ಹಾವೇರಿ: ‘ಶತಾಯುಷಿ’ಗೆ ಶತಕೋಟಿ ನಮನ

ಹುಕ್ಕೇರಿಮಠದ ಲಿಂ.ಶಿವಲಿಂಗ ಸ್ವಾಮೀಜಿ ಜನ್ಮ ಶತಮಾನೋತ್ಸವವನ್ನು ಕಳೆದ ವರ್ಷ (2018) ಆಚರಿಸಲಾಗಿತ್ತು. ಅದರ ಅಂಗವಾಗಿ ಮಠದ ಸದಾಶಿವ ಸ್ವಾಮೀಜಿ ನೇತೃತ್ವದಲ್ಲಿ ತುಮಕೂರಿನಲ್ಲಿ 2018ರ ಮಾರ್ಚ್‌ 14ರಂದು ಶಿವಕುಮಾರ ಸ್ವಾಮೀಜಿಗೆ ‘ಶತಾಯಿಷಿ ಸ್ವಾಮೀಜಿಗೆ ಶತಕೋಟಿ ನಮನ’ ಎಂದು ಗೌರವ ಸಮರ್ಪಿಸಲಾಗಿತ್ತು.

‘ನಮ್ಮ ಹಿರಿಯ ಗುರುಗಳಿಗೂ ಶಿವಕುಮಾರ ಸ್ವಾಮೀಜಿಗೂ ಅವಿನಾಭವ ಸಂಬಂಧವಿತ್ತು. ಇದೇ ಪರಂಪರೆಯನ್ನು ನಮ್ಮ ಮಠವು ಸಿದ್ದಗಂಗಾ ಮಠದ ಜೊತೆ ಮುಂದುವರಿಸಿಕೊಂಡು ಬಂದಿದೆ. ಹೀಗಾಗಿ, ಶತಮಾನೋತ್ಸವದ ಗೌರವವನ್ನು ಅವರಿಗೆ ಸಮರ್ಪಿಸಿದ್ದೆವು. ಅವರ ಅಗಲಿಕೆಯು ಮಠ ಹಾಗೂ ನಮಗೆ ಬಹಳ ನೋವನ್ನು ಉಂಟುಮಾಡಿದೆ’ ಎಂದು ಹುಕ್ಕೇರಿಮಠದ ಸದಾಶಿವ ಸ್ವಾಮೀಜಿ ತಿಳಿಸಿದರು.

ಮಾರ್ಗದರ್ಶನ:‘ಚಿತ್ರದುರ್ಗ ಮುರುಘಾ ಮಠ, ಹಾವೇರಿ ಹೊಸಮಠ ಹಾಗೂ ತುಮಕೂರಿನ ಸಿದ್ದಗಂಗಾ ಮಠದ ನಡುವೆ ಉತ್ತಮ ಬಾಂಧವ್ಯವಿದೆ. ಸಿದ್ದಗಂಗಾ ಶ್ರೀಗಳು ನಮಗೆ ಮಾರ್ಗದರ್ಶನ ನೀಡಿದ್ದಾರೆ. ಸಿದ್ದಗಂಗಾ ಮಠದಲ್ಲಿ ನಡೆದಿದ್ದ ಕಾರ್ಯಾಗಾರದಲ್ಲಿ ಪಾಲ್ಗೊಂಡು, ಅವರ ನಡೆ–ನುಡಿ, ಮಾರ್ಗದರ್ಶನವನ್ನು ಪಡೆದ ಭಾಗ್ಯವೂ ನಮ್ಮದಾಗಿತ್ತು’ ಎಂದು ಹೊಸಮಠದ ಚರಮೂರ್ತಿ ಬಸವ ಶಾಂತಲಿಂಗ ಸ್ವಾಮೀಜಿ ನೆನಪಿಸಿಕೊಂಡಿದ್ದಾರೆ.

ಅಧ್ಯಾತ್ಮಿಕದ ಜೊತೆ, ಸಾಮಾಜಿಕ, ಶೈಕ್ಷಣಿಕ ಸೇರಿದಂತೆ ಹಲವಾರು ವಿಚಾರಗಳಲ್ಲಿ ಶ್ರೀಗಳು ‘ದೇವರು’ ಆಗಿದ್ದರು. ಹಲವಾರು ಸಂದರ್ಭದಲ್ಲಿ ಅವರ ಆಶೀರ್ವಾದ ಹಾಗೂ ಮಾರ್ಗದರ್ಶನ ಪಡೆದಿದ್ದೇವೆ. ‘ನಡೆದಾಡುವ ದೇವರು ಇನ್ನಿಲ್ಲ’ ಎನ್ನುವುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ. ಆದರೆ, ಅವರ ಕಾಯಕ ಮತ್ತು ನೆನಪುಗಳು ಚಿರಸ್ಥಾಯಿ ಎಂದು ಸಂಸದ ಶಿವಕುಮಾರ್ ಉದಾಸಿ ಸ್ಮರಿಸಿಕೊಂಡಿದ್ದಾರೆ.

ನಗರದಲ್ಲಿ ತಾಲ್ಲೂಕು ಪಂಚಾಯ್ತಿ ಸಭಾಭವನದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಶಾಸಕ ನೆಹರು ಓಲೇಕಾರ ಹಾಗೂ ಪ್ರಮುಖರು ಶ್ರೀಗಳಿಗೆ ಶ್ರದ್ಧಾಂಜಲಿ ಸಲ್ಲಿಸಿದರು.