವಷ್ಟರಲ್ಲಿ ಬಿಲ್ ಕಲೆಕ್ಟರ್‌ಗಳು ಹೈರಾಣಾಗಿ ಹೋಗುತ್ತಿದ್ದಾರೆ. ಕೆಲವರು ಬಿಲ್‌ ಸಹ ಪಡೆಯುತ್ತಿಲ್ಲ. ಮತ್ತೆ ಕೆಲವರು ಉಚಿತ ವಿದ್ಯುತ್‌ ಸಿಗುವುದರಿಂದ ಮೀಟರ್ ಅವಶ್ಯಕತೆ ಇಲ್ಲ. ಮೀಟರ್ ತೆಗೆದುಕೊಂಡು ಹೋಗಿ ಎಂದು ಹೇಳುತ್ತಿದ್ದಾರೆ.

‘ಸರ್ಕಾರದಿಂದ ಇನ್ನೂ ಯಾವುದೇ ಆದೇಶ ಬಂದಿಲ್ಲ‌. ಅಲ್ಲಿಯವರೆಗೆ ಗ್ರಾಹಕರು ಬಿಲ್ ಪಾವತಿಸಬೇಕು. ನಾವು ಕೆಪಿಟಿಸಿಎಲ್‌ಗೆ ಹಣ ನೀಡಿ ವಿದ್ಯುತ್ ಕೊಂಡುಕೊಳ್ಳುತ್ತಿದ್ದು, ಅವರಿಗೆ ಹಣ ಕೊಡಲು ಕಷ್ಟವಾಗುತ್ತಿದೆ’ ಎಂದು ಸೆಸ್ಕ್ ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ ಚಂದ್ರಮ್ಮ ಮನವಿ ಮಾಡಿದ್ದಾರೆ.